Táe aka sia diá mokotongod in motobut kon butánea, dá intau inta notaḷui umuranpabí oyúon in haknea kon butá tatua modapot kon Taong Popobuian inta moiduduimai. Kon bonu in taong tatua butá tatua musti pobuion kon i toginea inta muna.
Aka sia bo diápa kobuḷoi kon dodai in nobaḻí atamu, dá ki buḷoinea in diábí motaau tumakin kon dodai in sia ḷumuai. Táe aka sia ain kobuḷoi kon dodai in sia nobaḻí atamu, dá ki buḷoinea in motaaubí tumakin kon inia.
Sia tuata inta ain noposarakan in awak-Nea sin mopoḷuat kon i naton nongkon bayongan inta moraat, bo kita in baḻíon-Nea tobatú umat inta noiḷuatdon nongkon kawasa in dosa bo tongádon mobaḻí umat-Nea inta morajing mogaid kon inta mopia.
Dosa in diá bidon mongawasa kon i monimu, sin moiko in diádon nobiag kon bonu in kawasa in hukum agama in Yahudi, táe kon bonu bidon kawasa in totabi Allah.
Musti potondí monimu in taong in ḻima nopuḷúnea tatua, bo mopotaau in kinoḷuatan in bayongan intau kon butá tatua. Kon bonu in taong tatua bayongan kapunyaan inta ain pinotaḷui musti pobuion kon i toginea inta muna ande kon buínea. Ki ine in pinotaḷui nobaḻí ata musti pobuion kon koluarganea.
Intau Israel tua in mogogundoibí mita i Tuhan; Siabí in nodia kon i monia iḻumuai nongkon Mesir, dá tuamai mosia in diábí motaau potaḷui mobaḻí ata.