KORINTUS 1 6:15 - Alkitab Singog In Mongondow Masa In Tanaa

¹⁵ Kinotaauan bidon monimu uḻe utatku mita, kon awak monimu nion in notobatúbí i Kristus. Dá umpaka yo motaau gamáan in tobonsig bo pakéon mogaid kon inta diá mopia? Tantú diábí motaau!

KORINTUS 1 6:15 Referans Kwoze

EPESUS 5:30

Kinotaauanbí naton intua, sin kita in anggota mita in awak i Kristus.)

SURAT I PAULUS KON JAMAAT RUM 12:5

Natua doman in kita. Umpaka kita in nobayong, táe kita in tongoawakanbí monag, sin kita ain notobatú kon i Kristus. Bo kita komintan in noyoguputbí in tobatú bo tobatú saḷaku anggota in awak tobatú.

KOLOSE 2:19

sahingga in diádon kumadai kon i Kristus inta nobaḻí tongguḷu. Kon bonu in pimpinan i Kristus, bayongan in awak iḷukadan bo sinobatú in sendinea mita, poḷat nobiag podudui in ibog i Allah.

KORINTUS 1 12:27

Moiko nion in komintanbí awak i Kristus bo komintan doman anggota-Nea.

EPESUS 4:12

Mosia naa in inogoi i Allah sinbá umat i Allah tokotompiaan sinbá mosia in motaau mogaid kon oaidan i Tuhan bo moduḷu moposindog in awak i Kristus.

KORINTUS 1 11:3

Tongá ibogonku in bá kotaauan doman monimu in atorang mita kon bonu in jamaat. Tongguḷu i Kristus in ki Allah. Tongguḷu in ḷoḷaki in ki Kristus. Yo tongguḷu in bobay tuata in ḷoḷaki.

KORINTUS 1 6:19

Mustibí kotaauan monimu, kon awak monimu nion tampatbí in Roho i Allah. Roho i Allah tua in nogutunbí mako kon awak monimu. Awak monimu nion in deemanbí moiko in kitogi, táe ki Allahbí in kitogi.

EPESUS 5:23

Sin ki buḷoinea ḷoḷaki tua in tongguḷu i buḷoinea, ná ki Kristus inta nobaḻí tongguḷu in jamaat bo Datu doman inta Mopoposaḷamat kon jamaat inta nobaḻídon awak-Nea.

LUKAS 20:16

Notantú bidon kon mamangoi in sia moḻimod kon mototomoyó mita tatua, bo gobá tatua in potomoyóneadon kon mototomoyó ibanea.” Nokodongogmai kon tua, intau mita in noguman kon i Yesus nanaa, “Poyayúdon kaasí.”

GALATIA 6:14

Táe akuoi in totuu kon doíbí dumodia kon onu inta ain inaidanku, koḻikudbí in modayow kon i Tuhan naton ki Yesus Kristus inta ain minatoi pinopopakú kon kayu pinoyotaḻempang. Lantaran Sia bo ain minatoi pinopopakú kon kayu pinoyotaḻempang, dá dunia naa in diá bidon in mangaḻenea kon inakó. Ná doman tua in akuoi kon tayowon in dunia naa, inanggap monia in akuoi naa naonda bo minatoidon.

GALATIA 3:21

Aka natua yo noyoposi degá in hukum i Musa bo dandi i Allah? Tantú diábí! Sin aka kuma hukum i Musa mobogoi in kobiagan kon intau, dá intau in motaaubí moyodame i Allah bo inta dumodudui kon hukum i Musa tatua.

GALATIA 2:17

Táe aka kami inta umuran moramuji mobiag moyodame i Allah bo motobatú i Kristus. Táe kino kadapatan doman in nogaid kon inta diá noitutui, ná aid in “intau mita baradosa” bo ná doman intau mita deeman Yahudi, yo motaau degá in singogon kon ki Kristusbí in nokopopisí sahingga in nogaid in kami kon inta noitaḷá? Tantú diábí motaau!

KORINTUS 1 6:13

Oyúon doman in nosingog kon kaanon tua in pinobonubí kon sian, sin sianbí in sinantú tampatnea. Táe sian bo kaanon tumpaḷabí diá in baraguna kon i Allah. Tuamai pakébí in awakmu mogaid kon onu inta kinoibog i Tuhan, deemanbí mogaid kon inta kinodoí-Nea sahingga in umuran-Neabí ḷukadan in awakmu.

SURAT I PAULUS KON JAMAAT RUM 7:13

Dá aka natua, yo degá inta mopia tua in mokopatoi kon inakó? Deemanbí tua! Dosabí in nokopoangoi kon popatoi tatua. Pinodoyon kon inta mopia, dosa in mokopoangoi kon popatoi kon inakó sinbá sipat mita in dosa koontongandon motarang. Pinongin parenta mita i Allah, moniatadon kon totokbí in moraat in dosa tua.

SURAT I PAULUS KON JAMAAT RUM 7:7

Aka natua, yo onu in singogon naton? Moraat degá in hukum agama in Yahudi? Tantú diábí! Sin hukumbí tatua in notundú kon inakó soaḷ dosa. Sin diábí kinotaauanku onu in sinangoian Ibog moiḻiu, aka hukum agama diá noguman, “Donaai motamaa.”

SURAT I PAULUS KON JAMAAT RUM 6:15

Tanaa, onu degá in simpodnea? Degá motaau in kita in mogaid kon dosa, sin kita in diádon nobiag kon bonu in kawasa in hukum agama Yahudi, táe nobiag bidon kon bonu in kawasa in totabi i Allah? Diábí motaau!

SURAT I PAULUS KON JAMAAT RUM 6:2

Tantú diábí natua! Dosa in diá bidon nongawasa kon i naton, manangka intua kita diá bidon in motaau aka dongka umuran mogaid kon dosa?

SURAT I PAULUS KON JAMAAT RUM 3:31

Yo motaau degá in singogon kon popisí in kita bo mopirisaya kon i Kristus, dá musti ḷumbúondon in hukum agama Yahudi tatua? Diábí motaau in mosingog natua! Justru popisí in oyúondon in pirisaya naton tatua, dá musti horomaton naton in hukum tatua.

KINOBAḺIAN 44:17

Guman i Yusup, “Diá! Akuoi in doíbí mogaid kon natua! Tongábí sia inta kino uḻían kon piala tatua in mobaḻí bobantungku. Ibanea in motaau bidon mobui kon i amámu.”

SURAT I PAULUS KON JAMAAT RUM 3:6

Táe totuubí kon diábí motaau in mosingog natua! Sin aka ki Allah bo diá moadil, yo naondabí in pohohakim-Nea kon dunia naa?

KORINTUS 1 6:3

Andeka degá diá kinotaauan monimu kon kita naa in mohakimbí kon malaekat mita? Apapa doman bo tongá pelekara inta mobaḻí pomuḷoi in singgai tua!

KORINTUS 1 6:17

Táe intau inta moibog motobatú i Tuhan, tantú rohonea in notobatúbí doman in Roho i Tuhan.