LUKAS 4:25 - Alkitab Singog In Mongondow Masa In Tanaa

²⁵ Táe indongogai in singog-Ku naa: kon tungkuḷ i Nabi Elia, wakutu in kinodaitan kaanon sin toḷudon notaong kapin in diá nonguya-nguyan. Wakutu intua noantó in dongkadon boba-bobay kon Israel.

LUKAS 4:25 Referans Kwoze

YAKOBUS 5:17

Ki Elia in tumpaḷa doman intau ná kita naa. Sia in nosambayang totu-totuu nopoigum sinbá diá monguyan-nguyan, dá diá doman nonguyan-nguyan kon bonu in toḷu notaong bo tobotak.

DATU MITA IMITÁNEA 17:1

Oyúon in nabi tangoinea in ki Elia. Sia in nongkon Tisbe, kotá tobatú kon butá in Gilead. Kon singgai tobatú namangoi in sia kon i Datu Ahab bo noguman, “Pinodoyon kon i Tuhan inta nobiag, Allah inta sinumba in intau in Israel bo inta pinogundoianku, akuoi in mopotaau in naa kon i Tuang, kon bonu in doyowa andeka toḷu notaong moiduduimai naa in diábí in oḷú andeka uyan tongopiḻikmai, koḻikudbí in aka pogumankudon.”

MATIUS 20:15

Degá diá motaau in akuoi in mopomaké in kapunyaanku podudui kon onu in koibogku? Andeka moyaat degá in ginamu, aka akuoi mogaid kon inta mopia kon intau ibanea?’ ”

YESAYA 55:8

Ki Tuhan in noguman, “Raian-Ku in deemanbí raianmu, bo daḷan-Ku in deemanbí daḷanmu.

LUKAS 10:21

Kon wakutu intua doman, noḷungangadon in gina i Yesus, sin kinawasa in Roho i Allah. Ki Yesus in nosingog nanaa, “Akuoi in mosukur kon ini-Mu Amá, Tuhan in ḷangit bo butá sin bayongan intua aindon binuni-Mu kon intau mita inta mopandoi bo mobijaksana, táe aindon pinoontong-Mu kon intau mita inta nongobodok. Tuabí in kinoibog i Amá.

EPESUS 1:11

Bayongan yagi-yagi in pinomia i Allah pinoduduibí in ibog-Nea bo kaputusan-Nea tontaní. Nongkon pinomangkoianpamai Sia ain nomiḻí kon i naton sin ibogon-Nea kita in mobaḻídon umat-Nea sin motobatú i Kristus.

EPESUS 1:9

Ibog-Neabí tontaní in nopotaau kon i naton in tomayá-Nea inta noibunipa tatua; Sinantú-Neadon kon tomayá-Nea tatua in iḷapatan-Neadon pongin i Yesus Kristus.

SURAT I PAULUS KON JAMAAT RUM 9:20

Táe, Utat! Iko in tongábí intau ilo-ilow, bo iko in diábí mokobaḻí momayow kon i Allah! Pot in bungang motaau degá in moḻibó kon intau inta nomia kon inia, “Nongonu sin inaidanmubí nanaa in akuoi?”

SURAT I PAULUS KON JAMAAT RUM 9:15

Sin ki Allah ain noguman kon i Musa nanaa, “Akuoi in mopoontong in barakat kon intau inta kinoibog-Ku popoontongan in barakat tatua, bo Akuoi in mopoontong in tabi-Ku kon intau inta kinoibog-Ku popoontongan in tabi-Ku tatua.”

WAHYU 11:6

Oyúon in kawasa monia mogoḻingoi kon ḷangit sinbá diápa monguyan kon dodai in mosia mopotaau in Habar nongkon i Allah. Mosia inogoian doman in kawasa mongawasa kon bayongan bokaká sinbá mosia in motaau momaḷui kon tubig mobaḻí dugú; bo oyúon doman in kawasa monia mosambok kon butá naa takin mopoḷabú in bayongan inta mokororiga, toonukabí in koibog monia.