MIKHA 5:11 - Alkitab Singog In Mongondow Masa In Tanaa

¹¹ Ajimatmu mita inggamáan-Kudon bo bayongan in mononoḻindapmu posíon-Ku.

MIKHA 5:11 Referans Kwoze

ZAKHARIA 4:6

Malaekat tatua in nopotabá kon inakó mopotaau kon i Zerubabel in koyow i Tuhan tanaa, “Deemanbí pinodoyon kon ropot in tontara bo deemanbí doman pinodoyon kon ropotmu tontaní iko in mountung, táe noidoyonbí kon roho-Ku.

AMOS 5:9

Sia in noyopú kon intau inta nongawasa takin pinoḷukadan monia.

HOSEA 10:14

dá rayatmu in dapangon in parang, bo bayongan in dindingmu in rimumudon. Kaadaannea in naonda bo kon singgai ki Datu Salman noyompat kon kotá in Bet-Arbel kon pinoparangan, bo noḻintog kon guyanga mita bobay takin ki adí mita monia.

YEHEZKIEL 38:11

Iko in monantúdon kon monubu kon butá inta diá dininding tatua, inta intaunea mita nogutun takin pia-pia mako bo notompia kon kotá mita inta diá dininding bo diá doman in pakakat mita in parang.

YESAYA 6:11

Akuoi in noḻibó, “Dapot in toonu in kaadaan tanaa, Tuhan?” Tubag-Nea, “Modapot in kotá mita mogoguyaatdon bo diádon in mogogutunnea, baḷoi mita diádon inutunan, bo butá in diádon in bonunea bo moḷogatdon,

YESAYA 1:7

Ḻipúmu ain iyompat; kotámu mita in nodaitdon sinurub. Koonto-ontongmu in intau ango-angoi mogamá kon butámu bo morimumud kon bayongan yagi-yagi.

OMBAḶ 2:2

Bayongan in rawang in bonok kon butá in Yohuda, irimumud-Nea takin diá in tabi. Kon bonu in torú-Nea dinangatan-Nea nodapot in noumpag in dinding mita inta nogoḻingoi kon butá tatua. Dodatuan tatua takin itoinea mita iḷabú-Nea nodapot in mokooyádon.

YESAYA 2:6

O Allah, Iko in nonaḷádon kon umat-Mu, buí i Yakub! Sin kon ondakabí kon butá tanaa intau in mopomaké in ilimu sinotaau monia inta nongkon pomukaan bo nongkon Pilistin. Intau mita dumudui kon adat in intau ibanea.

YESAYA 27:9

Táe dosa mita in Israel in tongábí motaau ampungan aka mezbah in dewa mita giḻingon koyimokon naonda bo silon. Bayongan in pototubáan kon dupa bo lambang i Dewi Asyera in rimumudon doman.