KORINTUS 2 3:3 - Alkitab Singog In Mongondow Masa In Tanaa

³ Mosia tontaní in nokoontongbí kon moiko in suratbí inta ain pinais i Kristus, inta pinoki dia kon i nami. Surat tatua in deemanbí pinais in tinta, táe Rohobí i Allah inta nobiag; bo deemanbí doman pinais kon buk, táe kon bonubí in gina in intau.

KORINTUS 2 3:3 Referans Kwoze

YEHEZKIEL 11:19

Mosia in ogoian-Kudon in gina mobagu bo dimukud mobagu. Gina monia inta ná kotogat in batu in gamáan-Ku bo toḻiuan-Ku in gina inta motoindudui kon i-Nakó.

YEREMIA 31:33

Naa in dodandian mobagu inta bain pomiaan-Ku takin umat in Israel: Hukum-Ku mita in tagúon-Ku kon bonu in gina monia, bo paison-Ku kon gina monia. Akuoi in mobaḻí Allah monia, bo mosia in mobaḻí umat-Ku.

IBRANI 8:10

Táe tanaa, naadon in dodandian inta pomiaan-Ku takin umat-Ku Israel, Kon singgai mita moiduduimai, Pirman i Tuhan: Popotonop-Ku in hukum-Ku kon bonu in pikiran monia, bo popopais-Ku domandon kon gina monia. Akuoi in mobaḻí ki Allah monia, bo mosia in mobaḻí umat-Ku.

IBRANI 10:16

“ ‘Naadon in dodandian inta inaidan-Ku takin i monia kon singgai mita moiduduimai,’ ki Tuhan in noguman doman nanaa, ‘Hukum-Ku mita in potonop-Kudon kon bonu in gina monia, bo popopais-Kudon kon bonu in raian monia.’ ”

MAZMUR 40:8

Bo akuoi in noguman, “Naadon in akuoi, kon bonu in ḻitodan in buk pinais kon inakó.

IḶUAIAN 31:18

Naonda in nopaḷut mako noyosingog i Musa kon tudu in Buḷud Sinai, ki Allah nobogoidon kon inia in batu doyowa inta pinomaisan i Allah kon parenta-Nea mita.

KORINTUS 2 6:16

Onubí in hubungan Baḷoi Tuhan bo baḷoi in berhala? Kita naa in Baḷoi Tuhan inta nobiag. Sin ki Allah tontaní ain noguman nanaa, “Akuoi in mogutunbí kon yua-yuak monia, bo mobiag moyotakin monia. Bo Akuoi in mobaḻí bidon ki Allah monia, bo mosia in mobaḻídon umat-Ku.

IḶUAIAN 24:12

Noiduduimai kon tua ki Tuhan noguman kon i Musa, “Angoidon kon i-Nakó kon tudu in buḷud. Kon tua ogoi-Ku kon inimu in batu doyowa inta pinomaisan-Ku kon bayongan hukum-Ku. Bayongan hukum tatua ogoi-Ku sin baḻíon totundú kon bangusa-Ku tatua.”

IBRANI 9:14

Dá aka dugú bo ḷobud mokodarit kon onu inta nokotor kon intau mita tatua, yo bambíkabí dugú i Kristus! Pinongin Roho inta diá mato-matoi, ki Kristus ain noposumba in awak-Nea tontaní kon i Allah saḷaku kuruban inta nosompurna. Tuabí in nondarit kon gina naton nongkon upacara mita inta diá in baragunanea, sinbá kita umuran mosumba kon i Allah inta nobiag.

AMSAL 3:3

Umuran popirisaya bo mokopotoindudui kon i Allah bo kon tumpaḷa intau. Torop intua bo tagú kon ginamu,

AMSAL 7:3

Umurandon torop in totundúku mita tatua, bo tagúdon kon bonu in ginamu.

MAZMUR 84:2

Totuu mokosanang in tampat pogogutunan-Mu, o Allah Inta Totok in mokawasa!

TESALONIKA 1 1:9

Bayongan intau in mongonguman kon naonda pinototomu monimu kon inami wakutu in namangoi kon i monimu. Inouman doman monia kon moiko in nonaḷámaidon kon onu inta pinomia monimu berhala inta sumbáan domanmai. Moiko nopirisayadon kon i Allah inta mobanar bo tongádon Sia in sinumba monimu.

MATIUS 16:16

Dá ki Simon Petrus in notubag, “Iko in ki Mesias, ki Adí i Allah Inta Nobiag.”

MAZMUR 42:2

Naonda bo rusa monanob kon tubig in ongkag, natuata in dimukudku monanob kon ini-Mu, o Allah.

IḶUAIAN 34:1

Onda intua ki Tuhan noguman kon i Musa, “Pomakangdon kon batu doyowa ná inta muna. Kon batu tatua pomaisan-Ku kon tosingogon mita ná inta koḻipod pinais-Ku kon batu inta ain irumogmu tua.

WAHYU 3:22

Ki ine in mokodongog, yo tarukira in onu inta pinoguman in Roho i Allah kon jamaat mita!”

WAHYU 2:18

“Paisdon kon malaekat in jamaat inta kon Tiatira, paisdon nanaa: Nanaa in koyow nongkon Adí i Allah inta mata-Nea moyongkit naonda bo tuḷu; bo sioḷ-Nea in naonda bo tambaga sinubá.

WAHYU 2:8

“Paisdon kon malaekat inta kon Smirna, nanaa: Nanaa in koyow nongkon i-Nia inta muna-munamai bo inta pangabisan – inta ain minatoi bo inta nobiag bui.

YEREMIA 10:10

Táe Iko, Tuhan, Allah inta mobanar, Ki Allah in mobobogoi in kobiagan, datu mononoi. Aka Iko tumorú, modandú in dunia, aka Iko rumogi yo bangusa mita in diábí mokotongod. (

YOSUA 3:10

Aka moiko mayádon monubu, yo notantú bidon kon untunonbí i Tuhan in intau in Kanaan, Het, Hewi, Peris, Girgasi, Amori bo Yebus. Bo kon dodai in Poti Dodandian i Tuhan inta nomaḻí kon dunia naa ḷumoḷandon kon Yordan umuna kon i monimu, yo ontongondon monimu kon ki Allah inta nobiag in kon yua-yuakdon monimu.

WAHYU 3:14

“Paisdon kon malaekat in jamaat Laodikia nanaa: Naadon in koyow nongkon i-Nia inta sinumangoi Amin, sakusi inta mosatia bo mobanar, pangkoi in bayongan yagi-yagi inta pinomia i Allah.

WAHYU 3:7

“Paisdon kon malaekat in jamaat kon Piladelpia nanaa: Naadon in koyow nongkon i-Nia inta Mokudus, Inta Mobanar bo ki Inta nokadai kon kokunsi i Daud; Aka Sia in mobuká yo diábí tobatúmai in mokoḻingkop; bo aka ḻingkopan-Nea, yo diábí doman tobatúmai in mokobuká.

WAHYU 2:12

“Paisdon kon malaekat in jamaat Pergamus, nanaa: Naadon in koyow nongkon i-Nia inta nokadai kon pitow moḷanit inta doyowa in matanea.

WAHYU 2:1

“Paisdon kon malaekat in jamaat inta kon Epesus, nanaa: Naadon in koyow nongkon i-Nia inta ḻima-Nea koḷanan in nokadai kon tundi pitu bo minayá kon sigad in sioḷ pototuduan kon togá inta pinomia nongkon buḷawan tua.

DANIEL 6:26

Nopaḷut mako kon tua ki Datu Darius nokidia in surat kon intau mita nongkon bayongan in bangusa, inanakan bo bahasa kon sinangkub in dunia, “Salam kobiagan motompia!

YEREMIA 17:1

Ki Tuhan in noguman, “Ei bangusa in Yohuda, dosamu in noikurigdon kon ginamu bo kon bayongan siku in mezbahmu mita pinais in polpen uatoi inta intau in matanea.

WAHYU 3:1

“Paisdon kon malaekat in jamaat Sardis, nanaa: Nanaa in koyow nongkon i-Nia inta kitogi roho pitu nongkon i Allah bo inta kitogi tundi pitu tua. Kinotaauan-Kubí onu in pinomia monimu: Moiko nion sinangoian nobiag, táe sabanarnea in minatoi bidon!

SAMUEL 1 17:26

Bo ki Daud in noguman, “Mobaranibí totok in intau in Pilistin kaper tatua monontot kon tontara i Allah inta nobiag!” Onda intua noḻibó in sia kon tontara tobatú, “Onu in ogoi kon intau inta mokoḻimod kon intau in Pilistin tatua bo momopat kon tosingogon mopoonagmai kon Israel?”

IḶUAIAN 32:15

Ki Musa in nosiḻigdon nongkon buḷud tatua takin kodia-dia in batu inta posiḷosi pinomaisan kon parenta mita i Allah.

KORINTUS 1 3:5

Sabanarnea ki inebí in ki Apolos andeka ki Paulus tua? Bá kotaauan monimu, kami naa in tongábí intau mita inta nogaid kon oaidan i Allah inta mopoyaput in Habar Mopia kon i monimu sinbá mopirisayadon in moiko kon i Kristus. Kami naa in tongábí mopobayá in oaidan inta pinoki aid i Tuhan kon inami.

KORINTUS 2 3:6

Bo Siabí doman tua in nobogoi in komampuan kon inami nobaḻí mogogaid mita kon oaidan i Allah kon tobatú dodandian nobagu; dodandian inta noyotogot in Roho i Allah, táe deemanbí kon hukum inta pinais. Sin hukum inta pinais tua in modiabí kon popatoi, táe aka Roho i Allah yo mobogoibí in kobiagan.

KORINTUS 2 3:7

Kon wakutu in dodandian inta modia kon popatoi tua inaidan bo pinais sinompiamai kon tudu in batu pomomaisan, sindar i Allah nonimbayag totok motarang kon pogot i Musa. Sindarnea tatua in mokotuḷow totok, sahingga intau mita in Israel diádon mokosanggup moindoi kon pogot i Musa tatua, umpaka wakutu intua sindar kon pogotnea tua mulaidon mokudow. Dá aka pinogaidan kon dodandian inta mokopatoi tatua bo sinimbayagan námai tua,