MOHOHUTUBA 6:8 - Alkitab Singog In Mongondow Masa In Tanaa

⁸ Dá onu in kauntungan in intau moarip aka poyotongkaionmai in intau nobodok? Onu doman in mangaḻenea intau nobogá bo mopia in kon sigad in intau mobarong?

MOHOHUTUBA 6:8 Referans Kwoze

AMSAL 19:1

Maníka bo intau bogá inta motuḻid in kobobiagnea, dika in intau bodok inta moibog monguboḷ.

TIMOTIUS 1 6:17

Ponoropdon kon intau mita inta nobiag nooyúon, bá mosia in diá dumodia bo diá mopodoyon in kobiagan monia kon barang mita inta modai-daitbí, ná kaoyúonan in dunia naa. Mosia in mustibí mopodoyon in kobiagan monia kon i Allah inta ain nobogoi in bayongan yagi-yagi kon i naton inta diádon koiapan in kobayongnea, inta pakéonmai naton muḷoi in singgai.

LUKAS 1:6

Kobobiag inayadua motonibuḷoi tua mokosanang kon gina i Allah, sin taya dua in umuranbí dinumudui kon parenta bo atorang i Tuhan, diábí in sinaḻiban monia.

MOHOHUTUBA 5:11

Intau mogogaid modapotbí doman in diá tugat in kaanonnea, táe mokosiugbí doman in sia modapot in moḷoḷot totok. Noyoḷuandon kon tua, intau inta nooyúon kapunyaannea mobayong totok, dá diá in sia mokosiug sin moḻia-ḻiaw in gina.

MAZMUR 116:9

Dá akuoi in nobiagdon kon dunia naa, kon bonu in kawasa i Tuhan.

MAZMUR 101:2

Akuoi in monaridi kon kobobiag inta diá in bogit. Moibog degá in Iko mamangoi kon inakó? Akuoi in moibog mobiag motusi kon baḷoiku,

KINOBAḺIAN 17:1

Kon tungkuḷ in ki Abram umur siow nopuḷú bo siow notaong, ki Tuhan nokipogontong kon inia bo poḷat noguman, “Akuoi in ki Allah Inta Totok in Mokawasa. Kobiagdon kon tayowon-Ku takin kodu-kodudui kon onu inta kinoibog-Ku.

MOHOHUTUBA 6:9

Tua komintan in diábí in mangaḻenea naonda bo mogaḷow kon tompot. Maníka bo moorop in ibog naton kon onu inta oyúon kon i naton bo dika in tantú moibog sinbá modugang mooyúon.