SURAT I PAULUS KON JAMAAT RUM 6:21 - Alkitab Singog In Mongondow Masa In Tanaa

²¹ Kon wakutu intua onu in kauntungan nouḻí monimu kon dodai in nogaid kon soaḷ mita inta tanaa mako mooyádon in moiko mogaid? Aid mita tatua in tongábí modia mayá in popatoi!

SURAT I PAULUS KON JAMAAT RUM 6:21 Referans Kwoze

SURAT I PAULUS KON JAMAAT RUM 1:32

Kinotaauanbí monia, kon podudui in hukum i Allah, intau inta mogaid kon bayongan tua in patusbí hukumon modapot matoi. Táe umpakabí natua yo aidanbí doman monia intua komintan; bo nodapotbí in aka intau ibanea in momia kon soaḷ mita ná inta inaidan monia tua yo mosatujubí doman i mosia.

SURAT I PAULUS KON JAMAAT RUM 7:5

Sin koḻipod kita in nobiag podudui ibog in awak naa. Kon wakutu intua ibog mita inta mokobaradosa in nomuká sin oyúon in hukum agama, bo tua in nokadai kon inaton. Manangka intua kita in mogaid kon soaḷ mita inta mokopopisí kon kopatoian.

SURAT I PAULUS KON JAMAAT RUM 6:23

Sin aka bungai in dosa tua in popatoibí, táe kobiagan mopia bo mononoi in moyotakin i Kristus Yesus, Tuhan naton, tua in inogoibí i Allah pinomorosen.

AMSAL 14:12

Oyúon in daḷan inta koontongan in motuḻid, táe imbuitnea daḷan tatua in modiabí kon popatoi.

YOHANES 1 2:28

Pogumanku bui kon i monimu adíku mita: Kobiag umuran motobatú takin i Kristus, sinbá aka Sia in mamangoidon bui, yo kita in diádon moondo-ondok in tumayow kon i-Nia, bo diá domandon mooya-oyá.

IBRANI 6:8

Táe aka tongá kobiagan in padang bo bayongan in díat, dá diá in baraguna in butá tatua sahingga kutukon i Allah bo pangabisannea pokakon modait.

SURAT I PAULUS KON JAMAAT RUM 8:13

Sin aka moiko bo mobiag dumudui kon ibog in awak naa, dá matoibí; táe aka moiko bo momaké in kawasa in Roho i Allah bo umuran monginggamá kon aid mita inta mokobaradosa, yo mobiagbí in moiko.

SURAT I PAULUS KON JAMAAT RUM 8:6

Aka raian monimu kinawasa in ibog in awak naa, dá popatoibí in mouḻí. Táe aka raianmu bo kinawasa in ibog in Roho i Allah dá mouḻímubí in kobiagan bo iko mobiag motompia takin i Allah.

DANIEL 12:2

Mobayong in kon sigad monia inta ain minatoi in mobiag bui; tongosilai in motarima kon kobiagan mononoi, bo tongosilai doman in motarima kon kohohina bo inta mokokoningkim inta mononoi doman.

YEREMIA 17:10

Akuoi, ki Tuhan monaridi kon gina, bonu in dodob in intau ujion-Ku kon batúan in intau tuḻían-Ku podudui in dodianea, bo aidan-Ku podudui in oaidnea.”

WAHYU 20:14

Onda intua popatoi bo dunianea in pinogambat kon bonu in dagat in tuḷu. (Dagat in tuḷu tanaa in kopatoian inta induanea.)

WAHYU 16:6

Sin mosia ain nopobutak in dugú in umat mita i Allah bo dugú in nabi mita; tanaa mako pinoinum-Mu domandon in mosia in dugú, patusbí tarimaan monia intua!”

PETRUS 1 4:17

Sin naa bidon wakutu i Allah momangkoi mohakim kon dunia naa. Bo umatbí i Allah inta muna-munamai hakimon. Dá aka kita inta mopirisaya bo hakimon doman, yo onu in mobaḻí kon i monia inta diá mopirisaya kon Habar Mopia nongkon i Allah tua?

YAKOBUS 5:20

yo toropdon in tontagá tanaa: Intau inta ain nodia mangoi kon intau tobatú binaradosa bui namangoi kon i Allah, yo intau tatua ain noposaḷamat kon jiwa in intau baradosa tatua nongkon kinopatoiannea bo nokopopisí kon nobarong in dosa inampungan. Horomat nami, Ki Yakobus

YAKOBUS 1:15

Moiduduimai kon tua, aka ibog inta moraat tatua bo duduian, dá mobaḻídon in oaid inta diá mopia; bo aka aid diá mopia tatua bo moguyangdon, dá popatoi in bungainea.

IBRANI 10:29

Táe umpaka natua, hukumanbí kon intau inta moritak kon i Adí i Allah in moboga-bogat, bo kon i monia doman inta nonganggap nohina in dugú dodandian i Allah, dugú inta pinodoyon kon kinopatoian i Kristus sin nondarit kon inia nongkon dosanea mita. Sia in nohojat doman kon Roho inta mobogoi in totabi.

KORINTUS 2 7:11

Tungkuḷaika tarukira monimu onu in bungai in ajar in gina inta pinodudui kon ibog i Allah kon i monimu! Naa in bungainea; moiko in totu-totuubí moramuji moginsilang kon onu inta diápa notarang! Bo moyaatbí in gina monimu kon onu inta diá mopia, oyúon in porasaan moondok, mokotanobbí, tantú moropot in gina, bo oyúon in ibog mohukum kon inta kotaḷá! Kon bayongan soaḷ mita tanaa in moponiata bidon kon moiko in diá bidon kotaḷá.

YEHEZKIEL 43:11

Bo naonda in mooyá in mosia popisí in aid mita monia, insilangaidon in tombaḷoi in Baḷoi-Ku tanaa kon i monia: batangannea, ngaranea mita tumuot bo ḷumuai, ḷandakan in baḷoinea, bayongan in atorang bo hukumnea mita. Paisdon intua komintan kon i monia sinbá koontongan monia bo moindoi kon naonda in pononompia kon bayongan in yagi-yagi, poḷat dumudui kon bayongan in atorangnea.

YEREMIA 31:19

Iko ain sinoḻikudan nami, táe nomanasaḷ in kami kon aid tatua. Naonda in ihukum-Mu in kami, kinumuyung in kami sin norobonoḷ in gina. Nooyá in kami bo nobaḻí mokooyá popisí in binaradosadon kon dodai in noguodpa.’

YEREMIA 12:13

Umat-Ku in momuḷa kon gandum, táe dugidon in sinipú. Mosia in rumoriga in mogaid táe diá in bungai in siniḷopíannea. Akuoi in sinumorú totok dá bungai in boyó monia diá nopia.”

YEREMIA 8:12

Ei umat-Ku, sabanarnea in mustibí in moiko mooyá sin nogaidon kon bayongan inta mokooyá tua! Táe moiko in mobunod in pogot bo diá kooyá. Tuamai in moḷabúbí in moiko ná intau ibanea inta ain noḷabú; mopopatdon in ouman kinobiaganmu aka hukumon-Kudon in moiko.

YEREMIA 3:3

Tuamai in tubig nongkon ḷangit diá moḷabú, bo uyan kon sempo in pononubú diá doman moiango-angoi. Iko in naonda bo bobay sundaḷ, bo diá kotoguoyá.

YESAYA 3:10

Ki Tuhan in noguman, “Poyaputdon kon intau inta motoindudui kon i-Nakó kon mosia in mopiabí bo mosaḷamat. Mosia in mokaanbí kon bungai in siniḷopíannea.

AMSAL 16:25

Oyúon in daḷan koontongan in motuḻid, táe imbuitnea daḷan tatua modia mayá in popatoi.

AMSAL 1:31

Tuamai, korasaanbí monimu in bungai in aidmu mita bo tomayámu mita inta moraat.

MAZMUR 73:17

Imbuitnea sinumuot in akuoi kon Baḷoi i Tuhan, bo kinomangaḻeankudon in imbuit in intau moraat.

AYUB 42:6

Tuamai in mooyá in akuoi monorop kon bayongan in tosingogonku bo takin momanasaḷ akuoi in ḻimitú kon butá bo ḷobud.”

EZRA 9:6

Akuoi in noguman, “Oo Allahku, akuoi naa in mooyá in dumungá kon tayowon-Mu. Dosa nami in moyo-moyoguntuḷdon kon tudu in uḷu nami noidapotdon in ḷangit.

DATU MITA IMITÁNEA 2:26

Noiduduimai kon tua ki Datu Salomo in noguman kon i Imang Abyatar, “Bayádon kon ḻipúmu kon Anatot. Iko nion in patusbí hukumon matoi, táe singgai in naa akuoi in diábí moḻimod kon inimu, sin kon dodai in iko noyotakinpa i amáku, iko in noitakin nobaba kon bayongan in roriganea. Bo iko doman in nonompiamai kon Poti Dodandian i Tuhan.”

ULANGAN 21:22

“Aka intau tobatú ihukumdon minatoi sin nogaidon kon inta moraat, bo mayatnea in binambé kon oigi,

ULANGAN 17:6

Táe sia in tongábí motaau hukumon matoi aka oyúon in sakusi doyowa ande moiḻiu; intau tobatú diábí motaau in hukumon matoi aka tongá tobatú in intau mobaḻí sakusi.

PILIPI 3:19

Intau mita natua in moputúbí, sin tuhan monia in sianbí monia, bo aid monia inta moromú tua duíonbí monia; sin tongábí bonu in dunia naa in umuran raion monia.

AYUB 33:27

Dá kon tayowon in intau moantó sia in moguman, ‘Inta moraat inanggapku mopia, moḷobenbí in dosaku, tongá ki Allah in diábí nohukum kon inakó.’

SURAT I PAULUS KON JAMAAT RUM 5:12

Dosa in sinumuot kon dunia naa nongin intau tobatú, bo nongkon dosa tatua nomuká domandon in popatoi. Akibatnea popatoi tatua in nongawasadon kon bayongan intau, sin bayongan intau in nogaid domandon kon dosa.

SURAT I PAULUS KON JAMAAT RUM 6:16

Bá kotaauan monimu, kon aka moiko bo moposarakan in awakmu kon tobatú intau sin mogaid kon onu inta kinoibognea, yo moiko in mobaḻí bidon ata in intau inta dinuduian monimu tatua. Ata in dosa in modia kon i monimu mayá in popatoi, táe aka ata inta motoindudui kon i Allah yo tua in modiabí kon i monimu mayá in kobiagan.

KORINTUS 2 4:2

Kami in doíbí tongá umuni-uni sin mokooyábí in natua. Bo kami in doíbí mogaid takin gina inta diá motuḻid bo poḷat doman mopotaḷá in singog i Allah. Kami in nogaid kon oaidan i Allah takinbí gina motuḻid ná inta kinoibog-Nea. Tuamai in harapon mako tua, kopiaan in monilai kon i nami.