PETRUS 1 4:8 - Alkitab Singog In Mongondow Masa In Tanaa

⁸ Tongá soaḷ tanaa inta totok in moponting, moiko in musti totu-totuu mositabian tobatú bo tobatú, sin aka moiko bo mositabian dá mangaḻenea kon tua moiko in moibog doman mosiampungan.

PETRUS 1 4:8 Referans Kwoze

AMSAL 10:12

Yaat in gina mokopomuká kon ropatoi; totabian mongampung kon bayongan in taḷá.

KOLOSE 3:14

Naa in soaḷ mita inta totok in moponting: Moiko in musti mototabian sin totabianbí tua in mopotobatú kon i utat komintan sahingga in mobaḻí mosompurna.

AMSAL 17:9

Aka moibog kosanang in intau, ampungai in taḷá inta inaidan monia. Tantú mongonguman kon taḷá tongábí mokobontow kon yoyobayatan.

PETRUS 1 1:22

Popisí in moiko bo umuran dinumudui kon onu inta sinundú i Allah, dá tabidon in nondarit kon i monimu sahingga in totu-totuudon in moiko motabi kon intau mita inta tumpaḷa mopirisaya kon i Kristus. Pogumanku bui, totu-totuudon positabian in moiko kon tobatú bo tobatú takin gina motuḻid.

YAKOBUS 5:20

yo toropdon in tontagá tanaa: Intau inta ain nodia mangoi kon intau tobatú binaradosa bui namangoi kon i Allah, yo intau tatua ain noposaḷamat kon jiwa in intau baradosa tatua nongkon kinopatoiannea bo nokopopisí kon nobarong in dosa inampungan. Horomat nami, Ki Yakobus

KORINTUS 1 13:1

Umpakabí akuoi in nonotaau kon bayongan bahasa, nodapot kon bahasa in malaekat, táe aka diá in tabiku kon tumpaḷa intau, yo singogku mita tatua in tongábí naonda bo dorom inta diá kobonu andeka lonceng inta moḷangon in singognea, táe diá in mangaḻenea.

TESALONIKA 1 3:12

Bo igumon doman mako nami kon i Tuhan bá moiko in umuran mositabian bo oyúon doman in tabi monimu kon tumpaḷa intau, sahingga in tabi monimu in kodugang-kodugangdon ná tabi nami kon i monimu.

IBRANI 13:1

Moiko in musti umuran mositabian saḷaku intau mita in Keresten inta mogutat.

TIMOTIUS 1 1:5

Akuoi in mononggina nanaa sinbá intau kopakéandon in gina modarit motuḻid bo totu-totuudon mopirisaya kon i Tuhan, sahingga in oyúondon in totabian kon tumpaḷa intau.

TESALONIKA 2 1:3

Nobaḻí bidon kowajiban nami mopoyaput in sukur kon i Allah lantaran moiko. Oo patusbí intua aidan nami sin pirisaya monimu kon i Kristus in tantú kodugang-kodugang bo tabi monimu kon tumpaḷa intau in moḷoben domandon.

AMSAL 18:13

Motubag kon dodai in diápa mokidongog in aidbí inta mobodok bo mokooyá.

AMSAL 12:16

Aka intau bodok kosigidan, yo kon dodaipa doman tuata bo potaaunea in nakit in ginanea; táe intau mobijaksana in diábí pandungonneamai aka potaḷáan.

YOHANES 3 1:2

umuran mako mopoigum doa kon i Allah sinbá ki Utat in tantúpa mosehat bo bayongan inta mopia tantúpa doman umuran moyotakinmu, ná doman ginamu inta umuran mopia.

YAKOBUS 5:12

Naa in soaḷ inta totok moponting: Donaai mongibot, pinomayá podoyon kon ḷangit ande podoyon kon butá, andeka podoyon kon onukadon. Pogumandon “Oo” aka totuu oo, bo pogumandon “Diá” aka diá, sinbá diá in moiko popoḷabúan i Allah in hukuman.

KORINTUS 1 13:4

Intau inta motabi kon tumpaḷa intau, monahangbí kon yagi-yagi bo mopia in gina. Diá in porasaan mointoi, diá kumaḷakuang bo diá doman mododia.