KORINTUS 1 4:21 - Alkitab Singog In Mongondow Masa In Tanaa

²¹ Tuamai piḻídon onu in koibog monimu! Moibog in moiko sinbá mamangoi takin sambok in akuoi andeka mamangoi takin pia in gina?

KORINTUS 1 4:21 Referans Kwoze

KORINTUS 2 13:2

Intau mita inta tungkuḷ intua ain nogaid kon inta diá mopia bo bayongan intau ibanea, koḻipod in munadon inogoianku in tompoingat wakutu in namangoi nokipodungkuḷ induanea in akuoi kon i monimu. Bo tanaa mako, kon wakutu in noyogiyayúanpa in kita, akuoi in bui mobogoi in tompoingat, kon akuoi in mamangoidon bui kon i monimu, yo diábí in tobatúmai in kon sigad monia tua in diá hukumon.

TESALONIKA 1 2:7

Táe kami in tongábí umuran mokopopia kon oaid wakutu in kon yua-yuakpa monimu, naonda bo guyanga bobay monompia kon i adínea.

KORINTUS 2 13:10

Tuabí doman in makusudku nomais kon surat tanaa kon wakutu in noyogiyayúanpa in kita. Sinbá aka akuoi bo mamangoidon kon yua-yuak monimu, yo diádon in akuoi mokoporogi in tumayow kon i monimu, podudui in kawasa inta inogoi i Tuhan kon inakó sin ponompia kon i monimu, deemanbí pomoguyaat.

KORINTUS 2 2:3

Manangka intua akuoi in nomais kon surat tanaa kon i monimu. Sinbá aka akuoi mamangoi, yo diá yoyigaan monimu in ginaku, sin tongábí moiko in haraponku mako motaau mopoḷunganga in ginaku. Sin moyakinbí in akuoi kon aka ginaku bo mosanang, yo moiko in mosanangbí doman komintan.

KORINTUS 2 1:23

Ki Allahbí tontaní in nobaḻí sakusiku – bo inta nonotaau kon ginaku – kon akuoi in diá nobaḻí namangoi in Korintus sin akuoi in doíbí mopoyoyigamai kon gina monimu.

YAKOBUS 3:17

Táe intau inta nokouḻí kon kabijaksanaan nongkon i Allah, yo sia in muna-munamai totok modarit, onda intua moibog in sia kon dodamean, mobahasa mako, bo motoindudui. Moḷoben in tabinea bo oaidnea mongopia. Diábí in sia momiḻí kon intau bo diábí tongá ki ubo-uboḷmai mopia.

KORINTUS 2 10:6

Bo aka moiko bo totu-totuu motoindudui, dá kami in mokobaḻí bidon in mohukum kon intau mita inta diá mongotoindudui.

KORINTUS 2 2:1

Tuamai in akuoi ain nonantú kon diádon bui in akuoi mamangoi kon i monimu, sinbá diádon tongá mopoajarmai in gina monimu.

KORINTUS 2 10:8

Akuoi in diábí mooyá aka akuoi tantú moduí mako kon kawasa inta ain inogoi i Tuhan kon i nami, sin kawasa tatua in ogoibí pomiag kon i monimu, deemanbí pomatoi.

KORINTUS 2 3:10

Motaaubí tangoion kon onu inta nobayag tungkuḷ intua, diá bidon ná kinobobayag in masa inta naa.

KORINTUS 1 5:5

intau tatua in musti posarakan monimu kon Ibilis sinbá moyoyang in awaknea táe rohonea in posaḷamaton kon wakutu in koangoian i Tuhan bui.

KORINTUS 1 4:18

Tongá tongonudon degá in kon sigad monimu in nobaḻídon mododia, sin kai monia kamai dá diá bidon mamangoi bui kon i monimu in akuoi.

KORINTUS 2 12:18

Totuu kon akuoi in nopotabá kon i Titus mayá kon i monimu, takin intau inta ki utat doman naton ibanea inta noyotakinnea. Táe umpaka yo nokoimontandon in ki Titus in motayak kon kauntungan kon i monimu? Mogaid tanaa, tujuan naminda in notongkaibí, natua doman in aid mita naminda!

GALATIA 6:1

Utat mita! Aka oyúon intau in kino kadapatan monimu nogaid kon noitaḷá, dá moiko inta nobiag noidudui kon ibog in Roho i Allah, musti modia bui kon intau tatua mongindaḷan inta moitutui. Táe koḷukóon in mosingog, bo moiko in musti mokopoingat sinbá diá kopongaruan doman.