MIKHA 6:8 - Alkitab Singog In Mongondow Masa In Tanaa

⁸ Diá! Ki Tuhan in noponiatadon kon i naton onu inta mopia. Igum-Nea kon i naton in tongábí mopoaid in inta moadil, umuran moponiata in totabian, bo takin ompá in gina mobiag motobatú takin i Allah naton.

MIKHA 6:8 Referans Kwoze

AMSAL 21:3

Oaid inta moadil bo mobanar in mokosanang totok kon gina i Tuhan moiḻiu kon bayongan in sosumba.

KOLOSE 3:12

Utat mita, moiko nion in umatbí i Allah inta ain sinotabi bo piniḻí-Nea mobaḻí kapunyaan-Nea tontaní. Tuamai in musti popoontong doman monimu in totabian, pia in gina, diá motosiḷantud, pososingog moaḷus bo mobahasa kon tumpaḷa intau bo mosabar aka koantugan in roriga.

YEREMIA 22:3

“Pokoadildon bo pokojujur. Poḷuatdon nongkon kawasa in inta monondorot in intau inta dinorot. Dika mondorot andeka mopoaid in moraat kon intau ango-angoi, adí uno-unon, andeka boba-bobay. Dika moḻimod kon intau inta diá kotaḷá kon tampat tanaa.

HOSEA 6:6

Ibogon-Ku totok in moiko totokdon in monotaau kon i-Nakó bo umuran motabi kon i-Nakó, dika in motubá in moiko bo moposumba in kuruban kon i-Nakó.

SAMUEL 1 15:22

Táe ki Samuel in noguman, “Onda degá in koibog i Tuhan, kotoindudui andeka kuruban sosumba? Kotoinduduibí kon i Tuhan in mopia-pia nongkon moposumba in kuruban. Dumuduibí kon parenta-Nea in mopia-pia nongkon ḷongó in domba.

YESAYA 66:2

Dunia naa in ḻima-Ku tontaní in nomia, dá tua komintan in pinomia. Táe koibog-Ku in intau inta moompá in dodia, inta nomanasaḷ in nogaid kon dosanea mita, inta moondok bo inta motoindudui kon i-Nakó.

PETRUS 1 3:8

Naa in kasimpulannea: utat mita poramuji mobiag motobatú kon tosingogon bo porasaan. Moiko in musti umuran mositabian ná doyowa mogutat. Moiko in musti doman mosituḷungan bo mokopoompá kon dodia.

LUKAS 6:36

Musti potonop monimu kon gina in totabi kon tumpaḷa intau ná ki Amámu nopuḻing doman in totabi kon intau!”

LUKAS 11:42

Koboditodon in moiko intau mita in Parisi, sin pododungú mita, pogamaan monimu kon mopuḷú noporsen sin posukur, táe oaid mita moadil bo tabi kon i Allah in iḻiongdon monimu. Aka mogaid kon tobatú, yo ibanea in dikabí koḻiongan.

AMOS 5:24

Mopia-piabí kon poḷongasi sinbá kooadil in moiḻig naonda bo tubig, bo kojojujur naonda bo ongkag inta diá moingka-ingkag.

MATIUS 5:7

Pia in kamang in intau inta mopia in gina; sin mosia i motarima doman kon kopopia i Allah.

EPESUS 4:32

Táe mokopopia kon gina kon tumpaḷa intau, bo moiko in musti domandon mototabian, bo mosiampungan naonda bo ki Allah inta ain nongampung kon i monimu pinongin i Kristus.

KINOBAḺIAN 18:19

Sia ain piniḻí-Ku sinbá motundú kon i adínea mita bo kon buínea sinbá motoindudui kon i-Nakó bo mogaid kon onu inta mopia bo moadil. Aka soaḷ tatua aidan monia, yo bayongan in dandi-Ku kon i Abraham in intompodan-Ku.”

MOHOHUTUBA 12:13

Naonda intua komintan irai-raikumai, naa in imbuit in tosingogon inta nouḻíku. Kotoguondok kon i Allah bo duduiai in bayongan parenta-Nea, sin tuabí in mangaḻe pinomaḻían-Nea kon intau.

HOSEA 12:6

Ki Allah tua in ki Tuhan Inta Totok in Mokawasa. Tangoinea in ki Tuhan. Pinongin tangoi tatuata ibogon-Nea intau moibada kon i-Nia.

YESAYA 57:15

Sin nanaa in guman i Allah, Inta Totok in moḷantud bo mokudus, inta nongawasa modapot in mononoi, “Akuoi in nogutun kon tampat inta moḷantud bo inta motusi, táe kon yua-yuakbí doman in intau mita inta moompá in dodia bo inta nomanasaḷ in nogaid kon dosanea mita, sin mopoguḻí bui kon ibog bo kamang monia.

MATIUS 5:3

“Pia in kamang in intau inta nobogá kon tayowon i Allah, sin mosia tua inta mobaḻí umat i Allah.

ZEPANYA 2:3

Angoidon bui kon i Tuhan, ei bayongan intau inta moompá in dodia kon butá tanaa, bo bayongan in intau inta dinumudui kon parenta-Nea mita. Pogaidon kon onu inta kinoibog i Tuhan, bo pokoompádon kon dodia kon tayowon-Nea. Dika-dika bo iko in moisimparut nongkon hukuman kon singgai ki Tuhan mopoontong in torú-Nea.

DANIEL 4:37

Dá tanaa in akuoi, ki Nebukadnezar modayow, mopoḷantud bo mopomulia kon i Datu in Soroga. Bayongan in oaidan-Nea in moitutui bo moadil, bo Sia in mokopotungkudbí kon intau mita inta moḷoḷatú.

MAZMUR 37:26

Sia in umuranbí mopoḷuan bo mobogoi, bo ki adínea mita in nobaḻí barakat kon inia.

NEHEMIA 9:13

Nongkon ḷangit noponag in Iko kon tudu in Buḷud in Sinai, bo nongonguman in Iko takin umat-Mu tontaní. Inogoian-Mu in hukum, atorang bo parenta inta moadil, mobanar bo oyúon in mangaḻenea.

MAZMUR 112:4

Bayag in monindar kon bonu in sindip kon intau mita inta mojujur, kon intau inta moadil, inta motabi bo mopia in gina.

OMBAḶ 3:26

Dá, biódon mako mogoḷat in kita takin gina moodom modapot in ki Tuhan mamangoi motuḷung;

MAZMUR 112:9

Sia in mosila-silaibí mako kon kapunyaannea, bo mobogoi in oogoi kon intau nobogá; sia in umuranbí mogaid kon inta mopia, tuamai in sia nongawasa bo ihoromat.

MAZMUR 73:28

Táe aka kon inakó yo totuubí kon mopia in kon diug i Allah, Tuhan Allah in baḻíonku pononiunganku, sinbá motaau in akuoi mopotaa-taau mako in bayongan inta inaidan-Nea.

TAWARIKH 2 34:27

iko in nomanasaḷ bo sinumonsiup kon tayowon-Ku. Akuoi in nogumandon kon Yerusalem bo intau mita inta nogutun kon tua, táe naonda in iko nokodongog kon onu inta pinotaau-Ku tatua nongombaḷ in iko bo nomerak kon ḷambungmu nobaḻí tomponuot kon morobonoḷ in dodobmu. Dinongog-Kudon in sambayangmu,

YAKOBUS 2:20

Mobodok totok in moiko! Degá paraḷupa poontong kon i monimu kon diábí in mangaḻenea aka pirisaya diá poyotakinon in oaid?

SURAT I PAULUS KON JAMAAT RUM 7:16

Dá aka akuoi bo mogaid kon onu inta kinodoíku tua, yo tua in mangaḻenea, akúonkubí kon hukum agama Yahudi in mopiabí.

TAWARIKH 2 32:26

Táe imbuitnea ki Hizkia bo intau mita in Yerusalem sinumonsiupdon, dá kon bonu in ki Hizkia nobiagpa yo hukuman tatua in diábí pinopouma.

SAMUEL 1 12:23

Soaḷ akuoi, poigumon mako akuoi in diá modapot in mogaid kon dosa kon i Tuhan sin diádon nosambayang kon kopontingan monimu. Táe akuoi in umuranbí motundú kon inimu kon soaḷ mita inta mopia bo inta noitutui.

SURAT I PAULUS KON JAMAAT RUM 9:20

Táe, Utat! Iko in tongábí intau ilo-ilow, bo iko in diábí mokobaḻí momayow kon i Allah! Pot in bungang motaau degá in moḻibó kon intau inta nomia kon inia, “Nongonu sin inaidanmubí nanaa in akuoi?”

LUKAS 10:42

Bá poguman-Ku kon inimu kon tongábí tobatú in totok moponting. Ki Maria ain nomiḻí kon inta mopia, inta diábí bui gamáan kon inia.”

YEHEZKIEL 16:63

Ampungan-Kubí in bayongan in taḷámu, táe diábí koḻionganmu intua bo angoianbí in oyá in moguman kon onu bo onu in iko. Akuoi ki Tuhan Inta Totok in moḷantud ain nosingog.”

TAWARIKH 2 33:23

Táe noyoposi i amánea, ki Amon in diábí sinumonsiup bo diá doman nobui mangoi kon i Tuhan; nodapotbí in sia in binara-baradosa nongkon i amánea.

TESALONIKA 2 2:16

Poigumon mako ki Yesus Kristus Tuhan naton bo ki Allah ki Amá naton in umuran mopoonow bo moginrigon kon gina monimu, sinbá motaau in moiko mogaid bo mopohabar kon onu inta mopia. Motabibí in ki Allah kon i naton, bo lantaran Sia in mopia dá pinomia-Nea in kita umuran mosabar bo moharap mako kon inta mopia.

KINOBAḺIAN 5:22

Onda intua ki Henokh in nobiag notobatú takin i Allah kon bonu in toḷu nogatut notaong. Sia in nokouḻí kon adí ḷoḷaki mita ibanea

IMAMAT 26:41

dá iḷawang-Ku domandon in mosia bo inuntun-Ku pinobayá in tampat pinoḷumbúan kon butá in musung mita monia. Pangabisannea, aka buímu mita moitungkudon bo dinumuduidon kon hukuman popisí in dosa bo pinomarontakan monia,

TAWARIKH 2 33:19

Kon bonu in buk Ouman in Nabi mita pinais domandon in sambayang i Manasye bo tubag i Allah kon sambayang tatua, bo ouman in dosanea mita kon dodai in sia diápa nogogai in nogaid kon dosa, tampat mita pososumbaan kon berhala bo patong mita i Dewi Asyera inta pinomianea, bo berhala mita inta sinumbanea.

KORINTUS 1 7:16

Sin moiko utat saḷaku buḷoi bobay – inta ain nopirisaya kon i Kristus ki Tuhan naton – naondabí in kototaau monimu, kon diá mokosaḷamat in iko kon i buḷoimu ḷoḷaki? Natua doman in iko buḷoi ḷoḷaki inta nopirisayadon kon i Yesus, naondabí in kototaau monimu kon iko in diá mokosaḷamat kon i buḷoimu bobay?

TAWARIKH 2 30:11

Táe, oyúon doman in intau mita nongkon suku i Asyer, i Manasye bo i Zebulon in noibog namangoi in Yerusalem.

LUKAS 12:14

Táe ki Yesus noguman kon inia, “Utat, ki ine in nopobaḻí kon i-Nakó hakim andeka mononigad kon i monimu mosilai kon kapunyaan inta sinaḷaan in guyanga monimu kon i monimu?”

ULANGAN 30:15

Singgai naa moiko in motaau bidon momiḻí kon inta mopia ande inta moraat, mobiag ande matoi.

YESAYA 56:1

Ki Tuhan in noguman kon umat-Nea, “Aidaidon onu inta moadil bo inta noyotombutung in hukum-Ku. Sin topiḻikpa bo Akuoi in mamangoi moposaḷamat kon i monimu bo koadilan-Ku in poniata.

YEHEZKIEL 33:14

Akuoi in nopotoingatdon kon intau inta moraat kon sia in matoibí. Táe aka mogogai in sia in mogaid kon dosa bo momangkoidon mogaid kon onu inta mopia bo moitutui, ná mopobui in pakakat inta pinogade in intau, andeka pakakat inta ain sinakownea bo dumuduidon kon hukum mita inta mokopoangoi kon kobiagan, dá diábí in sia matoi.

MIKHA 6:9

Totuubí kon mobijaksana aka motoguondok kon i Tuhan. Sia in nomaḷú kon intau inta nogutun kon kotá, “Indongogaika, ei moiko inta noyosipun kon kotá!

ZAKHARIA 7:9

“Kon taong mita inta ain noitaḻib inogoi-Ku in parenta tanaa kon umat-Ku, ‘Moiko in mustibí mokopoadil, kototabi bo mopia in gina kon tumpaḷa intau.

ULANGAN 27:10

Tuamai duduiaidon in ki Tuhan Allahmu bo aidaidon in bayongan parenta-Nea inta pinotaauku kon inimu singgai naa.”

YOSUA 24:14

“Dá, tanaa,” ki Yosua noguman doman nanaa, “horomatonbí in ki Tuhan. Pogundoidon kon i-Nia takin gina motuḻid bo mosatia. Ḷumbúdon in toḻindua in Tuhan inta sinumba in mogoguyangmu koḻipod kon Mesopotamia bo Mesir. Tongádon ki Tuhan in pogundoian.

MAZMUR 101:1

Mazmur i Daud. Akuoi in moibog mopodondong in kososatia bo kooadil, kon ini-Mu, o Tuhan, dondong dodayowku!

YEREMIA 9:23

Ki Tuhan in noguman, “Intau mobijaksana in diábí motaau in moyunggagá popisí in kobobijaksananea, intau moropot popisí in ropotnea, bo intau nooyúon popisí in kaoyúonannea.