SURAT I PAULUS KON JAMAAT RUM 12:5 - Alkitab Singog In Mongondow Masa In Tanaa

⁵ Natua doman in kita. Umpaka kita in nobayong, táe kita in tongoawakanbí monag, sin kita ain notobatú kon i Kristus. Bo kita komintan in noyoguputbí in tobatú bo tobatú saḷaku anggota in awak tobatú.

SURAT I PAULUS KON JAMAAT RUM 12:5 Referans Kwoze

KORINTUS 1 12:20

Dá totuu kon nobarongbí in anggota, táe tongábí tongoawakan monag.

KORINTUS 1 10:17

Sin tongábí tobatú in roti, bo kita komintan ain nokaan kon roti tatua. Dá umpaka nobayong in kita, táe tongábí tongoawakan monag.

EPESUS 4:25

Manangka intua Utatku mita, dikadon moibog monguboḷ. Mokopojujurbí aka mobiag, sin kita komintan naa in tumpaḷabí anggota in awak i Kristus.

KOLOSE 2:19

sahingga in diádon kumadai kon i Kristus inta nobaḻí tongguḷu. Kon bonu in pimpinan i Kristus, bayongan in awak iḷukadan bo sinobatú in sendinea mita, poḷat nobiag podudui in ibog i Allah.

EPESUS 5:30

Kinotaauanbí naton intua, sin kita in anggota mita in awak i Kristus.)

KOLOSE 1:24

Tanaa mopiabí in ginaku in mororiga sin kopontinganmu. Sin aka awakku bo mororiga, yo tua in mangaḻenea akuoi nogintompodon kon roriga inta diápa kinorasaan i Kristus, sin kopontingan in jamaat saḷaku awak-Nea.

EPESUS 1:23

Jamaat tua awakbí i Kristus, pinosompurna i Allah inta noposempurna in bayongan yagi-yagi kon ondaka.

KORINTUS 1 10:33

Kobiagdon ná akuoi. Kon soaḷ yagi-yagi, ramujionku totok sinbá mokosanang kon bayongan intau. Bo tua in deemanbí tongá kopontinganku tontaní, táe kopontinganbí in bayongan intau sinbá mosaḷamat in mosia.

SURAT I PAULUS KON JAMAAT RUM 12:4

Awak naton naa in nobayongbí anggotanea. Bo pomuḷoi in anggota tatua oyúonbí oaidan kon batúannea.

EPESUS 5:23

Sin ki buḷoinea ḷoḷaki tua in tongguḷu i buḷoinea, ná ki Kristus inta nobaḻí tongguḷu in jamaat bo Datu doman inta Mopoposaḷamat kon jamaat inta nobaḻídon awak-Nea.

YOHANES 17:11

Akuoi in mamangoidon kon inimu in tanaa. Diá bidon in Akuoi mogutun kon dunia naa, táe mosia in umuranpabí kon dunia naa. Amá inta motusi! Ḷukadaipa in mosia takin kawasa in tangoi-Mu. Tangoi inta ain inogoi-Mu kon i-Nakó – sinbá mosia in motobatúdon ná kitada.

KORINTUS 1 6:15

Kinotaauan bidon monimu uḻe utatku mita, kon awak monimu nion in notobatúbí i Kristus. Dá umpaka yo motaau gamáan in tobonsig bo pakéon mogaid kon inta diá mopia? Tantú diábí motaau!

EPESUS 4:12

Mosia naa in inogoi i Allah sinbá umat i Allah tokotompiaan sinbá mosia in motaau mogaid kon oaidan i Tuhan bo moduḷu moposindog in awak i Kristus.