KORINTUS 2 13:5 - Alkitab Singog In Mongondow Masa In Tanaa

⁵ Tungkuḷaika uji in pirisaya monimu mongo totu-totuudon noidoyon kon pirisaya kon i Kristus! Taridiai kopia! Degá moiko in diápabí mopirisaya totok kon ki Kristus Yesus in oyúondon kon bonu in gina monimu! – sin aka diá natua yo moiko in diápabí monahang kon totungkuḷ.

KORINTUS 2 13:5 Referans Kwoze

OMBAḶ 3:40

Biódon mako kita in monaridi kon kobobiag naton, bo mobui kon i Tuhan Allah kon soroga. Igai bukatan naton in gina bo mosambayang,

KORINTUS 1 11:28

Manangka intua intau in mustipabí muna momirikisa kon awaknea bain tua bo motaau mokaan kon roti bo monginum kon anggur tatua.

KORINTUS 1 9:27

Táe ain bidon muna ilatihku in awakku bo nodaitku bidon kinawasa. Sinbá aka akuoi in modia kon intau tumakin kon poyotandingan tatua, yo akuoi in tantúbí doman tarimaan.

WAHYU 2:5

Tuamai, torop kon totuudon moyayú in kinoḷabúan monimu! Dá pogogaidon in mogaid kon dosa mita bo aidaidon in onu inta inaidan monimu muna. Aka diá, yo angoion-Kudon rabuton sioḷ in togámu tua nongkon tampatnea.

GALATIA 6:4

Pomuḷoi intau in mustibí moindoi kon oaidannea tontaní, mopia andeka diá in oaidnea. Aka mopia dá tuabí in mokosanang kon ginanea. Táe donaaibí mopoyobandingmai onu inta inaidan intau ibanea.

IBRANI 12:15

Ḷukadaibí sinbá diá tobatúmai in intau ḷumuai nongkon kobiagan inta pinodoyon kon totabi i Allah, sinbá diá in mobaḻí rasum inta mokopomuká kon ropatoi bo inta mokogoguyaat kon kobiagan intau mobayong.

KORINTUS 1 11:31

Táe aka akuondon muna naton in aid mita naton inta diá mopia, yo diábí hukumon i Allah in kita.

TITUS 1:16

Mosia in mongaku kon nonotaaudon kon i Allah, táe oaid monia in diábí noidudui kon inta kinoibog i Allah. Oaid monia tua mokorongó bo diá doman motoindudui; mosia tua in intaubí mita inta diádon mokomampu mogaid kon inta mopia.

GALATIA 2:20

Tongá akuoi in nobiag, táe deeman bidon akuoi, sin ki Kristus bidon in naa kon awakku. Bo kobobiagku tanaa mako in kobobiag bidon inta pinodoyon kon pirisayaku kon i Adí i Allah inta notabi kon inakó, bo inta ain noposarakan in awak-Nea tontaní sin kopontinganku.

YOHANES 14:23

Ki Yesus in notubag: “Intau inta motabi kon i-Nakó, dumuduibí kon totundú-Ku. Bo ki Amá-Ku in motabibí kon inia. Ki Amá bo Akuoi in mamangoibí kon inia bo mogutun moyotakinnea.

MAZMUR 26:2

Taridiaidon in akuoi, o Tuhan, bo tungkuḷaidon in akuoi, tarididon in ibog bo raianku.

SURAT I PAULUS KON JAMAAT RUM 8:10

Aka ki Kristus bo nobiagdon kon bonu in gina monimu, dá umpakabí awakmu matoi popisí in dosa, táe Roho i Allah mobogoibí in kobiagan kon inimu, sin hubunganmu takin i Allah in notompiadon.

MAZMUR 119:59

Akuoi in norai-raimaidon kon dodiaku, bo nodandi kon dumuduibí kon atorang-Mu.

HAGAI 1:7

Degá diádon kinotaauan monimu mongo nongonu sin mobaḻíbí intua?

IBRANI 4:1

Dandi i Allah tatua in umuranpabí pakéon, bo kita in ogoianbí in pogogaian inta pinodandi-Nea tatua. Manangka intua kita in musti umuran kiḷuka-ḷukadmai sinbá diá in tobatúmai kon sigad monimu in diá mokouḻí kon pogogaian inta pinodandi-Nea tatua.

KORINTUS 1 9:24

Kinotaauanbí monimu kon aka kon poyotandingan, yo bayongan mototanding in komintanbí moribatuk, táe tongábí tobatú in mokouḻí kon tombuinag. Tuamai in koḻikat totok in moribatuk sinbá moiko in mokouḻí kon tombuinag tatua.

KORINTUS 1 3:16

Degá diá kinotaauan monimu kon awak monimu nion in Baḷoibí i Allah inta pinogutunan in Roho-Nea?

HAGAI 1:5

Tungkuḷaika, taridiai in kaadaanmu!

YOHANES 15:4

Umuranbí potobatú-Ku bo Akuoi umuranbí doman motobatú takin i monimu. Tanga in diábí momungai tontaní aka diá in sia moidapoḷpa mako kon pangkoinea. Natua doman in moiko, momungai aka umuran motobatú takin-Ku.

MAZMUR 17:3

Aka ujion-Mu in ginaku bo mamangoi monaridi kon inakó kon dodai in doḷom, yo mouḻí-Mubí kon motuḻid in ginaku; onu in siningogku noitombutungbí kon onu in iraiku.

TITUS 2:2

Tongginaai in guyanga mita ḷoḷaki, sinbá mokotahang kon gina in mosia, mobijaksana bo mobiag saḷaku guyanga inta patus horomaton. Umuran doman kumadai kon totundú inta noitutui nongkon i Allah bo totu-totuu doman motabi bo mosabar aka koantugan in roriga.

EPESUS 3:17

Igumondon mako ki Kristus inta pinirisaya monimu in mogutundon kon bonu in gina monimu bo moiko in mobiag moidoyon kon bonu in tabi.

YOHANES 17:26

Pinotaau-Ku bidon kon i monia in tangoi i Amá bo umuran-Kubí popotaau intua, sinbá tabi i Amá kon i-Nakó umuran mako kon gina-gina mako monia bo Akuoi in motobatú i monia.”

YOHANES 17:23

Akuoi takin mosia, bo ki Amá takin Akuoi, sinbá mosia in totu-totuudon motobatú, sinbá kotaauandon in dunia naa kon ki Amábí in nopotabá kon i-Nakó bo ki Amábí in monotabi kon i monia ná tabi i Amá kon i-Nakó.

YAKOBUS 4:4

Moiko nion in intau inta diá mosatia! Diá kinotaauan monimu degá kon aka moiko moyobayat in dunia naa, yo moiko in mobaḻí saturu i Allah! Dá ki ine in moibog mobaḻí yobayat in dunia naa, yo mangaḻenea kon tua, baḻíonnea in sia saturu i Allah.

KOLOSE 2:7

bo monguakat kon bonu i Kristus Yesus. Moiko in musti moposindogdon in kobiaganmu bo ki Kristus in dodoyonanmu. Mustidon modugang in pirisaya monimu kon i Kristus, podudui in onu inta ain sinundú kon i monimu. Bo ginamu in umurandon moibo-ibog mopoyaput in sukur moantó.

KOLOSE 1:27

Kon umat-Nea tatua ki Allah in moibog moponiata kon totokbí in mopia bo moḷoben in onu in binuni kon intau mita ibanea. Naa inta binuni tatua: Ki Kristus tua in nionbí kon i monimu, bo tua in mangaḻenea, kon moiko in moitakin doman mokorasa kon kamuliaan i Allah.

KOLOSE 1:23

Manangka intua, moiko in musti umuran mosatia in mopirisaya bo umuran doman kumadai mokoporopot kon onu inta ain pinirisaya monimu. Dika modapot in ukatan monimu harapan inta ain inogoi kon i monimu wakutu in moiko notarimadon kon Habar Mopia nongkon i Allah. Habar Mopia tatua ain pinotaau kon bayongan intau kon dunia naa. Bo popisíbí in tuata, akuoi ki Paulus in nobaḻí mogogaid kon oaidan i Allah.

GALATIA 4:19

Uḻe adíku mita inta kinotabiku! Tanaa akuoi in bui notakit sin umuran morai kon i monimu. Takitku naa in naonda bo takit in monononggadí. Moajar totok in porasaanku, aka sipat mita i Kristus bo diápa noitonop kon bonu in gina monimu!

KORINTUS 2 6:16

Onubí in hubungan Baḷoi Tuhan bo baḷoi in berhala? Kita naa in Baḷoi Tuhan inta nobiag. Sin ki Allah tontaní ain noguman nanaa, “Akuoi in mogutunbí kon yua-yuak monia, bo mobiag moyotakin monia. Bo Akuoi in mobaḻí bidon ki Allah monia, bo mosia in mobaḻídon umat-Ku.

KORINTUS 1 6:19

Mustibí kotaauan monimu, kon awak monimu nion tampatbí in Roho i Allah. Roho i Allah tua in nogutunbí mako kon awak monimu. Awak monimu nion in deemanbí moiko in kitogi, táe ki Allahbí in kitogi.

KORINTUS 1 6:2

Andeka degá diábí kinotaauan monimu kon intaubí inta mopirisaya kon i Allah in mohakim kon bayongan intau kon dunia naa? Dá aka moiko bo motaau mohakim kon dunia naa, yo nongonu sin diábí paḷuton monimu in pelekara mita pongadilan inta diá in mangaḻenea tua?

YOHANES 6:56

Intau inta mokaan kon awak-Ku bo monginum kon dugú-Ku, umuranbí in Sia motobatú takin-Ku, bo Akuoi i motobatúnea doman.

YOHANES 6:6

Kinotaauan bidon i Yesus onu in musti aidan-Nea, táe Sia in noguman natua sin monungkuḷ kon i Pilipus.)

PETRUS 1 5:9

Ḷawang in sia takin pirisayamu inta moroton, sinbá kotaauandon monimu kon utat mita naton inta mopirisaya kon i Kristus kon bayongan dunia naa in nokorasa doman kon Roriga naonda bo moiko.

IBRANI 6:8

Táe aka tongá kobiagan in padang bo bayongan in díat, dá diá in baraguna in butá tatua sahingga kutukon i Allah bo pangabisannea pokakon modait.

YEHEZKIEL 18:28

Nosadardon in sia kon bayongan inta pinomianea bo nogogaidon in nogaid kon dosa. Yo sia tua in diábí matoi táe umuranbí mobiag.

KORINTUS 1 6:15

Kinotaauan bidon monimu uḻe utatku mita, kon awak monimu nion in notobatúbí i Kristus. Dá umpaka yo motaau gamáan in tobonsig bo pakéon mogaid kon inta diá mopia? Tantú diábí motaau!

SURAT I PAULUS KON JAMAAT RUM 1:28

Bo lantaran irasa in intau kon diábí paraḷu in mosia monotaau kon i Allah, dá pinomayá bidon mako i Allah in kogoguyaatan in raian monia, sahingga in nogaidon mosia kon soaḷ mita inta pinoton aidan.

TITUS 1:13

Bo totuubí in singog in nabi tatua. Manangka intua musti tongginaanmu kopiraan in mosia tua, sinbá mosia in umuran kumadai kon onu inta moitutui

TIMOTIUS 2 3:8

Sahingga in mosia tua naonda bo ki Yanes bo ki Yambres tungkuḷ intua inta umuran moḷawang kon i Musa. Natua doman in oaid in intau mita tatua umuran moḷawang kon totundú inta nongkon i Allah. Raian monia tua in nogoguyaatdon bo pirisaya monia tua in diádon tongo onu.

TIMOTIUS 1 2:15

Táe umpaka natua, bobay in posaḷamatonbí doman, sin mosia in mobogoi in buí. Asaḷ sia mokopoompá kon dodia bo mokopotantú doman kon pirisaya kon i Kristus bo umuran kototabian kon tumpaḷa intau, bo moposarakan doman in kobiagannea kon i Allah.

KOLOSE 2:19

sahingga in diádon kumadai kon i Kristus inta nobaḻí tongguḷu. Kon bonu in pimpinan i Kristus, bayongan in awak iḷukadan bo sinobatú in sendinea mita, poḷat nobiag podudui in ibog i Allah.

YEREMIA 6:30

Mosia in tangoianbí saḷaka iḷumbú, sin Akuoi, ki Tuhan, ain noḷumbú kon i monia.”