KORINTUS 2 1:10 - Alkitab Singog In Mongondow Masa In Tanaa

^10-11 Ki Allahbí tua in noposaḷamat kon inami nongkon yoyiga inta mokopatoi tua. Bo inta moposaḷamat kon inami kon singgai moiduduimai naa, sin tongábí Sia in binaḻí nami oandoḷan. Kami in moyakin bidon kon sambayang mita monimu kon inami indongoganbí i Allah, sahingga in posaḷamaton-Neabí in kami nongkon bayongan inta mokobodito kon i nami. Ki Allah in umuranbí nobogoi in barakat kon inami sin umuran monimu sinambayangan. Tuamai nobayongdon totok in intau mosukur kon i Allah.

KORINTUS 2 1:10 Referans Kwoze

TIMOTIUS 1 4:10

Manangka intua kita in musti moramuji mogaid, sin kita in tongábí moharap mako kon i Allah inta nobiag; Sia tuata inta mopoposaḷamat kon bayongan in intau, muna-munamai mosia inta mopirisaya.

PETRUS 2 2:9

Dá kotaauanbí i Tuhan in moposaḷamat kon intau mita inta dinumudui kon ibog-Nea aka mosia koantugan in sobaan mita. Bo kotaauanbí doman i Tuhan in motagú kon intau mita inta moraat sin sikisaan kon Singgai Ponantúan,

MAZMUR 34:19

Ki Tuhan in nodiug kon intau inta kinobuḻian in kamang; bo moposaḷamat kon intau inta noinggamá in ibog.

SAMUEL 1 17:37

Ki Tuhan ain noposaḷamat kon bobantung naa nongkon singa bo beruang, yo Siabí doman in moposaḷamat kon bobantung naa nongkon intau in Pilistin tatua.” Bo noguman in ki Saul kon inia, “Mopia, poigumon mako ki Tuhan motuḷung kon inimu.”

SURAT I PAULUS KON JAMAAT RUM 15:31

Sambayangaidon sinbá pilatandon i Allah in akuoi nongkon kawasa in intau mita kon Yudea inta diá mopirisaya bo bá oaidanku in modia kon totuḷung kon Yerusalem tarimaan in umat mita i Allah kon tua takin sanang in gina.

TIMOTIUS 2 4:17

Táe akuoi in umuranbí iḷukadan i Tuhan; bo inogoian-Neadon in ropot in akuoi sahingga in nokosanggupdon nopoyaput in Habar Mopia tatua, sinbá kodongogan domandon in bayongan intau inta deeman Yahudi, sahingga in akuoi noipilatdon nongkon onu inta mokobodito kon inakó.

OUMAN IN RASUL MITA 26:21

Tuamai in dinomok intau mita in Yahudi in akuoi kon bonu in Baḷoi Tuhan sin ḷongasion monia bo ḻimodon.

YESAYA 46:3

Indongogaidon in Akuoi, ei buí i Yakub, moiko komintan inta tonggagat in umat-Ku. Akuoi in nomiagdon kon i monimu pinangkoipamai kon moiko pinononggadí.

SAMUEL 1 7:12

Nopaḷut mako kon tua ki Samuel noposindog in batu tobatú, kon pinosigadan in Mizpa bo Sen. Sia in noguman, “Ki Tuhan totu-totuudon notuḷung kon inaton.” – Bo batu tatua in sinangoiannea “Batu Pinotuḷungan”.

DANIEL 3:17

Aka ki Allah inta sinumba nami mokoposaḷamat kon inami nongkon tuḷú inta kodoko-dokot tatua bo nongkon kawasa i Tuangku, yo notantúbí kon aidan-Nea intua.

DANIEL 6:16

Onda intua intau mita tatua bui namangoi kon tayowon i datu bo noguman, “Tuangku, mustibí toropon i Tuangku kon podudui in undang-undang in Media bo Persia, parenta inta ain pinoḷuai i datu in diábí motaau baḷú-baḷuian.”

KORINTUS 2 1:9

Sin nádon onda bo pinopoḷabúan in hukuman matoi. Tongá tua in nobaḻí mita sinbá kami in diá mopongata in ropot nami tontaní, táe umandoḷbí kon i Allah inta nobogoi in kobiagan kon intau.

KORINTUS 2 6:9

Kai monia in noyakag intau in nokotaau kon i nami, táe komintan intau in nonotaaubí kon inami. Sinangka monia kami in minatoi bidon, táe noniata kon kami in nobiagpabí. Umpakabí kami in pinogutú táe kami in diábí minatoi.