MAZMUR 119:51 - Alkitab Singog In Mongondow Masa In Tanaa

⁵¹ Intau moḷoḷatú in totokbí in moningkuḻe kon inakó, táe akuoi in diábí sinumabat kon hukum-Mu.

MAZMUR 119:51 Referans Kwoze

AYUB 23:11

Akuoi in motoinduduibí kon i-Nia takin satia; diábí kon dodai in onda in akuoi in sinumabat nongkon daḷan inta sinantú-Nea.

YEREMIA 20:7

Tuhan, Iko in nodondouḷug kon inakó bo akuoi in kinodondouḷugandon. Iko in moropo-ropot in akuoi bo nopokuyungdon kon inakó. Akuoi in irupa-rupamai in bayongan intau, siningkuḻe nongkon doḷo-doḷom dapot in ḷoḷabungnea.

MAZMUR 119:157

Nobayong in intau in nosaturu bo nondudur kon inakó, táe diábí sinaḷáanku in parenta-Mu.

MAZMUR 44:18

Tua komintan ain noiantug kon inami umpaka diá in kami nokoḻiong kon ini-Mu andeka nonoḻikud kon dodandian-Mu bo inami.

LUKAS 23:35

Intau mita in sinimindog mako kon tua bo moindoimai. Itoi mita intau Yahudi umuran morebeg kon i-Nia takin mosingog, “Sia ain noposaḷamat kon intau ibanea; diábí bo tungkuḷan-Nea in tanaa mako bo posaḷamaton in awak-Nea tontaní aka totu-totuubí kon Sia in Datu Mopoposaḷamat inta piniḻí i Allah!”

YESAYA 42:4

Diá in gagawang andeka kobuḻian in kamang, modapot in inta moadil in posindogon kon dunia. Ḻipú mita inta moyayú mokotanob kon totundúnea.”

YESAYA 38:3

“Tuhan, toropdon kon akuoi in nogundoidon kon ini-Mu takin motoindudui bo motuḻid in gina. Akuoi in umuran moḷongasi dumudui kon ibog-Mu.” Bo ki Hizkia in nongombaḷ totok.

MAZMUR 119:69

Intau moḷoḷatú noningkuḻe kon inakó, táe noḻimbatúbí in ginaku in sinumoḷutui kon atorang-Mu.

MAZMUR 119:31

Akuoi in dinumuduidon kon atorang-Mu mita, o Tuhan, dika pomayá mako in akuoi in pokooyáanmai.

MAZMUR 119:21

Iko in monoboḷow kon intau inta moḷoḷatú, bo nongutuk kon intau inta sinumabat kon parenta-Mu.