IMAMAT 6:21 - Alkitab Singog In Mongondow Masa In Tanaa

²¹ Topong tatua in mustibí poyobauion in ḷana, bodongka tubáan kon tudu in pogogangagan, onda intua ḷosi-ḷosion bo posumba mobaḻí kuruban oḷudon. Rongingi in kuruban tatua mokosanang kon gina i Tuhan.

IMAMAT 6:21 Referans Kwoze

IMAMAT 2:5

Aka inta pinosumba tatua bo roti inta inangag kon tudu in pogogangagan, dá roti tatua musti pomiaan nongkon topong inta moaḷus takin ḷana zaitun, táe diá ragian.

IMAMAT 7:9

Pomuḷoi in kuruban oḷudon inta sinubá kon bonu in tampat pototubáan ande dinungú kon bonu in rumping ande inta inangag, tua in nobaḻí silai i imang inta noposumba.

TAWARIKH 1 9:31

Inta mogaid kon bayongan in sosumba inta inangag in intau in Lewi tangoinea in ki Matica, adí guya-guyang i Salum nongkon inanakan i Korah.

IMAMAT 6:22

Buí i Harun inta binaḻídon Imang Moḷoben in mustibí umuran moposumba in kuruban tatua. Tua komintan musti tubáan sin mobaḻí sosumba kon i Tuhan.

IMAMAT 7:12

Aka kuruban tatua pinosumba takin makusud mopoyaput in sukur, dá poyotakinon in mahaḷuk tatua pokuruban in roti diá iragian. Roti tatua motaaubí inta mobunod nongkon topong pomiaan kukis takin ḷana in zaitun, motaaubí doman in roti noingkag monipit inta iḻepoan in ḷana, ande kukis topong inta pinomia pinoyotakin in ḷana zaitun.

TAWARIKH 1 23:29

Mosia doman in kitogi totaau kon inta moiduduimai naa: Roti inta pinosumba kon i Allah, topong inta pakéon posumba kon i Tuhan, kukis nonipit inta pinomia diá binaukan in ragi, kuruban inangag, bo topong inta binaukan in ḷana zaitun. Musti doman in mosia mosimbang bo mogiap kon sosumba mita inta dinia kon Baḷoi Tuhan.

IMAMAT 11:33

Aka mahaḷuk inta minatoidon tatua noḷabú kon bonu in kuyon butá, dá bayongan inta kon bonu in kuyon tatua mobaḻíbí monajis, bo kuyon tatua mustidon ḷosion.

IMAMAT 15:12

Kuyon butá inta iḻiai in intau tatua musti ḷosion bo pakakat inta kinadaiannea musti batáan.