MAZMUR 79:9 - Alkitab Singog In Mongondow Masa In Tanaa

⁹ Tuḷungaipa kaasí in kami o Allah, mopoposaḷamat nami, ampungaipa in dosa mita nami bo poḷuatdon in kami podoyon kon kahoromatan-Mu tontaní.

MAZMUR 79:9 Referans Kwoze

YEREMIA 14:7

Umat-Ku nokuani, ‘Tuhan, umpaka dosa nami mopotaḷá kon i nami tongá tuḷungaipa in kami podudui in dandi-Mu Iko in nopobui-buimaidon in sinaḷáan nami; totuu, kami in binaradosa kon ini-Mu.

MAZMUR 25:11

Tuhan, ampungaidon in akuoi podudui in dandi-Mu, sin moḷobendon in taḷáku.

TAWARIKH 2 14:11

Bo ki Asa in nosambayang kon i Tuhan Allahnea, “Tuhan, tongábí Iko in mokobantung kon inta moyangkó monayow kon inta moropot. Tuḷungaipa in kami in tanaa, o Tuhan Allah nami! Tongábí iko in andoḷan nami bo podoyon kon tangoi-Mu kami in ḷumuai moparang monayow kon tontara inta mobarong totok naa. Tuhan, Ikobí in ki Allah nami. Dikabí pomayá mako Iko taḷowon in intau tobatú.”

YEHEZKIEL 20:14

Táe diábí inaidan-Ku intua popisí in moḷukad kon tangoi-Ku, sinbá tangoi-Ku diá singkuḻeon in bangusa mita inta nokoontong kon i-Nakó nodia kon Israel iḻumuai nongkon Mesir.

YEREMIA 14:21

Toropdon in dandi-Mu, dika kaasí poompáan-Mumai in kami; dodandian-Mu takin inami dikabí inggamáan-Mu. Yerusalem in tampat pomomarentaan-Mu inta momulia, dika kaasí poompáan-Mumai.

YESAYA 48:9

Sinagú-Ku in torú-Ku sinbá tangoi-Ku in popotaau. Pinondam-Ku intua kon inimu sinbá iko in diá yopúon.

DANIEL 9:19

Tuhan, indongogaipa kaasí in kami, ampungaidon in kami, indoiaipa in kami bo ḷagidon posaḷamat! Dikabí mokopoonggot, sinbá bayongan in intau monotaau kon Ikobí in ki Allah. Sin Yerusalem bo umat-Mu in kapunyaan-Mubí inta ain sinondí.”

YEHEZKIEL 20:9

Táe diábí inaidan-Ku intua, sinbá tangoi-Ku in diá singkuḻeon in bangusa mita inta kon pinogutunan monia. Sin kon tayowon in bangusa mita tatua, Akuoi in nopotaaudon kon bangusa Israel in diaan-Kudon ḷumuai nongkon Mesir.

YESAYA 43:25

Táe Akuoi in ki Allah inta nomopat kon dosamu, Inampungan-Ku in iko sin natuabí in sipat-Ku; Akuoi in diá bidon tantú monorop kon dosamu mita.

MAZMUR 65:3

Sin Ikobí in motubag kon sambayang; bayongan in intau in mamangoibí kon ini-Mu popisí in ain binaradosa.

MAZMUR 31:3

indongogaipa kaasí in akuoi bo ḷagidon poḷuat in akuoi. Ikodon in mobaḻí buḷud batuku tampat pogadopanku, naonda bo benteng inta moropot, inta mokosaḷamat kon inakó.

EPESUS 1:6

Dinayo-dayowdon in ki Allah inta mokawasa, sin tabi-Nea inta totok in moḷoben kon i naton pinoniata-Neadon pinongin i Adí-Nea.

MALEAKHI 2:2

Horomatdon in Akuoi pongin aidmu. Aka moiko doí mokidongog kon tosingogon-Ku, moiko in kutukon-Ku. Bayongan inta tarimaan monimu saḷaku rijiki in mobaḷuidon kutuk. Totuubí, bayongan inta mopia in kinutuk-Kudon, popisí in moiko in doí mopandungmai kon parenta-Ku.

MAZMUR 115:1

Deemanbí kami, o Tuhan, deemanbí kami, táe tongábí Iko in musti dayowon, sin Iko in mosatia bo umuran motabi.

YOSUA 7:9

Intau in Kanaan bo bayongan intau ibanea kon butá tanaa in mokodongogdon kon tua. Ḻibutandon monia bo ḻimodon in kami komintan! Yo onu in pomiaan-Mu sinbá tangoi-Mu in umuran horomaton?”

DANIEL 9:9

Iko in umuran moibog mongampung bo motabi, umpakabí kami ain noḷawang kon ini-Mu.

YEHEZKIEL 20:44

Aka moiko pomiaan-Kudon natua popisí in tangoi-Ku, bo deemanbí pinodoyon kon dodiamu inta diá mopia bo aidmu inta moraat, dá kotaauandon monimu intau in Israel kon Akuoibí in ki Tuhan. Akuoi ki Tuhan Inta Totok in moḷantud ain nosingog.”