NEHEMIA 9:35 - Alkitab Singog In Mongondow Masa In Tanaa

³⁵ Inogoi-Mu in datu mita inta momarenta kon umat-Mu, naonda in mosia nogutun kon butá inta mobanat bo mopia inta inogoi-Mu. Tongá diábí in mosia nonaḷámai kon kobobiag inta moraat, doí mogundoi kon ini-Mu poḷat moibada.

NEHEMIA 9:35 Referans Kwoze

ULANGAN 28:47

Moiko aindon binarakatan i Tuhan Allahmu kon bayongan yagi-yagi, táe doí mogundoi kon i-Nia takin gina motuḻid bo moḷunganga.

YEREMIA 5:19

Táe aka mosia in moḻibó mongo nongonu sin Akuoi in nopoaidbí intua komintan kon i monia yo pogumandon ei Yeremia kon ná doman mosia in nonaḷá kon i-Nakó kon butá monia tontaní sin mogundoi kon dewa mita in bangusa ibanea, yo natua doman mosia in mobaḻí ata in intau ango-angoi kon butá ibanea.”

NEHEMIA 9:25

Umat-Mu nogagow kon benteng mita poḷoḷukadan, butá inta mopia bo baḷoi inta nopuḻing in kaoyúonan. Parigí mita bo bokaká mita in tubig ginamá monia, gobá in anggur, pangkoi in zaitun bo ayop mita ibanea. Iḷumongow in mosia sin mongaan kinooibogbí in gina. Bayongan in mopia inta inogoi-Mu pinaké monia.

ULANGAN 31:21

Bo mobayong in bodito motoyang in moiuma kon i monia. Táe dondong tanaa umuranbí podondong bo pakéon mobaḻí tomponiata kon i monia. Modapot in tanaa kon dodai in mosia diápa diaan-Ku kon butá inta pinodandi-Ku, kinotaauan-Kubí in raian monia.”

NEHEMIA 9:34

Mogoguyang nami, datu, imang bo guhanga mita in ḻipú, iḻimimpat kon hukum-Mu bo diá nopandungmai. Bayongan in parenta bo toboḷow inta inogoi-Mu, diábí inindoianneamai, diá doman inindongogan.

YESAYA 63:7

Akuoi in mopohabar in tabi i Tuhan bo modayow kon i-Nia sin bayongan in aid-Nea. Binarakatan-Nea totok in umat-Nea, sin Sia in nonotabi bo tabi-Nea in diábí moobo-obot.

ULANGAN 28:48

Tuamai moiko musti mogundoi kon musung mita inta pinoangoi i Tuhan sin moḷawang kon i monimu. Moiko in aputondon in gogoy, yogang bo mopilang bo diá koonu bo onu. Ki Tuhan in mondorot totok kon i monimu modapot in moiko moyopú.

YEHEZKIEL 5:6

Táe Yerusalem ain nondoí kon parenta-Ku bo noniata magí noiḻiudon kon kororaat in bangusa mita ibanea, nodapot in noiḻiudon in diá kototoinduduinea kon negara mita inta kon ḻibuneamai. Yerusalem iḻimimpat kon parenta-Ku mita bo doí dumudui kon hukum-Ku mita.”