MAZMUR 107:22 - Alkitab Singog In Mongondow Masa In Tanaa

²² Biódon mako in mosia mopoyaput in sukur poḷat modia kon sosumba, bo mopotaa-taau mako in aid-Nea pongin dondong pia in gina.

MAZMUR 107:22 Referans Kwoze

MAZMUR 50:14

Posumbadon in kuruban sukur kon i Allah, intompodaidon in dandimu kon i Inta Totok in moḷantud.

MAZMUR 118:17

Akuoi in diábí matoi, táe umuranbí mobiag sin mopotaa-taau mako kon aid i Tuhan.

MAZMUR 9:11

Intau inta nonotaau kon ini-Mu mogoḷat mako kon ini-Mu, o Tuhan, intau inta mosumba kon ini-Mu diábí taḷaan-Mu.

IBRANI 13:15

Tuamai potonsigad naton kon i Yesus, kita in musti umuran modayow kon i Allah; tua in nobaḻí kuruban sukur naton kon i-Nia, inta pinosumba naton pinongin singog in bibig sin mopomulia kon tangoi-Nea.

MAZMUR 116:17

Akuoi in modiadon kon kuruban sukur kon ini-Mu, sindaḷan mopoyaput in sambayang kon ini-Mu.

MAZMUR 73:28

Táe aka kon inakó yo totuubí kon mopia in kon diug i Allah, Tuhan Allah in baḻíonku pononiunganku, sinbá motaau in akuoi mopotaa-taau mako in bayongan inta inaidan-Nea.

IMAMAT 7:12

Aka kuruban tatua pinosumba takin makusud mopoyaput in sukur, dá poyotakinon in mahaḷuk tatua pokuruban in roti diá iragian. Roti tatua motaaubí inta mobunod nongkon topong pomiaan kukis takin ḷana in zaitun, motaaubí doman in roti noingkag monipit inta iḻepoan in ḷana, ande kukis topong inta pinomia pinoyotakin in ḷana zaitun.

PETRUS 1 2:5

Moiko nion in batu mita inta nobiag. Tuamai moiko in musti moibog pakéon pobaḷoi kon baḷoi i Allah inta kon soroga. Takin natua moiko in mobaḻí imang mita inta nobiag tongádon kon i Allah, bo inta pinongin i Yesus Kristus noposumba kon i Allah in kuruban inta mokosanang kon gina-Nea.

YESAYA 12:4

Moiangoibí in wakutunea moiko in moguman, “Posukurdon kon i Tuhan, bo sumbadon in Sia. Potaaudon kon bangusa mita koagungan bo bayongan in inta inaidan-Nea.

MAZMUR 116:12

Onu in ogoiku kon i Tuhan sin potuḻí kon kopopia-Nea kon inakó?

PETRUS 1 2:9

Táe moiko nion in bangusa inta kinopiḻían, imang mita inta mobantung kon datu, bangusa inta mokudus, umat inta kapunyaan i Allah. Ain piniḻí bo inoiní i Allah in moiko iḷumuai nongkon sindip bo mayá tumuot kon bayag-Nea inta momulia, takin makusud bá moiko in mopotaa-taau mako in habar in bayongan inta pinomia i Allah inta diá in poḻiuan tua.

MAZMUR 9:15

sinbá akuoi in modayow kon ini-Mu kon tayowon in intau mita in Yerusalem. Akuoi in monggoḷakapbí takin pia in gina sin Iko in noposaḷamat kon inakó.

MAZMUR 27:6

Tanaa akuoi in nountung kon musung inta kon ḻibukumai; dá takin goḷokap takin pia in gina pinosumbaku in kuruban sukur kon Baḷoi-Nea; akuoi in nodondong bo nodayow kon i Tuhan.