MOHOHUTUBA 6:2 - Alkitab Singog In Mongondow Masa In Tanaa

² Moiḷanuimai ogoian i Allah in kaoyúonan, kahoromatan bo kapunyaan kon intau tobatú, modapot in diádon in koibognea. Táe diá inogoian i Allah in wakutu in sia mopomaké in bayongan inta inogoi tatua. Tompobuinea, intau inta diá kinotaauan-Nea mopomaké in kaoyúonan tatua. Dá tua komintan diá in mangaḻenea bo mokonakit kon gina.

MOHOHUTUBA 6:2 Referans Kwoze

MOHOHUTUBA 5:19

Ki Allah in nongawasa kon gina in intau tatua pinongin ḷunganga in gina, dá diábí in sia moḻia-ḻiaw in gina in morai kon kobiagannea inta mopoḷok naa.

MAZMUR 17:14

Poḷuatdon in akuoi nongkon intau mita inta nosipun kon kapunyaan kon dunia. Hukumdon in mosia in bodito inta ain sinadia-Mu kon i monia. Pomayádon mako in ki adí bo ki ompu monia hukumon doman.

MAZMUR 73:7

Nongkon gina monia moiḷuai in moraat; mosia in tongábí tantú morai kon tomayá mita moraat.

DATU MITA IMITÁNEA 3:13

Nodapot in onu inta diá inigummu yo ogoi-Kubí doman kon inimu: kino ouput in kobiaganmu iko in mobiagdon mooyúon bo horomaton moiḻiu kon datu ibanea inta kon ondakabí.

OMBAḶ 5:2

Kapunyaan budel nami in noiḷabú kon ḻima in intau ibanea, baḷoi mita nami in inutunan in intau ango-angoi.

MAZMUR 39:6

Totuu mopoḷok in kobiaganku inta sinantú-Mu! Aka kon ini-Mu wakutu kinobiaganku diábí in mangaḻenea. Totuu, intau naa in tongábí naonda bo poginaan,

HOSEA 7:9

Mosia in diábí nonotaau kon popisíbí in yopakat takin bangusa mita tatuata, dá noinggamádon in ropot monia. Imbuit in ouman monia in nodiugdon, táe diábí kinotaauan monia.

DANIEL 5:18

Ki Allah Inta Totok in moḷantud nomaḻí kon i Nebukadnezar ki amá i Tuangku nobaḻí datu moḷantud bo nobogoi kon inia in koḷoḷoben bo ponango-nangoian.

MOHOHUTUBA 5:16

Kon dodai in mobiagpa, kita in mongokap kon sindip, mosusa in kita, moḻia-ḻiaw, moyaat bo monampot in gina.

MOHOHUTUBA 4:8

Oyúon in intau nobiag sia-sia mita diá kogadí, andeka diá kogutat. Umpaka natua, sia in umuran simiḷopí bo ginanea diá kon dodai in onda moorop in ibog in kapunyaannea. Kon i inebí in inta siniḷopíannea bo doí kon kasanangan? Tua in diá doman in mangaḻenea, bo kobobiag inta mororiga.

MOHOHUTUBA 4:4

Kinotaauanku doman kon intau in totokbí in moḷongasi mogaid, tongá popisí in mointoi in mokoontong kon bungai in siniḷopían in topodiugnea. Tua komintan diá in mangaḻenea naonda bo moḷongasi modomok kon tompot.

TAWARIKH 2 1:11

Tubag i Allah kon i Salomo, “Onu inta inigummu tua in mopiabí totok. Iko in diábí noigum kon kaoyúonan andeka kapunyaan andeka ponango-nangoian andeka kopatoian in musungmu mita andeka moumur in kobiaganmu tontaní, táe kabijaksanaanbí bo pongotahuan momarenta kon umat-Ku inta pinoki ḷukad-Ku kon inimu.

TAWARIKH 1 29:28

Nooyúon in sia bo ihoromat bo minatoi kon dodai in nogoguyangdon. Ki Salomo ki adínea ḷoḷaki in nobaḻí datu nomaḷui kon inia.

TAWARIKH 1 29:25

Binaḻí i Tuhan in bayongan rayat noibog kon i Datu Salomo bo binaḻí-Nea datu inta motoya-toyang nongkon datu nongkon ondaka inta nokoimontandon nomarenta kon Israel.

ULANGAN 28:43

Intau ango-angoi inta nogutun kon butámu in modugangdon in kawasa monia, bo kawasamu tontaní in kogaat-kogaatdon.

ULANGAN 28:33

Bangusa ango-angoi in mogamádon kon bayongan bungai in boyómu inta nouḻí monimu takin iyumoyiga in nogaid, táe moiko tontaní in diábí mokouḻí kon onu bo onu koḻikudbí in umuran tonggataan bo popoaidan monia in aid moraat.

MOHOHUTUBA 5:13

Táe kapunyaan tatua nobuḻi popisí in roriga, dá diábí in motaau ogoi kon i adínea mita.

YESAYA 55:2

Onubí in mangaḻenea in motaḷui kon onuka inta diá mokoguḻí kon ibog, bo mogaid kon onu inta diá mokobotug? Duduiaidon in parenta-Ku dá moiko in mokaanbí kon inta mopia, bo mokaan kon kaanon inta mopia in nanamnea.

MOHOHUTUBA 5:18

Aka intau tobatú motarima kon kaoyúonan bo kapunyaan nongkon i Allah, bo sia in inogoian in wakutu mopomaké in kaoyúonan tatua, mustibí in sia moibog mosukur bo mopomaké in bayongan inta siniḷopíannea. Tua in ki Allahbí doman in nobogoi.