IMAMAT 14:10 - Alkitab Singog In Mongondow Masa In Tanaa

¹⁰ Kon singgai noginwaḷu intau tatua musti modia kon ki adí in domba koḷakian doyowa bo ki adí in domba kobaayan tobatú inta umurdon totaong inta totok in mopia. Koḻikud intua doman topong toḷu nokilo inta ain binauian in ḷana zaitun noyoḷomboi monag in liter.

IMAMAT 14:10 Referans Kwoze

IMAMAT 2:1

Aka oyúon intau moposumba in kuruban sosumba kon i Tuhan, yo kuruban tatua in ná tanaa: topong inta totok in mopia inta binutakan in ḷana zaitun bo binubudan in kamania in tudunea.

LUKAS 5:14

Tongá diá inogoi Yesus in intau tatua moguma-guman mako kon intau ibanea kon onu inta ain inaidan-Nea tua. Táe pinotabá-Nea in intau tatua, “Bayádon in iko kon i imang bo ḻibó poḷat pokitantú kon inia kon iko in totu-totuu bidon nopia. Mopaḷut mako kon tua bayá in iko pobogoi kon kuruban ná inta pinarenta i Musa, sin tua in mobaḻí bukti kon intau mita kon iko in totu-totuu bidon nopia.”

MARKUS 1:44

“Pokoingat, donaai oumanon kon i inekadon, táe bayádon kon i imang bo pokitantúdon kon inia kon iko in totu-totuudon nopia. Bo pobogoi in iko kon sosumba sukurmu podudui in atorang i Musa mobaḻí bukti kon intau mita kon iko in nopiadon.”

MATIUS 8:4

Bo ki Yesus in noguman kon inia, “Toropdon in singog-Ku naa! Donaai oumanon kon i inekabí in onu inta nobaḻí tanaa. Táe bayádon bo pokiindoi kon imang, bo pobogoidon iko in sosumba ná inta pinarenta i Musa, mobaḻí bukti kon i monia kon nopia in iko!”

IMAMAT 14:21

Aka intau tatua nobiag nobogá bo diá mokopooyúon, dá mobaḻí kuruban toḻiu in karugian tatua motaaubí in sia modia kon ki adí in domba tobatú sin baḻíonnea kuruban tonoion kon i Tuhan. Koḻikud intua topong doman tokilo inta ain binauian in ḷana zaitun sin baḻíon kuruban oḷudon, bo ḷomboi monag in liter in ḷana zaitun.

IMAMAT 14:15

Onda intua ki imang mogamá kon ḷana zaitun topiḻik bo popoaḻinnea kon paḷad in ḻimanea tontaní inta kon dotá in koḷoigi.

IMAMAT 14:12

Ki imang musti mogamá kon ki adí in domba koḷakian inta tobatú tua takin noyoḷomboi monag in liter in ḷana zaitun sin baḻíon kuruban toḻiu in karugian, posumbanea mobaḻí sosumba tonoion kon i Tuhan.

PETRUS 1 1:19

táe dugúbí inta totok in momahaḷ, tuata in dugú i Kristus inta pinodugú naonda bo dugú in ki adí in domba inta diá nobogit ande diá pinaḻi-paḻían. Sia pinokuruban kon i Allah.

YOHANES 6:51

Akuoibí in roti inta noponag nongkon soroga, roti inta mobogoi in kobiagan. Intau inta mokaan kon roti tanaa in umuranbí mobiag. Roti inta ogoi-Ku kon kobiagan intau kon dunia naa in awak-Kubí.”

YOHANES 6:33

Sin roti inta inogoi i Allah in Siabí inta noponag nongkon soroga bo nobogoi in kobiagan kon intau kon dunia.”

YOHANES 1:29

Nopoikoḷomai kon singgai, indoianmai Yohanes ki Yesus namangoi kon inia. Bo ki Yohanes in noguman, “Indoiai, tuata in ki Adí in Domba i Allah inta momopat kon dosa in dunia.

PINOGIAPAN 28:20

Posumbadon in kuruban oḷudon inta ain sinantú, ná topong inta binauian in ḷana zaitun: topong toḷu nokilo in kon batúan sapi koḷakian, bo doyowa nokilo in kon domba koḷakian,

PINOGIAPAN 6:14

takin kodia-dia in bobiagon toḷu inta totok in mopia bo diaan mayá kon i Tuhan: domba koḷakian tobatú umur totaong in baḻíon kuruban payongon, adí in domba kobaayan tobatú inta umur totaong in baḻíon kuruban potobut kon dosa, bo domba koḷakian tobatú doman in baḻíon kuruban dodamean.

IMAMAT 23:13

Aka kon kuruban kaanon yo posumbadon in doyowa nokilo in topong bauian in ḷana zaitun. Rongingi in kuruban tatua mokosanang kon gina i Tuhan. Poyotakinon intua posumba domandon in anggur tongoliter.

IMAMAT 9:1

Tosinggai naonda in upacara pinomaḻían kon imang tatua nopaḷut, kon singgai noginwaḷu, ki Musa nogoiní kon i Harun bo kon i adínea mita takin itoi mita in bangusa Israel.

IMAMAT 4:32

Aka intau tobatú mopokuruban in domba tobatú mobaḻí kuruban potobut kon dosanea, dá domba tatua musti kobaayan inta mopia.

IMAMAT 2:13

Bayongan kuruban sosumba musti ibungan simuton, sin simuton mobaḻí tanda dodandian i Allah bo i monimu. Dá bayongan sosumba musti ibungan.

IMAMAT 2:11

Kuruban sosumba inta inogoi kon i Tuhan diábí motaau in bauian biluk ande ragi, sin biluk bo ragi, diábí motaau tubáan sin posumba kon i Tuhan.

IMAMAT 1:10

Aka inta pinosumba tatua bo domba tobatú ande bembé, dá biag tatua musti koḷakian bo inta totok in mopia.

IḶUAIAN 29:40

Poyotakinon ki adí in domba inta posumba doḷo-doḷom, musti doman posumba in topong torigu tokilo inta totok in nopira baukan in ḷana zaitun totokea toliter. Koḻikud intua toliter doman tubig in anggur.

IMAMAT 14:11

Bo sia musti diaan i imang takin sosumbanea tatua pobayá in tayowon ngara in Ḷoḷaigan i Tuhan.

IMAMAT 1:3

Aka inta pinosumbanea tua bo sapi tobatú, dá biag tatua in musti koḷakian bo inta mopia totok. Sapi tatua musti diaannea pobayá in ngara in Ḷoḷaigan i Tuhan, sinbá koibog i Tuhan in intau tatua.