LUKAS 16:21 - Alkitab Singog In Mongondow Masa In Tanaa

²¹ Lantaran totokdon in ginogoy dá Popuyutdon in sia kon onukadon in moḷabú nongkon meja in intau inta nooyúon tatua. Bo ungkú mita in mamangoi bo modeḻemut kon paḻínea.

LUKAS 16:21 Referans Kwoze

MATIUS 15:27

Bobay tatua in notubag, “Totuubí intua Tuhan, táe ungkú tatua in nokaan doman kon muyo-muyok in kaanon inta noḷabú kon meja i tuangnea.”

KORINTUS 2 11:27

Rumopot totok in akuoi in mogaid, dá mokakit in diádon mokoposiug, diádon mokopongaan, diádon mokoponginum, bo mokakit domandon in monahang tonow sin diádon koḷambu-ḷambung pakéon bo diá domandon in baḷoi pogutunan.

KORINTUS 1 4:11

Umaai in naa umuranpabí in kami gogoyon bo moyogang in bayongan yagi-yagi; ḷambung dongkadon kon awak bo rorigaanpa doman in intau; bo diá doman kotampat pogutunan;

YOHANES 6:12

Naonda in komintandon nongaan nobotug, ki Yesus noguman kon murí-Nea mita, “Sipundon in ki agat mita in roti inta diá kinaan monia sinbá diá mogoguyaat.”

MARKUS 7:28

Dá kain bobay tatua doman, “Tuang, ungku mita inta kon siup in meja mokaanbí doman kon muyo-muyok in kaanon inta iḷabú in mongoadí tatua!”

LUKAS 16:20

Kon tayowon baḷoinea pinoḻitúdon mako in tobatú intau inta nobiag nobogá totok, tangoinea in ki Lazarus. Awak i Lazarus naa totok in pinaḻi-paḻímai.

LUKAS 16:22

Diá noonggot kon tua minatoi in intau bogá tatua bo dinia in malaekat mita pinobayá in tampat inta mopia kon diug i Abraham kon soroga. Natua doman in intau inta nooyúon tatua, minatoidon doman bo iḷobong.