SAMUEL 2 7:18 - Alkitab Singog In Mongondow Masa In Tanaa

¹⁸ Bo sinumuotdon in ki Datu Daud kon bonu in ḷoḷaigan i Tuhan. Iḻimitú in sia bo nosambayang, “O Tuhan Inta Totok in Moḷantud, akuoi takin motoḷuadíku in diábí patus motarima kon kopiaan inta pinoontong-Mu kon inakó naa in kino oonggot.

SAMUEL 2 7:18 Referans Kwoze

MAZMUR 8:4

Aka indoianku in ḷangit inta pinomia-Mu, buḷan bo tundi inta pinoukat-Mu,

TAWARIKH 1 17:16

Bo sinumuotdon in ki Datu Daud kon bonu in Ḷoḷaigan i Tuhan. Iḻimitú in sia bo nosambayang, “Oo Tuhan Allah, akuoi bo motoḷuadíku in diábí patus in motarima kon bayongan in kopopia inta pinoontong-Mu kon inakó naa in koonggot.

SAMUEL 1 18:18

Ki Daud in notubag, “Ki inebí in bobantung naa, bo ki inedon in kami motoḷuadí i amáku kon Israel, modapot in mobaḻí mototaka i Datu?”

KINOBAḺIAN 32:10

Akuoi in diá patus motarima kon bayongan tabi bo kososatia inta ain pinoontong i Tuhan kon inakó. Naonda in akuoi nobuat iḷumoḷan kon Ongkag in Yordan, akuoi in diábí nodia kon onu bo onu koḻikudbí in tungkud. Tanaa akuoi in nobui mangoi takin nobaḻídon doyowa nokolompok tanaa.

IḶUAIAN 3:11

Táe ki Musa in noguman kon i Allah, “Ki inebí in akuoi naa, dapot in mokosanggup mayá tumayow kon i datu bo modia kon intau Israel ḷumuai nongkon Mesir?”

SAMUEL 1 15:17

Ki Samuel in noguman, “Tantú kinotaauanbí i Tuang Datu, kon umpakabí kon raianmu tontaní ki Tuang Datu naa in mointok táe binaḻí bidon itoi kon suku mita in Israel? Bo iko nion in binarakatandon i Tuhan nobaḻí datu kon Israel,

EPESUS 3:8

Kon sigad in bayongan umat i Allah, yo akuoibí naa in totok in mokooyá. Táe ki Allah ain noponotabi in oaidan tanaa kon inakó; oaidan mopoyaput in Habar Mopia soaḷ kaoyúonan i Kristus inta diá modai-dait;

HAKIM MITA 6:15

Ki Gideon notubag, “Nongonu sin akuoibí, Tuhan? Naondabí in pomomilatku kon intau in Israel nongkon kawasa in intau in Midian? Kon bonu in suku Manasye inanakankubí naa inta totok in moyangkó. Bo kon bonu in motoḷuadíku, akuoi doman naa inta totok in diá in mangaḻenea.”

SAMUEL 1 9:21

Ki Saul notubag, “Akuoi naa in nongkon suku Benyamin, suku inta totok in mointok kon Israel, apa doman motoḷuadíku inta totok in diá in mangaḻenea kon bonu in suku tatua. Dá nongonu sin ki Amá in mogumanbí natua kon inakó?”

YESAYA 37:14

Ki Hizkia in notarima kon surat tatua nongkon totabá mita poḷat binacanea. Onda intua minayá in sia kon Baḷoi Tuhan bo nobuká kon surat tatua kon tayowon i Tuhan,

SAMUEL 2 7:17

Bo pinotaau i Natan kon i Daud in bayongan inta pinoniata i Allah kon inia.

KINOBAḺIAN 32:11

Akuoi in mopoigumdon totok, posaḷamatpa in akuoi nongkon i Esau ki guya-guyangku. Akuoi in moondok dikabo sia in mamangoi monubu bo moyopú kon i nami komintan, diá doman taḻibannea in bobay bo adí mita.

RUT 2:10

Nokodongogmai kon natua, sinumungkud in ki Rut kon tayowon i Boas bo noguman, “Amá, akuoi naa in diábí patus in motarima kon aid inta námai tua in kopopia nongkon i Amá. Akuoi naa in intau mokokiangoi bo diábí patus motarima kon aid mopia nongkon i Amá!”

SAMUEL 2 23:5

Natua doman in buíku binarakatan i Allah, dodandian-Nea kon inakó, diá mobaḷui, dandi-Nea tatua in mononoi bo motompod, notoinut kon bayongan in yagi-yagi. Ki Allah in moḷukad kon kountunganku bo mobogoi kon bayongan inta kinoibogku.

TAWARIKH 1 29:14

Akuoi bo rayatku tanaa in diábí mokopobogoi kon onu bo onu kon ini-Mu, sin bayongan in yagi-yagi tua Ikobí in nobogoi bo onu inta inogoi nami naa in Ikobí doman in kitogi.