IMAMAT 1:5 - Alkitab Singog In Mongondow Masa In Tanaa

⁵ Onda intua sapi tatua musti ratáan kon tayowon ngara in Ḷoḷaigan. Dugúnea musti posumba in imang mita inta buí i Harun kon i Tuhan, bodongka popobutak kon sí mita in mezbah inta opat tatua kon tayowon ngara in Ḷoḷaigan.

IMAMAT 1:5 Referans Kwoze

IMAMAT 3:8

Kon tua in sia bo musti mopoukat in ḻimanea kon uḷu in domba tatua bodongka ratáannea kon tayowon in Ḷoḷaigan. Bo imang musti mopobutak in dugú in domba tatua kon sí opat in mezbah.

IMAMAT 1:11

Intau tatua musti moratá kon biag tatua kon dotá in utuan mezbah, bo imang mita musti mopobutak in dugúnea kon sí opat in mezbah tatua.

IMAMAT 3:2

Intau inta moposumba intua musti mopoukat in ḻimanea kon tudu in biag tatua bodongka ratáannea kon tayowon ngara in Ḷoḷaigan i Tuhan. Imang mita buí i Harun musti mopobutak in dugú in sapi tatua kon sí opat in mezbah.

IBRANI 12:24

Moiko in namangoi sinumayow kon i Yesus, tonsigad in dodandian inta mobagu tua; moiko in sinumayow kon dugú pinomisik inta nojamin kon soaḷ mita inta mopia-pia nongkon onu inta jinamin in dugú i Habel.

TAWARIKH 2 35:11

Bo noratádon in mosia kon biag sin pakéon kon poramean kon Paska; intau in Lewi nonginkuḻit bo imang mita in mopopisik in dugú in bobiagon tatua kon tudu in mezbah.

IMAMAT 3:13

Kon tua sia musti mopoukat in ḻimanea kon uḷu in bembé tatua bo dongka ratáannea kon tayowon in Ḷoḷaigan. Imang musti mopobutak in dugú in biag tatua kon sí opat in mezbah tatua.

IḶUAIAN 29:16

Bo ratádon in biag tatua, gamá in dugúnea bo popobutak kon sí opat in mezbah.

IBRANI 10:11

Pomuḷoi in singgai imang intau Yahudi umuran mogaid kon oaidan monia saḷaku imang bo umuran doman mopobui-buimai in moposumba in kuruban mita ná inta biasamai pinosumba monia. Táe totuubí kon kuruban mita tatua in diábí mokopopat kon dosa.

MIKHA 6:6

Onu degá in musti posumba naton kon i Tuhan, Allah kon soroga, aka mamangoi in kita moibada kon i-Nia? Musti degá in kita modia kon sapi batánea inta totok in moḷomumu sin posumba baḻíon kuruban payongon kon i-Nia?

YEHEZKIEL 36:25

Mopaḷut mako kon tua moiko in pisikan-Ku in tubig inta mosilang, sinbá modaritdon nongkon bayongan in berhalamu bo nongkon bayongan yagi-yagi inta ain nokokotor kon i monimu.

YESAYA 52:15

Táe tanaa nobayong in bangusa in binaḻínea nongoherang, datu mita nongobió popisí in noitongau. Mosia in mokoontong bo momangaḻe, inta dungkuḷmai diá kinotaauan monia.”

PINOGIAPAN 18:17

Táe sapi, domba bo bembé inta muna pinogadí, in diábí motaau tobuton. Bobiagon tatua in sinantú bidon kon i-Nakó bo musti pokuruban. Pobutak in dugúnea kon mezbah bo ḷongónea in tubádon mobaḻí kuruban. Ronginginea mokosanang kon gina-Ku.

IMAMAT 16:15

Mopaḷut mako kon tua ki Harun musti moratá kon bembé sin pokuruban potobut kon dosa in umat Israel. Dugú in bembé tatua musti diaannea kon Yuang Totok Motusi, bo popopisik kon dotá in muna taḷob in Poti Dodandian bo kon tayowon Poti, ná pinogogaid kon dugú in sapi koḷakian.

IMAMAT 1:15

Imang musti modia kon ḷagapan tatua pobayá in mezbah, bodongka pitoian in sigogownea bo uḷunea tubáan kon tudu in mezbah. Dugú in ḷagapan tatua musti romputon poḷuai kon símai in mezbah.

IḶUAIAN 29:11

Ratádon in sapi koḷakian tatua kon tayowon-Ku kon ngara in Ḷoḷaigan.

IMAMAT 4:29

Sia in musti mopoukat in ḻimanea kon uḷu in mahaḷuk tatua, bodongka ratáannea kon dotá in utuan mezbah tampat pororataan kon mahaḷuk inta pokuruban mobaḻí kuruban tubáan.

IMAMAT 4:33

Sia in musti mopotudu in ḻimanea kon uḷu in mahaḷuk tatua, bodongka ratáannea kon dotá in utuan mezbah, tampat pororataan kon mahaḷuk inta mobaḻí kuruban tubáan.

IMAMAT 17:11

Nyawa in bayongan mahaḷuk komintanbí kon bonu in dugúnea. Tuamai ki Tuhan nomarenta sinbá bayongan dugú popobutak kon tudu in mezbah sinbá dosa mita in umat popatandon. Dugú inta nyawa tatua, momopat kon dosa.

SAMUEL 1 1:25

Sapi tatua in iratá, bo ki Samuel in inatod kon i Eli.

YEHEZKIEL 43:18

Ki Tuhan Inta Totok in moḷantud in noguman kon inakó, “Ei intau ilo-ilow, indongogaidon in onu inta poguman-Ku kon inimu. Aka mezbah tatua moḷapatdon aidan, mustibí toimpaḷutonmu pongin motubá kon kuruban kon tudunea bo pisikan in dugú in kuruban intua.

IḶUAIAN 40:6

Ukatdon in mezbah pototubáan kon kuruban kon tayowon ḷoḻingkop in Ḷoḷaigan.

IMAMAT 4:7

Tongosilai nongkon dugú tatua musti poḻepo kon tungoi mita inta kon siku mita in mezbah in dupa mobondu kon bonu in Ḷoḷaigan, bo kiagatnea kon tua in musti popobutak kon taḷog in mezbah in kuruban tubáan inta kon tayowon in ḷoḻingkop in Ḷoḷaigan.