KINOBAḺIAN 22:6 - Alkitab Singog In Mongondow Masa In Tanaa

⁶ Ki Abraham nopopotaan in kayu tatua kon obaga i Ishak, bo sia in nodia kon tosilad bo baga in tuḷú sin ponontuḷúan. Naonda in taya dua i adínea kon daḷan,

KINOBAḺIAN 22:6 Referans Kwoze

YOHANES 19:17

Ki Yesus iḷumuai takin kopota-potaan in kayu pinoyotaḻempang popopakúan kon i-Nia bo nopobayá in tampat inta sinangoian “Tampat in Ḷungkaká”. (Kon bonu in bahasa Ibrani sinangoian Joljuta.)

PETRUS 1 2:24

Ki Kristusbí tontaní in notanggung kon dosa mita naton. Tua mita in sinanggung-Nea kon tudu in Kayu pinoyotaḻempang, sinbá kita in moipilatdon kon bonu in kawasa in dosa, bo mobiagdon podudui in ibog i Allah. Kekeb-Neabí mita tatua inta mokopia kon i monimu.

MATIUS 8:17

Tua mita in mobaḻí sinbá motompodon Pirman inta pinoyaput i Nabi Yesaya, nanaa, “Sia tua in nomotaan kon yoyiga bo mongundam kon panyaki naton.”

YESAYA 53:6

Kita komintan in noiḷangkam naonda bo domba, kon batúannea notayak kon daḷannea-daḷannea. Ki Tuhan ain nopouma kon inia in bayongan aid naton inta moraat.

KINOBAḺIAN 22:5

Bo sia in noguman kon bobantungnea doyowa tatua, “Kon naadon kamunda takin keledai tanaa. Akuoi bo ki adíku in mayápa intua sin mosumba kon i Tuhan, buibí mamangoi in kami kon i namunda.”

DATU MITA 2 2:6

Onda intua nogumandon in ki Elia kon i Elisa, “Kon naapa. Akuoi in pinotabá i Tuhan mayá in Ongkag in Yordan.” Táe ki Elisa in notubag, “Podoyon kon i Tuhan inta nobiag bo podoyon kon nyawa i Amá, diábí in akuoi monaḷámai kon i Amá.” Dá nongingguputdon in mosia kon bobayáan nodapot in Ongkag in Yordan,