KINOBAḺIAN 26:34 - Alkitab Singog In Mongondow Masa In Tanaa

³⁴ Tungkuḷ in ki Esau umurdon opat nopuḷú notaong, sia in nonika takin mongodeaga doyowa nongkon suku bangusa Het, tangoi monia ki Yudit ki adí i Beeri, bo ki Basmat ki adí i Elon.

KINOBAḺIAN 26:34 Referans Kwoze

KINOBAḺIAN 36:2

Ki Esau nonika takin bobay intau in Kanaan toḷu: ki Ada, ki adí i Elon intau in Het; ki Oholibama, ki adí i Ana bo ki ompu i Zibeon intau in Hewi;

IḶUAIAN 34:16

Aka ki adí mita monimu motonibuḷoi in bobay mita ango-angoi, yo mosia in dondouḷugandon in bobay mita tatua sinbá monaḷámaidon kon i-Nakó bo mosumbadon kon ilah mita monia.

KINOBAḺIAN 36:5

bo ki Oholibama in nopononggadí kon i Yeus, Yaelam bo ki Korah. Adí mita tatua noilahir kon butá in Kanaan.

KINOBAḺIAN 28:9

tuamai ki Esau minayádon kon i Ismael, ki adí i Abraham, bo notonibuḷoi takin ki adí i Ismael inta tangoinea ki Mahalat, ki adí i Nebayot.

KINOBAḺIAN 24:3

Pongibotdon podoyon kon i Tuhan, Allah inta nongawasa kon ḷangit bo butá, kon iko in diábí motayak kon bobay inta pobuḷoion i Ishak ki adíku nongkon sigad in intau mita in Kanaan tanaa.

IBRANI 12:16

Ḷukadaibí doman sinbá diá in intau mobiag mokotor andeka doí moguntun kon soaḷ mita inta nongkon i Allah, ná inta inaidan i Esau. Sia in nobarani totok nopotaḷui in haknea saḷaku adí guya-guyang tongá popisí in kaanon topindan.

KORINTUS 1 7:2

Táe bá diá moigonú in oaid inta diá patus aidan, dá maníka mobuḷoi andeka mokipobuḷoi.

KINOBAḺIAN 27:46

Dá ki Ribka in nogumandon kon i Ishak, “Moyaat in ginaku bo mobú in akuoi mokoontong kon i buḷoi mita i Esau inta nongkon suku bangusa mita ibanea tatua. Aka ki Yakub motonibuḷoi doman takin bobay mita intau in Het, dá maníka akuoi in matoidon.”

KINOBAḺIAN 28:8

Dá kinotaauandon i Esau kon ki Ishak, ki amánea tua in doíbí kon bobay in Kanaan,

SAMUEL 1 26:6

Onda intua ki Daud noḻibó kon i Ahimelek intau in Het tatua, bo kon i Abisai utat i Yoab (ki iná monia in ki Zeruya), “Ki ine in mokobaḻí tumuot takinku kon bonu in ḷoḷaigan i Saul?” Ki Abisai notubag, “Akuoi!”