LUKAS 7:37 - Alkitab Singog In Mongondow Masa In Tanaa

³⁷ Kon ḻipú tatua oyúon in bobay inta ain kinotaauan totok in intau moantó kon sia tua binaradosadon totok. Naonda in kinotaauan in bobay tatua kon ki Yesus in yogot mongaan kon baḷoi intau in Parisi tatua, dá namangoi in sia kon baḷoi tatua takin kodia-dia in botoḷ inta mogaga totok inta kobonu-bonu in ḷana mobondu.

LUKAS 7:37 Referans Kwoze

LUKAS 5:32

Akuoi naa in mamangoi deemanbí mogoiní kon intau inta norai kon mosia intau mobanar, táe mogoiníbí kon intau mita baradosa sinbá mosia in moibog monaḷámai kon oaid monia inta diá mopia.”

MATIUS 21:31

Yo ki ine in kon sigad nayadua tua in nogaid kon inta kinoibog i amánea?” Tubag monia, “Inta guya-guyang.” “Poguman-Ku kon i monimu: Intau inta mononagi kon pajak bo bobay mita inta sundaḷ in moiuna kon i monimu tumuot mobaḻí anggota in umat i Allah. “Inta induanea,” tubag in imang mita tongguḷunea bo itoi mita in Yahudi tatua.

PETRUS 1 4:18

Kon bonu in Buk Motusi ain pinais nanaa, “Aka intaupa mita inta mopia mororiga doman totok in posaḷamaton, yo onudon degá in mobaḻí kon i monia inta diá mopirisaya kon i Tuhan bo inta mogaidmai kon dosa!”

TIMOTIUS 1 1:9

Tantú mustibí kotaauan naton kon hukum i Musa in pinomia deemanbí pinopomakusud kon intau mita inta mopia, táe kon i moniabí inta moibog momaḷawang kon hukum, kon i monia inta moraat, kon i monia inta diá mopirisaya kon i Tuhan, kon i monia inta umuran mogaid kon inta noitaḷá, kon i monia inta tongá umuran morai kon in dunia naa, kon i monia inta diá nonotaau in agama, kon i monia inta moḷoḻimod kon guyanga ḷoḷaki bo bobay, bo inta kino ḻimo-ḻimodnea kon intau,

LUKAS 18:13

Táe mononagi kon pajak tatua in sinimindog iyumayú bo diá doman kobaḻí in ḷumangag kon ḷangit in nosambayang. Sia in tongá kopia moyapu kon dodobnea bo nosingog nanaa, ‘O Allah, kotabipa in akuoi naa, sin akuoi naa intaubí baradosa!’ ”

LUKAS 5:30

Tongonumai degá intau in Parisi bo mototundú mita kon agama noyaat in gina in nokoontongmai kon natua, dá mosia in noḻibó kon murí-Nea mita, “Nongonu in moiko sin nongaanbí noyotakin in mononagi kon pajak bo intau mita inta diá mopia?”

SURAT I PAULUS KON JAMAAT RUM 5:8

Táe ki Allah in noponiatadon in tabi-Nea kon i naton, kon dodai in ki Kristus pinokuruban sin kopontingan naton, kon dodai in kita binaradosapa.

YOHANES 11:2

Ki Maria naa in bobay inta nopoinggú in ḷana nobondu kon sioḷ i Tuhan bodongka iradatannea bui in buoknea. Kon singgai tobatú ki utat monia ki Lazarus naa in notakit.

TIMOTIUS 1 1:15

Totuubí in singog tanaa, tuamai in patusbí tarimaan bo pirisayaan komintan: “Kon ki Kristus ain namangoi in dunia naa sin moposaḷamat kon intau baradosa.” Bo akuoibí naa in intau inta totok in binaradosa bo inta totok doman in moraat.

YOHANES 9:31

Kinotaauanbí naton kon ki Allah in diábí mokidongog kon intau mita inta binaradosa, táe tongábí mosia inta mohoromat kon i Allah, bo inta mogaid kon onu in kinoibog-Nea.

YOHANES 9:24

Bo mosia in buidon nogoiní kon intau inta kon iná nobilog tatua, bo noguman kon inia, “Pongibotdon kon iko in mogumanbí kon totuu. Kinotaauan nami kon intau tatua intaubí binaradosa.”

LUKAS 19:7

Táe intau mita inta nokoontong kon tua in nomangkoidon mongunsingog kai monia, “Ih! Sia in mongandupbí kon baḷoi in intau inta diá mopia!”

LUKAS 7:34

Noiduduimai kon tua, Adí Intau namangoi – Sia tua nongaan bo nonginum – táe siningog monimu: ‘Indoiaika, intau tatua! Totok in turá bo moḷoḷangu, bo yobayat in mononagi kon pajak bo in intau mita baradosa.’

LUKAS 7:36

Tobatú intau in Parisi namangoi nogoiní kon i Yesus mongaan kon baḷoinea, dá ki Yesus in minayá iḻimitú bo nongaan doman kon baḷoinea.