MARKUS 1:19 - Alkitab Singog In Mongondow Masa In Tanaa

¹⁹ Ki Yesus nongingguput kon bobayáan-Nea bo nokoontong doman bui kon intau doyowa mogutat ibanea, ki Yakobus bo ki Yohanes in tangoi monia. Taya dua naa ki adí i Zebedeus. Mosia naa kon bonupa in uangga monompiamai kon landará monia.

MARKUS 1:19 Referans Kwoze

OUMAN IN RASUL MITA 12:2

Sia in nomarenta nokiratá kon i Yakobus inta ki utat i Yohanes

OUMAN IN RASUL MITA 1:13

Kon Yerusalem in mosia minayá in baḷoi inta pinogutunan monia. Mosia namonik in yuang inta pinongaanan monia wakutu in Singgai Moḷoben Paska. Naa in tangoi monia tua: Ki Petrus, ki Yohanes, ki Yakobus, ki Andreas, ki Pilipus, ki Tomas, ki Bartolomeus, ki Matius, ki Yakobus inta ki adí i Alpeus, ki Simon intau in Zelot bo ki Yudas adí i Yakobus;

MARKUS 14:33

Onda intua ki Yesus nonongganut kon i Petrus, kon i Yakobus bo kon i Yohanes noyotakin-Nea minayá. Bo mulaidon sia angoian robonoḷ in dodob bo moḻia-ḻiaw in gina.

MARKUS 10:35

Ki Yakobus bo ki Yohanes inta ki adí mita i Zebedeus in namangoi dinimiug kon i Yesus bo noguman, “Pak Guru, oyúon in poigumon nami aidan i Amá kon inami.”

MARKUS 9:2

Onom nosinggai noidudui kon tua, ki Yesus nodia kon i Petrus, kon i Yakobus bo kon i Yohanes, mosia minayá in buḷud inta moḷantud bo sinumontaní. Kon tayowon monia tua nobaḷui in pogot i Yesus.

MARKUS 5:37

Bo minayá turus in Sia, táe diádon tobatúmai inogoi-Nea dinumudui kon i-Nia koḻikud in ki Petrus, ki Yakobus bo ki Yohanes inta ki utat i Yakobus.

MARKUS 3:17

ki Yakobus bo ki Yohanes ki utatnea. Taya dua naa ki adí mita i Zebedeus (mosia in sinangoian ki Boanerges, inta mangaḻenea, “ki adí in gotup”),

MATIUS 4:21

Bo naonda i minayá nongkon tua, ki Yesus bui nokoontong kon intau taya dua doman mogutat, ki Yakobus ki adí i Zebedeus bo ki Yohanes ki utatnea, mosia koyota-yotakin i amá monia ki Zebedeus. Mosia yogot monoinutmai kon landará kon bonu uangga. Mosia inoiní i Yesus,

MARKUS 1:18

Dá baya-bayádon sinaḷáan monia in landará bo dinumudui kon i Yesus.

MARKUS 1:20

Daḻí bo inoiní i Yesus in mosia. Dá sinaḷáanmaidon monia in ki amá monia inta kon bonupa in uangga takin intau mita inta ginajian i amá monia. Bo minayádon in mosia dinumudui kon i Yesus.

YOHANES 21:2

Kon singgai tobatú, ki Simon Petrus, ki Tomas inta donoionmai “Apang”. ki Natanael inta nongkon Kana kon Galilea, ki adí mita i Zebedeus, bo murí doman mita i Yesus taya dua in namangoi noyosipun.