Bo ki Yesus nolarang kon i monia komintan in mongonguman kon soaḷ tatua kon i ineka. Táe námai tua in pololarang i Yesus, táe námai tua doman in poposiar magí-mako monia.
Onu in inaidan i Yesus tua noisiardon kon bayongan ḻipú kon Siria, dá diniadon monia pinobayá kon i-Nia in bayongan intau inta nongotakit noonggotdon. Noyagi-yagimai in takit, oyúon in kinotoḷangan in dimukud moraat, oyúon takit in manuk, oyúon in diá mokobayá, mosia nopia mita i Yesus.
Sinarima monia in doit tatua bo dinuduian monia onu inta pinoguman bo pinoki aid kon i monia. Bo ouman tanaa aindon nodapot kon intau mita in Yahudi dapot masa in tanaa.
Onda intua ki Yesus minayádon bui in Galilea, bo Sia in umuran kon bonu in kawasa in Roho i Allah. Habar soaḷ ki Yesus noisiardon kon bayongan ḻipú tatua.
Táe habar soaḷ ki Yesus totokdon noisiar kon ḻipu-ḻipúannea, sahingga in nobayongdon intau in namangoi sin mokidongog kon onu in poguman-Nea bo mokiundam doman kon bayongan takit monia.