MARKUS 1:32 - Alkitab Singog In Mongondow Masa In Tanaa

³² Naonda in noungkoḷomdon singgai, intau mita nopodondon mangoi kon i Yesus in intau nongotakit bo inta kinotoḷangan in dimukud moraat.

MARKUS 1:32 Referans Kwoze

MATIUS 8:16

Naonda in noungkoḷomdon, mobarong in intau inta kinotoḷangan dimukud moraat in dinia mangoi kon i Yesus. Bo tongá takin tosingogon totontagá ki Yesus noguntun kon dimukud mita moraat tatua bo nongundam kon intau mita inta nongotakit.

LUKAS 4:40

Naonda in tongkaná in tumoyopdon mata in singgai, komintan intau in nodia mangoi kon i utat mita monia inta notakit noyagi-yagimai sin angoion pokiundam kon i Yesus. Bo nodait iyapu i Yesus in mosia dá nongopia in takit mita monia tua.

MARKUS 3:2

Kon baḷoi pososambayangan tatua oyúon doman in intau mita inta moibog motayak kon taḷá i Yesus, sinbá oyúon in baḻíon monia dodoyonan popongaduan kon i-Nia. Tuamai in umuran tarukiraan mako monia mongo mongundam doman in ki Yesus kon singgai in Sabat.

MATIUS 4:24

Onu in inaidan i Yesus tua noisiardon kon bayongan ḻipú kon Siria, dá diniadon monia pinobayá kon i-Nia in bayongan intau inta nongotakit noonggotdon. Noyagi-yagimai in takit, oyúon in kinotoḷangan in dimukud moraat, oyúon takit in manuk, oyúon in diá mokobayá, mosia nopia mita i Yesus.

MARKUS 1:21

Ki Yesus bo murí-Nea mita noidapotdon kon kotá in Kapernaum. Kon singgai in Sabat noiduduimai, ki Yesus sinumuot kon baḷoi pososambayangan bo nomangkoidon notundú.

MATIUS 8:17

Tua mita in mobaḻí sinbá motompodon Pirman inta pinoyaput i Nabi Yesaya, nanaa, “Sia tua in nomotaan kon yoyiga bo mongundam kon panyaki naton.”

MARKUS 1:31

Dá ki Yesus minayá dinimiug kon i guyá i Simon poḷat nokadai kon ḻimanea sinbá mobangon. Kon dodaipa doman tua bo nopia in patúnea, bo baḷúdon in bobay tatua bo nogoḷud kon kaanon kon imonia.

LUKAS 4:41

Dimukudpa mita moraat in iḷumuai nongkon moantó intau, sindaḷan kumarak bo moguman, “Iko nion in ki Adí i Allah!” Táe totok in sinorúan i Yesus in mosia bo diá inogoi mosingog sin kotaauandon monia kon Sia tua in Datu Mopoposaḷamat.