KINOBAḺIAN 8:9 - Alkitab Singog In Mongondow Masa In Tanaa

⁹ Táe pinopisí in tubig umuranpa doman nonagom mako kon tudu in butá, dá ḷagapan tatua in diá nokouḻí kon pinonguyomanea. Dá nobuidon in sia kon uangga; Ki Nuh nopoḷuai in ḻimanea sinbá dompáan in ḷagapan tatua bo ḷagapan tatua in buineadon dinia pinotuot kon bonu in uangga.

KINOBAḺIAN 8:9 Referans Kwoze

MATIUS 11:28

Angoidon kon i-Nakó, moiko komintan inta mongoḷopí, bo intau inta kopota-potaan in mosibuḷ, sinbá ḷuatan-Kudon intua kon i monimu.

MAZMUR 116:7

Pinoodomku in ginaku, sin ki Tuhan in mopia kon inakó.

YOHANES 16:33

Naa komintan in poguman-Ku sinbá moiko in mokouḻí kon kobiagan motompia bo moonow sin notobatú-Kudon. Kon dunia naa moyoyangpabí in moiko, táe korotonbí in ginamu, sin Akuoi in diábí taḷowon in dunia naa!”

ULANGAN 28:65

Kon sigad in bangusa mita tatua moiko in diábí mokouḻí kon kobiagan mopia, bo diábí in tampat inta motaau tangoion monimu kapunyaanmu; Baḻíon i Tuhan in moiko totok in moondok bo koinggamáan in rigon in gina takin diá in andoḷan.

YESAYA 60:8

Onu degá in inta noiḷayug naonda bo goḷom naonda bo paḷoma inta iḷumayug nobui?

YEHEZKIEL 7:16

Tongosilai in kotaḻibanbí bo moḷagui mayá in buḷud. Kon tua mosia in nádon onda bo ḷagapan mita paḷoma inta binuntun nongkon ḷopá mita; komintanbí mogongot popisí in dosa mita monia.

KINOBAḺIAN 8:8

Kon dodai intua, ki Nuh bui nomuḻi kon ḷagapan paḷoma tobatú sin monotaau mongo tubig tatua in totu-totuudon nogiot.

KINOBAḺIAN 8:10

Ki Nuh in nogoḷatpa bui pitu nosinggai nongkon tua, bodongka bui nomuḻi kon ḷagapan paḷoma tatua.