KORINTUS 2 4:5 - Alkitab Singog In Mongondow Masa In Tanaa

⁵ Sin habar inta pinoyaput nami tua in deemanbí habar soaḷ oaidan nami tontaní. Táe habarbí soaḷ ki Yesus Kristus inta Tuhan; bo kami naa in tongábí simpaḷmu mita popisí in ibog i Tuhan.

KORINTUS 2 4:5 Referans Kwoze

KORINTUS 2 1:24

Akuoi in diábí momakisa kon i monimu kon soaḷ onu inta musti pirisayaan monimu, sin moiko in totokdon nopirisaya kon i Kristus. Akuoi in tongábí mogaid moyotakin monimu sinbá modugang pia in gina monimu.

KORINTUS 1 1:23

Kami naa in tongábí mopoyaput in habar soaḷ ki Kristus inta minatoi pinopopakú kon kayu pinoyotaḻempang. Habar tatua in nokotersinggung kon intau mita in Yahudi, dá inanggap monia diá totuu in habar tatua.

GALATIA 5:13

Utat mita! Moiko aindon inoiní mobaḻí intau inta nobebas. Táe donaaibí pakéon in kabebasanmu tatua saḷaku kasampatan mogaid kon onukadon in koibog monimu aidan. Táe popobaragunabí in kasampatan tatua motuḷung kon intau táe musti podoyon kon tabi kon tumpaḷa intau.

PILIPI 2:11

Bo akúonbí monia komintan kon ki Yesus Kristus tua in Tuhanbí; takin natua dá ki Allah, ki Amá naton in pinomuliadon.

PILIPI 1:15

Totuubí doman kon oyúonbí in tongonumai in kon sigad monia tua inta mopotaau in habar soaḷ ki Kristus popisí in mointoi bo moibog mobobayowan, táe oyúonbí doman in totu-totuu motuḻid in gina in nopoyaput in habar soaḷ ki Kristus tua.

PETRUS 2 2:3

Popisí in mosia motamaa, dá intau mita inta deeman totuu guru tua in mongonguman kon inimu in ouman mita inta tongá ai-aidan monia tontaní sinbá kouḻían monia kon kauntungan in moiko. Táe bá kotaauan monimu, pongadilan inta mopoḷabú in hukuman kon i monia tua in noonggot bidon in sinadia, bo koyoyangan inta ain sinantú kon i monia in mogoḷat bidon mako.

TITUS 1:11

Intau mita natua in mustibí tokohukumon in bibig monia, sin onu in sinundú monia tua, tongábí mopotombauk kon raian in intau mita inta nobiag tobaḷoian. Tua mita in pinomia monia sin motayak kon kauntungan inta diá patus.

TIMOTIUS 2 2:10

Tuamai akuoi in notababí in notanggung kon tua komintan lantaran kopontingan in intau mita inta ain piniḻí i Allah, sinbá mosia in mokouḻí doman kon kasaḷamatan inta inaidan i Kristus Yesus bo takin kamuliaan inta mononoi.

KORINTUS 1 12:3

Manangka intua mustibí kotaauan monimu kon intau inta kinawasadon in Roho i Allah in diábí motaau mosingog, “Binaḷa-baḷa in ki Yesus!” Ná doman tua, diábí doman in tobatúmai intau in moguman, “Ki Yesus tua in Tuhanbí!” aka intau tatua bo diá kinawasa in Roho i Allah.

KORINTUS 1 8:6

Táe kita in nopirisayabí kon tongábí tobatú in ki Allah. Inta nomaḻí kon bayongan bonu in dunia naa. Bo tongábí mobiag kon kopontingan-Nea in kita. Ki Tuhan in tongábí doman tobatú, tuata in ki Yesus Kristus. Pinongin i-Nia tua bayongan in yagi-yagi binaḻí, bo lantaran doman Sia dá nobiag in kita.

KORINTUS 1 2:2

Sin iyakinku bidon kon bonu in kotaki-takinpa monimu, akuoi in diábí nosingog kon yagi-yagi, koḻikudbí in nopotaau in habar soaḷ ki Kristus; inta minatoi kon kayu pinoyotaḻempang.

OUMAN IN RASUL MITA 10:36

Pirman inta pinoki poyaput-Nea kon intau mita Israel, tuata in Habar Mopia inta nopotaau in dodamean inta inaidan i Yesus Kristus, Tuhan in bayongan intau.

OUMAN IN RASUL MITA 5:31

Ki Yesusbí tua inta ain inogoian ḷoḻitúan bo kawasa moḷantud saḷaku Itoi bo Mopoposaḷamat, sinbá intau in Israel ogoian in wakutu mogogai in mogaid kon dosa, bá ampungan in mosia.

OUMAN IN RASUL MITA 2:36

Manangka intua bayongan in intau Israel in musti monotaau totok kon ki Yesus inta ain pinopopakú monimu kon kayu pinoyotaḻempang binaḻí bidon i Allah Tuhan bo Datu Mopoposaḷamat!”

YOHANES 7:18

Intau inta motundú kon onu in kinoibognea tontaní, sia tua i motayakbí kon bá horomaton. Táe intau inta moramuji sinbá horomaton in ki Inta nopotabá kon inia yo mojujur in sia tua, bo diábí in uboḷ kon inia.

MATIUS 23:8

Tongá moiko in dika mokioiní ki ‘Pak Guru’, sin tongábí tobatú in Gurumu bo moiko komintan in ginaḷum.

MATIUS 3:11

Akuoi mopobaptis in tubig kon i monimu, saḷaku bukti kon moiko aindon mogogai in mogaid kon inta diá mopia, táe Sia inta mamangoi moiduduimai kon inakó naa, kawasa-Nea moiḻiu totok kon inakó, sedang tongá mobuka kon togot in sapatu-Nea yo diá patus in akuoi. Sia in mopobaptis kon i monimu in Roho i Allah bo tuḷu.

KORINTUS 2 1:19

Sin ki Yesus Kristus, ki Adí i Allah inta ain pinohabarku bo pinohabar i Silas, bo i Timotius, kon i monimu, deemanbí intau inta topí-topí moguman “Oo” bo topí-topí doman moguman “Diá”. Sia tua in aka modandi yo totu-totuubí mobaḻí.

KORINTUS 1 15:47

Ki Adam inta muna pinomia nongkon ḷobud in butá, táe ki Adam inta induanea in nongkon sorogabí.

KORINTUS 1 10:33

Kobiagdon ná akuoi. Kon soaḷ yagi-yagi, ramujionku totok sinbá mokosanang kon bayongan intau. Bo tua in deemanbí tongá kopontinganku tontaní, táe kopontinganbí in bayongan intau sinbá mosaḷamat in mosia.

KORINTUS 1 4:15

Umpaka ribuandon intau in Keresten guru monimu, táe kon bonu in pirisaya monimu kon i Kristus, tongábí akuoi in nobaḻí ki amá monimu sin akuoibí naa in nopoyaput in Habar Mopia kon i monimu nodapot in nopirisayadon moiko kon i Kristus.