MOHOHUTUBA 7:29 - Alkitab Singog In Mongondow Masa In Tanaa

²⁹ Tongábí naa in nouḻíku: Pinomia i Allah in kita diá noiḻiu bo biasabímai. Táe kitabí tontaní in mopororigamai bo mopoyagi-yagimai.

MOHOHUTUBA 7:29 Referans Kwoze

YEREMIA 4:22

Ki Tuhan in noguman, “Mobodok totok in umat-Ku tatua, mosia in diábí nonotaau kon i-Nakó. Mosia in naonda bo mongoadí mita inta pamandot diábí in topiḻikmai in pomomangaḻe; mopandoi in mogaid kon inta moraat, diá mokoaid kon inta mopia.”

TITUS 3:3

Sin koḻipod in kita tontaní in nobodokbí doman, diá noitutui bo diá motoindudui. Kita sinonggata in norupa-rupamai in ibog in awak naa ande in dunia naa; kita in noyobiag takin niat mita inta moraat, tantú mointoi bo mososaturuan.

KINOBAḺIAN 5:1

Naadon in buí mita i Adam. [Kon tungkuḷ in ki Allah nomia kon intau, pinomia-Nea in mosia notombatangan-Nea tontaní.

MAZMUR 106:39

Popisí in aid mita monia tatua dá mosia in nonajisdon, bo diá notoḷutui kon i Allah.

MAZMUR 106:29

Aid tatua in nokopomuká kon torú i Tuhan, dá mosia in inangoi in yampoi inta mokokoningkim.

MAZMUR 99:8

O Tuhan Allah nami, Iko in notubag kon umat-Mu; aka kon i monia yo Iko in ki Allah inta moibog mongampung, umpaka mosia ihukum-Mu popisí in taḷá monia.

MOHOHUTUBA 8:1

Totuu mosanang in intau mobijaksana. Kotaauannea in tubag in bayongan pelekara. Pandoi nokopomomi kon inia sin pia in gina, dá pogotnea in umuranbí motarimbuka.

YEHEZKIEL 28:15

Oaidmu in nosompurna pinangkoi iko binaḻí nodapot in iko nomangkoi nogaid kon moraat.