IḶUAIAN 7:17 - Alkitab Singog In Mongondow Masa In Tanaa

¹⁷ Tuamai, ki Tuhan noguman nanaa, ‘Nongkon onu in aidan-Ku moiduduimai naa, yo kotaauanmudon kon Akuoibí in ki Tuhan. Tungkud tanaa pomobakku kon tubig in ongkag tanaa, bo tubig tanaa mobaḷuidon mobaḻí dugú.

IḶUAIAN 7:17 Referans Kwoze

IḶUAIAN 4:9

Aka mosia diápa doman mopirisaya kon inimu umpaka ain nokoontong kon inta mokoherang induanea tanaa, bo mosia doí doman mopandungmai kon tosingogonmu mita, yo pogamádon kon tubig topiḻik nongkon Ongkag Nil bo pobutakdon kon butá. Tubig tatua in mobaḻíbí dugú.”

IḶUAIAN 7:5

Dá intau in Mesir monotaaudon kon Akuoi naa in Tuhan, kon dodai in Akuoi mohukum kon i monia bo modia kon Israel ḷumuai nongkon butá monia”.

IḶUAIAN 5:2

“Ki ine in ki Tuhan tua?” iḻibó i datu. “Nongonu sin pandungonkubímai in Sia bo mobogoi kon bangusa Israel mayá? Diábí kinotaauanku in ki Tuhan tua, bo intau mita Israel in diábí ogoiku mayá.”

YEHEZKIEL 39:28

Dá kotaauandon in umat-Ku kon Akuoibí in ki Tuhan Allah monia. Sin Akuoibí inta nokidia kon i monia pinobayá in pinoḷumbúan, táe Akuoibí doman inta nodia kon i monia nobui kon butá monia tontaní, takin diábí nonaḷámai kon tobatúmai in intau nongkon i monia kon tua.

YEHEZKIEL 38:23

Natuata in aid-Ku moponiata kon bayongan in bangusa kon Akuoi in moḷantud bo motusi. Dá kotaauandon monia kon Akuoibí in ki Tuhan.”

MAZMUR 9:16

Bangusa mita inta diá nonotaau kon ini-Mu notopak kon bubú inta kinaḻi monia tontaní; mosia in noibaaḷ kon pukot monia tontaní.

WAHYU 11:6

Oyúon in kawasa monia mogoḻingoi kon ḷangit sinbá diápa monguyan kon dodai in mosia mopotaau in Habar nongkon i Allah. Mosia inogoian doman in kawasa mongawasa kon bayongan bokaká sinbá mosia in motaau momaḷui kon tubig mobaḻí dugú; bo oyúon doman in kawasa monia mosambok kon butá naa takin mopoḷabú in bayongan inta mokororiga, toonukabí in koibog monia.

WAHYU 8:8

Bo malaekat induanea in nogirup kon torompetnea, dá oyúon tobatú barang inta moḷoben naonda bo buḷud inta kodoko-dokot pinogarab kon bonu in dagat, dá sepertiga in dagat tatua nobaḷui nobaḻí dugú.

DANIEL 5:23

Ki Tuangku in dinumodia kon i Tuhan kon soroga bo nokobaḻí nokidia mangoi kon naa in bayongan palo mita inta ain inagow nongkon Baḷoi i Tuhan. Bo ki Tuangku takin intau mita moḷoben, bo ki buḷoi mita i Tuangku takin pahang mita i Tuangku in nonginum nomaké in palo mita tatua. Ki Tuangku in nodayow kon dewa mita inta pinomia nongkon buḷawan, saḷaka, bitú, uatoi, kayu bo batu, dewa mita inta diá mokoontong andeka mokodongog andeka momangaḻe kon onuka. Ki Tuangku in diá mohoromat kon i Allah inta nonantú kon kobiagan bo kopatoian i Tuangku bo inta monantú kon daḷan kobiagan i Tuangku.

DANIEL 5:21

Pinoguntun in sia nongkon sigad in intau bo ginanea in nobaḻídon ná gina in mahaḷuk. Sia in nobiag takin in keledai in kayuon, mokaan kon bonok naonda bo sapi bo mosiug kon rawang inta diá in oḻi-oḻingoinea dá nobuntad in oḷú. Kon imbuitnea sia in nongaku kon ki Allah Inta Totok in moḷantud in kitogi kawasa kon dodatuan in intau bo dodatuan tatua in ogoi-Nea kon i ineka in piḻíon-Nea.

DANIEL 4:37

Dá tanaa in akuoi, ki Nebukadnezar modayow, mopoḷantud bo mopomulia kon i Datu in Soroga. Bayongan in oaidan-Nea in moitutui bo moadil, bo Sia in mokopotungkudbí kon intau mita inta moḷoḷatú.

DANIEL 4:32

Iko in poguntunon nongkon sigad in intau mita, bo mobiag moyotakin in mahaḷuk mita kon rawang. Pitu notaong in koonggotnea iko in mokaan kon bonok naonda bo sapi. Mopaḷut mako kon tua iko in mongakudon kon Ki Allah Inta Totok in moḷantud in kitogi kawasa kon dodatuan in intau bo dodatuan tatua in inogoi-Nea kon i inekabí inta piniḻí-Nea.”

DANIEL 4:17

Tuata in bontow in tosingogon nami malaekat mita inta umuran kiḷuka-ḷukadmai bo inta tantú nokopoingat. Makusud nami in bá intau mita kon ondaka yo mongaku, kon ki Allah Inta Totok in moḷantud in kitogi kawasa kon dodatuan in intau bo dodatuan tatua in ogoi-Nea kon i inekabí in piniḻí-Nea, nodapotbí in kon intau inta totok in diá in mangaḻenea!’

YEHEZKIEL 32:15

Aka Mesir baḻíon-Kudon padang gurun inta moingongow, bo yompaton-Kudon in bayongan inta nogutun kon tua, yo kotaauandon monia kon Akuoibí in ki Tuhan.

YEHEZKIEL 30:19

Natuata Akuoi in mohukumbí kon Mesir, dá kotaauandon monia kon Akuoibí in ki Tuhan.”

YEHEZKIEL 30:8

Aka turubon-Ku in Mesir bo moḻimod kon bayongan in totakinnea, yo kotaauandon monia kon Akuoibí in ki Tuhan.

YEHEZKIEL 29:9

Mesir in mobaḻídon butá inta moingongow totok. Dá kotaauandon monimu kon Akuoibí in ki Tuhan.” Ki Tuhan in noguman, “Ei datu in Mesir! Popisí in iko in noguman kon Ongkag in Nil iko in kitogi bo iko in nomia,

MAZMUR 105:29

Ongkag monia binaḷuian-Nea nobaḻí dugú, dá nodait minatoi in toyá kon bonunea.

MAZMUR 83:18

Biódon mako in mosia modapot in mononoi pokopooyáanmai bo angoian in ondok, biódon mako in mosia matoi kon bonu in empeng.

MAZMUR 78:44

Ongkag mita monia binaḻí-Nea dugú, dá diá motaau in mosia monginum kon tubignea.

DATU MITA 2 19:19

O Tuhan, Allah nami, poḷuatdon in kami nongkon intau mita in Asyur tatua, sinbá bayongan in intau kon dunia in monotaaudon kon tongábí Iko tontaní in Allah.”

DATU MITA IMITÁNEA 20:28

Bo namangoidon in nabi tobatú kon i Datu Ahab bo noguman, “Naa in pinoguman i Tuhan: ‘Popisí in intau mita in Siria tatua norai kon Akuoi in tongábí nongawasa kon buḷud bo diábí in kon ḷopá, dá popountung-Kubí in moiko nongkon tontara monia inta diádon poḻiuan in kobayongnea tua. Iko bo rayatmu in monotaaubí kon Akuoibí in ki Tuhan.’ ”

IḶUAIAN 6:7

Moiko in diaan-Ku mayá in butá inta pinodandi-Ku takin nongibot kon i Abraham, kon i Ishak bo kon i Yakub; butá tatua in ogoi-Ku kon inimu mobaḻí kapunyaanmu tontaní. Akuoi naa in ki Tuhan.”

IḶUAIAN 1:22

Dá ki datu in nomarenta nanaa kon bayongan in rayatnea, “Bayongan adí ḷoḷaki intau Ibrani inta bagu pinononggadí musti pogonag kon Ongkag in Nil, táe bayongan adí monia bobay pomayádon mako in mobiag.”

IḶUAIAN 7:20

Ki Musa bo ki Harun nogaid kon onu inta pinoki aid i Tuhan. Kon tayowon i datu bo pogawainea mita, ki Harun notonggó kon tungkudnea bodongka pinomobak kon tubig in Ongkag Nil, dá tubig in ongkag tatua nobaḷui nobaḻí dugú

IḶUAIAN 10:2

bo bá motaau oumanonmu kon i adí bo kon i ompumu kon naonda in bangusa Mesir pinoyambá-Ku takin nogaid kon inta mokoherang mita tatua. Dá kotaauandon monimu komintan kon Akuoibí in ki Tuhan.”

YEHEZKIEL 25:17

Hukumon-Kubí in mosia kobogaton totok bo mopoaid in yaat in gina-Ku modapot in moorop. Aka konanamandon monia in torú-Ku, yo kotaauandon monia kon Akuoibí in ki Tuhan.”

YEHEZKIEL 32:6

Dugúmu in potampurangon-Kudon modapot in momuntad kon buḷud mita bo momuḻing kon ongkag mita.