KORINTUS 1 7:17 - Alkitab Singog In Mongondow Masa In Tanaa

¹⁷ Naa in atorang inta pinobayáku kon bayongan jamaat: Pomuḷoi in intau musti mobiag tumompia podudui kon inta kinoibog i Allah, ná inta ain sinantú-Nea wakutu in nogoiní kon i monimu kon bá mopirisayadon kon i-Nia.

KORINTUS 1 7:17 Referans Kwoze

KORINTUS 1 4:17

Manangka intua pinotabákudon mangoi kon i monimu in ki Timotius. Saḷaku dumodudui i Kristus, sia in inanggapkudon ná ki adíku tontaní inta totok in kotabiku. Sia naa in adí inta totok in mojujur. Bain sia in mongonguman bui kon i monimu soaḷ kobobiagku wakutu in nopirisayadon in akuoi kon i Kristus, tuata in kobobiagku inta sinundúkudon kon bayongan in jamaat kon ondakadon.

KORINTUS 1 7:24

Táe naonda in kaadaanmu kon wakutu in inoiní i Allah, tantúbí kobiag natua takin i Allah.

KORINTUS 2 8:18

Bo kami in nopotabá doman in tobatú utat naton noyotakinnea, utat naton tanaa in totokbí i horomat in bayongan jamaat sin oaidannea nopoyaput in Habar Mopia nongkon i Allah.

KORINTUS 2 11:28

Bo pomuḷoi in singgai moḻia-ḻiaw doman in ginaku kon kaadaan in bayongan jamaat.

KORINTUS 1 7:18

Umpamanea, tobatú intau bo sinunatdon kon wakutu in inoiní i Allah, dá dikabí ramujion inggamáan in paḷot mita in sunat tatua. Natua doman, aka oyúon in diápa sinunat kon wakutu in inoiní i Allah, dá dika bidon poigumon konbá sunatonpa.

KORINTUS 1 7:7

Sabanarnea in mopiabí in ginaku aka komintan intau bo mobaḻí ná akuoi. Táe komintan intau ain bidon inogoian i Allah in totabi inta noyo-noyoposimai. Tobatú nokouḻí kon totabi nanaa, tobatú doman nokouḻí kon totabi natua.

KORINTUS 1 14:33

Sin doíbí in ki Allah kon kobobiag intau motombauk. Koibog-Nea in kobobiagbí inta motompia. Ná inta nobaḻídon kon bayongan jamaat i Allah,

MATIUS 19:12

Oyúon in intau diá mobuḷoi sin sia in pinolahirbí natua, bo oyúon doman in nobaḻí natua sin popisí in intau ibanea, bo oyúon inta ibogneabí tontaní in doí mobuḷoi sinbá motaau mogaid kon oaidan i Allah. Ki ine in mokosanggup motarima kon inta pinoguman-Ku naa yo pomayádon mako tarimaannea in naa.”

KORINTUS 1 16:1

Moiduduimai naa, soaḷ doit inta ogoi monimu posumbang kon intau mita Keresten. Anjuronku sinbá aidan monimu podudui in totundú inta pinogumanku kon jamaat mita inta kon Galatia.

KORINTUS 1 10:32

Kobiag mokopotompia bá diá tongá mokobaradosa kon bayongan in intau; pinomayá intau in Yahudi ande Yunani ande jamaat i Allah.

KORINTUS 1 11:16

Tongá aka oyúon in momayow kon soaḷ tanaa yo nanaa in pogumanku kita andeka jamaat mita i Allah ibanea, komintanbí tongá tobatú tatua in nobaḻí kabiasaan kon bonu in jamaat i Allah, diábí in ibanea mako.

KORINTUS 1 11:34

Bo munapa mongaan kon baḷoi in batangan, sinbá diá ḷagi gogoyon. Sin aka mosi duduian in moiko, yo ibada monimu tua in mopiabí. Diábí mokouḻí kon hukuman i Allah in moiko. Tongápabí naa in insilanganku kon i monimu, ibanea mako in bain moiangoi bui akuoi.

GALATIA 1:22

Táe wakutu intua jamaat mita inta kon Yudea, diápabí nonotaau kon inakó, sin diápa inontong monia.

TESALONIKA 1 2:14

Bayongan ginaḷum jamaat i Allah, onu inta kinorasaan monimu, kinorasaanbí doman in jamaat mita i Allah inta kon Yudea inta nopirisaya domandon kon i Kristus Yesus. Moiko in pinogutú doman in yobayat mita monimu tongoḻipúan, naonda bo inta kinorasaan in jamaat mita i Allah kon Yudea. Mosia in pinogutú doman in intau mita Yahudi.

TESALONIKA 2 1:4

Tuamai moiko in umuran oumanon nami kon jamaat mita inta kinobayáan nami. Mosanang totok in gina nami in mongonguman kon soaḷ kororoton in pirisaya monimu kon i Kristus, umpaka pogutúon bo koantugan in roriga.