MAZMUR 57:2 - Alkitab Singog In Mongondow Masa In Tanaa

² Kotabipa kaasí in akuoi, o Allah, kotabipa in akuoi, sin kon ini-Mu in pogadopanku. Kon bonu in koḻikip-Mu mogadop in akuoi, modapot in mogogai in deḷang inta nondangat.

MAZMUR 57:2 Referans Kwoze

MAZMUR 138:8

Iko in mogintompodbí kon dandi-Mu kon inakó; dikabí mogogai in motuḷung kon umat-Mu.

PILIPI 1:6

Ki Allahbí in nomangkoi kon oaidan mopia tatua kon inimu, bo moyakinbí in akuoi, kon tantú-Neabí ingguputan in oaidan-Nea tatua modapot kon singgai ki Kristus Yesus in mamangoidon bui.

IBRANI 13:21

Poigum mako, ki Allah inta nobaḻí pangkoi in kobiagan motompia, umuran mobogoi in bayongan inta mopia inta paraḷu pakéon monimu mogaid kon onu inta koibog i Allah. Bo poigumon doman mako takin totuḷung i Yesus Kristus, popoaidon i Allah kon i naton in onu inta kinoibog-Nea. Tantúbí dayow in ki Kristus dapot in kopaḷutannea! Amin.

YESAYA 26:12

Tuhan, Iko in mopobaḻíbí kon inami mobiag motompia; bayongan inta inaidan nami, Ikobí in nopoaid kon inami.

PILIPI 2:12

Utat mita inta kotabiku, moiko umuranbí kodu-kodudui kon inakó wakutu in akuoi koyota-yotakinpa monimu, tuamai poigumonku kon i monimu, umpaka in kita nogiyayúandon táe umuranbí ramuji aidai onu inta kinoibog i Allah. Sin moiko aindon pinosaḷamat i Allah, tuamai umuran ramuji sinbá iko in mobiag mosompurna. Mokopoendar in mogaid kon tua komintan podudui kon inta kinoibog i Allah.

YESAYA 57:15

Sin nanaa in guman i Allah, Inta Totok in moḷantud bo mokudus, inta nongawasa modapot in mononoi, “Akuoi in nogutun kon tampat inta moḷantud bo inta motusi, táe kon yua-yuakbí doman in intau mita inta moompá in dodia bo inta nomanasaḷ in nogaid kon dosanea mita, sin mopoguḻí bui kon ibog bo kamang monia.

MAZMUR 56:2

Kotabipa kaasí in akuoi, o Allah, sin sinubu in akuoi, umuranbí in akuoi doroton in musungku mita.

MAZMUR 17:8

Ḷukadaidon in akuoi naonda bo batoḷ in mata-Mu, bunidon in akuoi kon bonu in koḻikip-Mu

MAZMUR 41:5

Gumanku, “Akuoi in binaradosadon kon ini-Mu, o Tuhan, kotabipa kaasí in akuoi bo undamaipa in akuoi.”

MAZMUR 143:9

Akuoi in mamangoi sin moniug kon ini-Mu, o Tuhan, poḷuatdon in akuoi nongkon musungku mita.

YESAYA 26:20

Tuotdon kon bonu in baḷoimu, ei bangusaku, bo ḻingkopaidon in ngara. Pogadopdon motoyong modapot in torú i Tuhan mooyongdon.