SAMUEL 2 22:23 - Alkitab Singog In Mongondow Masa In Tanaa

²³ Bayongan in hukum-Nea inindoianku, parenta-Nea mita in diá in sinaḻibanku.

SAMUEL 2 22:23 Referans Kwoze

MAZMUR 119:102

Diábí pomayáku mako in hukum-Mu, sin Ikobí in notundú kon inakó.

MAZMUR 119:30

Piniḻíkudon kon motoindudui, parenta-Mu in umuran toroponku mako.

YOHANES 15:14

Moiko nion in yobayat-Ku mita, aka pomiaan monimu in onu inta pinarenta-Ku kon inimu.

LUKAS 1:6

Kobobiag inayadua motonibuḷoi tua mokosanang kon gina i Allah, sin taya dua in umuranbí dinumudui kon parenta bo atorang i Tuhan, diábí in sinaḻiban monia.

MAZMUR 119:128

Tuamai akuoi in nobiag podudui in bayongan topotundú-Mu; dodia inta mobelung in kinodoíku.

MAZMUR 119:86

Bayongan in hukum-Mu in motaaubí pongata, tuḷungaipa kaasí in akuoi, sin akuoi in dinuduran táe diábí in kinodoyonan pinonduduran.

MAZMUR 119:13

Noḷangon in singogku in nopotaau in bayongan in hukum inta inogoi-Mu.

MAZMUR 119:6

Aka akuoi monaridimai kon bayongan in parenta-Mu, dá akuoi in diábí pokopooyáanmai.

ULANGAN 8:11

“Ḷukadai kopia dika modapot in moiko mokoḻiong kon i Tuhan Allahmu; dika tobatúmai in taḻiban monimu in nongkon bayongan hukum-Nea inta inogoiku kon i monimu singgai in naa.

ULANGAN 7:12

“Aka tarukiraan monimu in parenta mita tatua, bo mosatia in mopoaid, dá ki Tuhan Allahmu in mosatiabí doman kon dodandian inta pinomia-Nea takin i monimu. Sia in mopoontongbí in tabi-Nea inta motantú kon i monimu, ná inta pinodandi-Nea kon mogoguyangmu.

ULANGAN 17:20

Aka umurannea intua bacaan, dá diábí in sia monganggap kon sia in mopia-pia kon intau mita tobangusanea, bo diábí ḻimimpat kon parenta i Tuhan naondaka in oaidnea. Bo sia takin buínea in momarenta kon bangusanea modapot kon adí bo ompu.”