KINOBAḺIAN 35:5 - Alkitab Singog In Mongondow Masa In Tanaa

⁵ Kon tungkuḷ in ki Yakub bo rombongan buḷoi, adí bo ginaḷumnea nobuat, ki Allah nogoḻingoi kon intau mita inta kon kotá tatua, dapot in mosia diá nogaḷow kon i Yakub bo rombongannea.

KINOBAḺIAN 35:5 Referans Kwoze

IḶUAIAN 23:27

Bangusa mita inta angoion monimu baḻíon-Kudon moondok kon i-Nakó; mosia in potombaukon-Kudon; bayongan musungmu modait momurow bo moḷagui.

TAWARIKH 2 17:10

Ki Tuhan nopobaḻí kon bayongan in dodatuan kon diugmai in Yohuda moondok in moparang monayow kon i Datu Yosapat.

MAZMUR 14:5

Intau moraat in totokbí in angoian in ondok, sin ki Allah in moḷukadbí kon intau inta motoindudui kon i-Nia.

YOSUA 5:1

Bayongan in datu in Amori kon dotá in toyopan kon Ongkag in Yordan, bo bayongan datu in Kanaan inta kon bingkí in Dagat Toyuak nokodongogdon kon Ongkag in Yordan ain iningkagan i Tuhan kon bonu in umat Israel iḷumoḷan kon ongkag tatua. Dá inagíandon in ondok in mosia bo uyotdon mako popisí in intau Israel.

ULANGAN 11:25

Kon bayongan butá tatua baḻíonbí i Tuhan Allahmu in intau mita kon tua agían in ondok kon inimu ná inta pinodandi-Nea, dá diádon tobatúmai in intau mokoḷamboi kon i monimu.

IḶUAIAN 34:24

Naonda in mopaḷut mako Akuoi mopoguntun in bangusa mita nongkon tayowonmu bo dugangan-Kudon in kooḷad in butámu, diá tobatúmai intau in mobarani mogagow kon butámu kon dodai in moiko mayá sin morame kon Pesta Roti Diá in Ragi, Pesta Pobatunan kon Boyó bo Pesta Pondok Daun.

SAMUEL 1 14:15

Onu inta nobaḻí tatua nokodoḻiok kon intau in Pilistin kon pinononḷoḷaigan bo kon popokaanan mita in bobiagon. Bayongan rayat in Pilistin takin tampat mita poḷoḷukadan bo paanan mita in mogogagow noondokdon; nodapot in butá nodandú, bo totokdon in nodowawá.

SAMUEL 1 11:7

Takin sinumorú totok nogamá in sia kon sapi doyowa bo iratánea poḷat pinogko-pongkónea kino bayong. Onda intua pongkóan mita tatua pinoki dianea kon bayongan butá in Israel takin parenta nanaa, “Ki ine in doí mayá moparang dumudui kon i Saul bo kon i Samuel, yo sapinea mita in pongko-pongkóon doman nanaa!” Bangusa Israel noondok kon onu in pomiaan i Tuhan moiduduimai, dá bayongan in intau, diábí in sinaḻiban, moibogdon mayá moparang moyotakin.

KINOBAḺIAN 34:30

Ki Yakub noguman kon i Simeon bo kon i Lewi, “Moiko mokopororigamaidon kon inakó. Tanaa intau in Kanaan bo intau in Peris bo bayongan intau kon butá kon naa moyaatdon in gina monia kon inakó. Intau mita naton tongábí topiḻik; aka komintan intau kon naa motobatú komintan moḷawang bo monubu kon inakó, yo bayongan buḷoi, adí bo ginaḷum naton modaitbí moyopú.”

KINOBAḺIAN 35:4

Bo mosia in noposarakandon kon i Yakub in bayongan patong dewa ibanea mako inta kodia-dia monia bo nganti-nganting doman monia. Komintan barang mita tatua nodait iḷobong i Yakub kon siungon in pangkoi kayu moḷoben kon diug in kotá in Sikhem.

ULANGAN 2:25

Pinangkoi kon singgai naa baḻíon-Ku in moiko kobangkaḷ in bangusa mita kon ondaka. Bayongan intau in mourotbí sin moondok aka mokodongog kon tangoi monimu.’ ”

MAZMUR 105:14

Táe ki Tuhan in diábí nopomayá kon i ineka in mondorot kon i monia; popisí in mosia, datu mita inogoian-Nea in tompoingat,

TAWARIKH 2 14:13

Ki Asa bo tontaranea in nondudur kon i monia nodapot in Gerar. Kon dotá in Sudan nobarong totok in minatoi dá tontara monia in diádon mokopongonu sin irimumudon i Tuhan bo tontara doman mita in Yohuda nogagowdon kon nobayong totok in pakakat monia. Onda intua tontara in Yohuda norimumud kon kotá mita kon butá mita inta kon diug in Gerar, sin ki Tuhan in nopobaḻídon kon intau mita inta kon tua inagían in ondok. Tontara in Yohuda nogagow kon bayongan in kotá tatua bo nokouḻí kon nobayong totok in pakakat.