MIKHA 6:4 - Alkitab Singog In Mongondow Masa In Tanaa

⁴ Moiko in dinia-Kudon iḻumuai nongkon Mesir, bo pinoḷuat-Kudon nongkon pinononggataan; Akuoi in nopotabádon kon i Musa, kon i Harun, bo kon i Miryam sin modia kon i monimu.

MIKHA 6:4 Referans Kwoze

ULANGAN 7:8

Táe ki Tuhan nomiḻí kon i monimu sin motabi in Sia kon i monimu bo mogintompod kon dandi inta pinomia-Nea takin mogoguyangmu. Tuamai in noposaḷamat in Sia kon i monimu takin kawasa inta moḷoben bo nopoḷuat kon i monimu nongkon kawasa i datu in Mesir.

IḶUAIAN 12:51

Kon singgai tatua ki Tuhan nodia kon bayongan umat Israel iḻumuai nongkon Mesir.

AMOS 2:10

Moiko in dinia-Kudon iḻumuai nongkon Mesir, bo dinia-Ku nongin rawang in bungaion opat nopuḷú notaong in koonggotnea. Butá in intau in Amori ain inogoi-Ku kon inimu nobaḻí butámu tontaní.

YEREMIA 32:21

Pinongin kawasa bo ropot-Mu inta moḷoben Iko in nodia kon umat in Israel iḻumuai nongkon Mesir. Iko in nogaid kon inta mujizat mita bo inta mokoherang bo aid mita inta mokodoḻiok kon musung.

SAMUEL 2 7:23

Kon dunia naa in diábí in bangusa ná Israel. Tongábí Israel tuata in bangusa inta ain pinoḷuat-Mu nongkon pinononggataan sin mobaḻí umat-Mu tontaní. Bayongan in aid moḷoben bo inta mokoherang inta pinomia-Mu kon i monia, mopobaḻí kon tangoi-Mu ponango-nangoian kon dunia. Bangusa mita ibanea takin dewa mita monia aindon inuntun-Mu kon tungkuḷ in umat-Mu minayá noparang.

PINOGIAPAN 12:1

Ki Musa notonibuḷoi in bobay intau in Kus tobatú, bo soaḷ tatua binaḻí dodoyonan i Miryam bo i Harun noningkuḻe kon i Musa.

IḶUAIAN 20:2

“Akuoi naa in ki Tuhan Allahmu inta nopoḷuai kon i monimu nongkon Mesir tampat inta pinononggataan kon i monimu.

OUMAN IN RASUL MITA 7:36

Ki Musabí tuata inta nodia kon bangusa in Israel iḻumuai nongkon Mesir takin nogaid kon soaḷ mita inta totok in mokoherang bo soaḷ mita inta diá in poḻiuan kon Mesir, bo kon Dagat Nopuya bo kon padang gurun kon bonu in opat nopuḷú notaong.

MAZMUR 77:20

Iko in mayá nongin bokoḷ, iḷumoḷan kon dagat, táe ḻiod-Mu diá koontongan.

ULANGAN 24:18

Toropdon kon moiko in nokoimontandon nobaḻí ata kon Mesir bo pinoḷuai i Tuhan Allahmu; tuamai in akuoi mobogoi in atorang tanaa kon inimu.

ULANGAN 15:15

Toropdon kon moiko in koḻipod in atabí doman kon Mesir bo pinoḷuatdon i Tuhan Allahmu; tuamai in ogoiku in parenta tanaa kon inimu.

ULANGAN 9:26

bo nosambayang nanaa: O Tuhan Inta Totok in Moḷantud, dikadon yopúon in umat kapunyaan-Mu tanaa, bangusa inta pinoḷuat-Mudon bo dinia-Mu iḻumuai nongkon Mesir takin ropot bo kawasa-Mu inta moḷoben.

ULANGAN 5:6

‘Akuoi in ki Tuhan Allahmu inta nodia kon i monimu iḻumuai nongkon Mesir, tampat inta pinononggataan kon i monimu.

ULANGAN 4:34

Dodai in onda in oyúon in ilah tobatú inta nobarani nogamá kon bangusa tobatú nongkon bangusa mita inta oyúon bodongka binaḻí umatnea tontaní, ná inta inaidan i Tuhan Allahmu kon inimu kon Mesir? Inontongdon monimu tontaní naonda in ki Allah takin ropot inta moḷoben nopoangoi in bodito bo parang, nomia kon inta mokoherang mita bo nomia kon soaḷ mita inta motoyang totok.

IḶUAIAN 4:16

Sia in mustibí mosingog podoyon kon tangoimu kon tayowon in umat. Sia in mobaḻí tondoḷ in bibigmu bo iko inanggapnea naonda bo ki Allah inta moguman kon onu inta musti singogonnea.

ULANGAN 4:20

Táe moiko in bangusa inta pinosaḷamat-Nea nongkon Mesir, tampat inta kinororigaan totok monimu. Moiko in dinia-Nea iḻumuai nongkon butá tatua, sinbá mobaḻí bangusa-Nea tontaní ná kaadaanmu tanaa mako.

IḶUAIAN 3:10

Tanaa iko in potabá-Kudon mayá kon tayowon i datu in Mesir sinbá iko in motaau modia kon bangusa-Ku ḷumuai nongkon butá tatua.”

IḶUAIAN 4:10

Táe ki Musa in noguman, “O, Tuhan, akuoi naa intaubí inta diá motoḻindat in mosingog, koḻipod ande masai naa, naonda in ki Tuhan nosingog kon inakó. Mobogat in diláku, moḷaḷoi bo diá motoḻindat.”

PINOGIAPAN 33:1

Naonda in bangusa Israel nonaḷámai kon Mesir, kon pipidan podudui in suku bangusa monia kon bonu in tongganut i Musa bo i Harun, mosia nongandu-ngandup mako kon tongonumai in tampat.

SAMUEL 1 12:6

Bo ki Samuel in noguman bui, “Ki Tuhanbí inta ain nomiḻí kon i Musa bo kon i Harun, bo inta nodia kon mogoguyang monimu iḻumuai nongkon Mesir.

IḶUAIAN 6:27

Tungkuḷ in ki Tuhan noyosingog i Musa kon Mesir,