SAMUEL 1 9:20 - Alkitab Singog In Mongondow Masa In Tanaa

²⁰ Soaḷ keledaimu mita inta ain toḷu nosinggai naa in nobuḻi tua, dika moḻia-ḻiaw in gina, sin ain nouḻí. Apa doman, inta totok in mopia kon bayongan Israel in ogoi bidon kon inimu bo kon motoḷuadí i amámu.”

SAMUEL 1 9:20 Referans Kwoze

SAMUEL 1 8:5

bo noguman kon inia, “Indongogaipa kaasí Amá, ki Amá aindon nogoguyang bo ki adí mita i Amá in diábí dinumudui kon aid i Amá. Dá maníka ki Amá moduídon kon datu tobatú bá oyúondon in datu nami ná doman bangusa mita ibanea.”

SAMUEL 1 12:13

“Tanaa, indoiai, naadon in sia, datu inta piniḻí monimu. Ain inigum monimu in sia, bo inogoidon i Tuhan in sia kon inimu.

SAMUEL 1 9:3

Kon singgai tobatú tongonumai in keledai i Kish nobuḻi. Tuamai in ki Kish noguman kon i Saul, “Podiadon kon bobantung tobatú, bo tayakdon in keledai mita tatua.”

KOLOSE 3:2

Raidon in soaḷ mita inta kon soroga, donaai morai kon soaḷ mita inta kon dunia.

MAZMUR 62:10

Intau in tongábí gabut in poginaan, moḷoben mointok tumpaḷa diá koboḻi. Aka simbangon, noniata magí nogaanbí in mosia, mogaa-gaanbí kon tompot poginaan.

TAWARIKH 1 29:3

Bo popisí in tabiku kon Baḷoi Allahku tatua dá nobogoi domandon in akuoi kon saḷaka bo buḷawan nongkon kapunyaanku tontaní:

SAMUEL 1 12:15

Tongá, aka moiko diá mokidongog kon i Tuhan, bo modapotdon in moḷawang kon parenta-Nea, yo notantú bidon kon moiko bo datumu in ḷawangon bidon i Tuhan.

SAMUEL 1 8:19

Táe bangusa tatua in doíbí mokidongogmai kon tosingogon i Samuel tua, nodapotdon in mosia noguman, “Biódon mako! Kami naa in moibog bidon in datu tobatú.

SAMUEL 1 4:20

Naonda in sia gogiódon matoi, bobay mita inta notuḷung kon inia noguman, “Mokoposabarbí! Ḷoḷaki in ki adímu naa!” Tongá diábí in sia notubag ande nonarukiramai kon i monia.

SAMUEL 1 9:19

Ki Samuel notubag, “Akuoi in mododoyangow inta kainimu nion. Unadon kon inakó kon tampat pooibadaan kon buḷud, sin kon singgai in naa moiko in mongaan moyotakinku. Ikoḷom doḷo-doḷom bayongan inta ḻibóonmu in potaauku, bain mopaḷut kon tua bo motaaudon mobui in moiko.

SAMUEL 1 10:16

Ki Saul in notubag, “Sia in nopotaau kon bobiagon mita tatua in nouḻídon.” Táe diábí inouman i Saul kon pokuamáannea tatua kon sia in binaḻídon i Samuel datu.