MATIUS 9:2 - Alkitab Singog In Mongondow Masa In Tanaa

² Bo intau nodia mangoi kon i-Nia in intau tobatú inta ḻempeng bo noitosiug mako kon tosiugannea. Naonda inontong i Yesus in pirisaya monia, Sia in noguman kon intau inta diá mokobayá tatua, “Popirisayadon, adí-Ku! Taḷámu aindon inampungan.”

MATIUS 9:2 Referans Kwoze

MATIUS 9:22

Dodai intua ki Yesus in nobobui bo noindoi kon inia poḷat noguman, “Koroton in ginamu, adí-Ku! Sin iko in mopirisaya kon i-Nakó.” Bo kon dodaipa doman tua bobay tatua nopia.

YAKOBUS 2:18

Degá oyúon intau in moguman, “Oyúon intau in umandoḷ kon pirisayanea bo oyúon doman in umandoḷ kon oaidnea.” Dá akuoi in moguman, “Poontongka kon inakó in pirisaya takin diá in oaid bo poontongku kon inimu in oaidku saḷaku bungai kon akuoi in mopirisaya.”

OUMAN IN RASUL MITA 19:12

Aka lenso andeka baan inta nokoimontandon pinaké i Paulus bo diaan kon intau mita notakit, yo mopiabí mita in takit monia bo dimukud mita moraat in ḷumuaibí doman mita nongkon i monia.

YOHANES 21:5

Ki Yesus in noḻibó kon i monia, “Adí-Ku mita, oyúon degá in toyá kon i monimu?” “Diá,” tubag monia.

MATIUS 8:10

Naonda in dinongog i Yesus tosingogon in porwira tatua, noherang totok in Sia. Dá Sia in noguman kon intau mita inta dinumudui kon i-Nia, “Diápa kon dodai in onda in kinodungkuḷan-Ku in koḷoḷoben pirisaya ná tanaa kon sigad in intau in Israel!

MATIUS 4:24

Onu in inaidan i Yesus tua noisiardon kon bayongan ḻipú kon Siria, dá diniadon monia pinobayá kon i-Nia in bayongan intau inta nongotakit noonggotdon. Noyagi-yagimai in takit, oyúon in kinotoḷangan in dimukud moraat, oyúon takit in manuk, oyúon in diá mokobayá, mosia nopia mita i Yesus.

SURAT I PAULUS KON JAMAAT RUM 5:11

Bo deemanbí tongá tua, táe moḷungangadon totok in gina naton kon kopopia in gina i Allah inta pinopotonsigad kon i Yesus Kristus ki Tuhan naton. Sin pinongin i Kristus tuata, dá tanaa mako kita mokoalami kon hubungan naton inta mopia takin i Allah.

OUMAN IN RASUL MITA 14:9

Intau tatua in ḻimitú mako kon tua mongindongogmai kon i Paulus mosingog. Bo inontong i Paulus kon mopirisaya in intau tatua, dá tuamai mopiapabí. Dá ki Paulus inimindoi kon inia,

YOHANES 16:33

Naa komintan in poguman-Ku sinbá moiko in mokouḻí kon kobiagan motompia bo moonow sin notobatú-Kudon. Kon dunia naa moyoyangpabí in moiko, táe korotonbí in ginamu, sin Akuoi in diábí taḷowon in dunia naa!”

MATIUS 9:6

Táe bá kotaauan monimu, kon Adí Intau in inogoian in kawasa mongampung kon taḷá kon dunia naa.” Bo Sia in noguman kon intau inta ḻempeng tatua, “Pobangondon, buatdon in tosiuganmu bo pobuidon kon baḷoimu!”

MATIUS 8:16

Naonda in noungkoḷomdon, mobarong in intau inta kinotoḷangan dimukud moraat in dinia mangoi kon i Yesus. Bo tongá takin tosingogon totontagá ki Yesus noguntun kon dimukud mita moraat tatua bo nongundam kon intau mita inta nongotakit.

YESAYA 44:22

Taḷámu in buntunon-Ku naonda bo goḷom, dosamu in untunon-Ku naonda bo topuot. Pobuidon mangoi kon i-Nakó, sin iko in pinoḷuat-Kudon!”

YOHANES 2:25

Tuamai diá bidon paraḷu mokodongog kon tosingogon in intau ibanea, sin kinotaauan-Nea onu in kon bonu in gina intau.

MARKUS 5:34

Dá ki Yesus in noguman kon bobay tatua, “Adí-Ku, popisí in iko bo mopirisaya kon i-Nakó dá nopia in iko! Bayádon takin saḷamat, iko in totu-totuudon nopia!”

MARKUS 1:32

Naonda in noungkoḷomdon singgai, intau mita nopodondon mangoi kon i Yesus in intau nongotakit bo inta kinotoḷangan in dimukud moraat.

MOHOHUTUBA 9:7

Pongaanbí bo pobarasanang, inumdon in anggurmu takin ḷunganga in gina. Diábí mobogat in gina i Allah, sin kinoibog-Neabí intua.

MATIUS 6:12

Bo ampungaidon taḷá nami, ná doman kami ain nongampung kon intau inta kotaḷá kon inami.

MATIUS 9:5

Onda degá i mogampa-gampang, moguman, ‘Taḷámu aindon inampungan’, andeka moguman: ‘Pobangondon bo bayádon’?

MATIUS 14:27

Táe ki Yesus ḷagi noguman kon i monia, “Pokopoonow! Sin Akuoibí in naa. Dika moondok!”

MARKUS 6:50

dá nomaḷú in mosia sin noondok. Mosia komintan nokoontong kon i-Nia bo totok in noitaḻikokog. Táe baḷú in ki Yesus noguman kon i monia, “Pokoonow! Ki Yesusbí in Akuoi. Donaai moondok!”

MARKUS 10:49

Dá sinumogon in ki Yesus bo noguman, “Oiní mangoi in sia.” Dá inoiní doman monia in intau bilog tatua. Bo mosia in noguman kon intau bilog tatua, “Koroton in ginamu! Sin pinoki oiní i Yesus in iko, pobuatdon!”

OUMAN IN RASUL MITA 23:11

Kon doḷom noiduduimai ki Tuhan Yesus in namangoi sinimindog kon diugneamai bo noguman kon inia, “Koropotdon in ginamu! Sin iko aindon nobarani in nongonguman kon onu inta inontong bo dinongogmu soaḷ Akuoi kon intau mita kon Yerusalem, dá ná doman tuata iko in mayá bo mongonguman kon intau mita in Rum kon onu inta ain inontong bo dinongogmu soaḷ Akuoi.”