IḶUAIAN 4:13 - Alkitab Singog In Mongondow Masa In Tanaa

¹³ Táe ki Musa in notubag, “Akuoi in mopoigum, dikadon mopotabá kon inakó mayá, kaasí Tuhan, potabádon in intau ibanea.”

IḶUAIAN 4:13 Referans Kwoze

YUNUS 1:3

Táe ki Yunus in tongábí minayá in kotá ibanea sin yumayú kon i Tuhan. Sia in minayá in Yope, noikoḷatbí nokouḻí kon kapaḷ inta mopobayá in Spanyol. Naonda in noguboḻi mako kon tondan in takoiannea, sinumakoidon in sia kon kapaḷ, bo dongka iḷumeag noyotakin in intau mita in kapaḷ nopobayá in Spanyol, sin yumayú kon i Tuhan.

IḶUAIAN 4:1

Bo ki Musa in noguman bui kon i Tuhan, “Táe naonda aka kuma bo intau mita in Israel doí mopirisaya bo diá doman mopandungmai kon tosingogonku mita? Onu in aidanku aka kuma bo mosia in moguman kon ki Tuhan in diábí nokipogontong kon inakó?”

YOHANES 6:29

Ki Yesus in notubag, “Tanaabí in kinoibog i Allah nongkon i monimu: Popirisayadon kon i-Nia inta pinotabá mangoi i Allah.”

MATIUS 13:41

Adí Intau nopotabá kon malaekat-Nea mita mosipun kon bayongan inta mokopoḷaḻe, bo komintan intau inta nogaid kon moraat kon bonu in Dodatuan-Nea.

YUNUS 1:6

Kon tungkuḷ in mododia kon kapaḷ tatua nopoonag, kinotambakanneamai yo ki Yunus in nosiugpabí. Dá sia in noguman, “Yo umpaka iko in mokoposiugpabí doman kon bonu in kaadaan ná domai naa! Yo, pobangon! Posambayang kon dewamu mokituḷung. Dika-dikabo motabipabí in sia kon i naton dá diá mobodito in kita.”

YEREMIA 20:9

Táe aka kon bonu in ginaku akuoi in moguman, “Biódon mako ki Tuhan in ḻiongonkudon, doídon in akuoi mosingog podoyon kon tangoi-Nea,” dá koyowmu in naonda bo tuḷú inta moborambang kon bonu in dodobku. Aindon sinungkuḷanku pinondam, táe diá mokoigon in akuoi.

YEREMIA 1:6

Akuoi in notubag, “O Tuhan Inta Totok in moḷantud, akuoi in diábí mopandoi mosingog sin akuoi in noiḻiupa in guod.”

HAKIM MITA 2:1

Malaekat i Tuhan nongkon Gilgal minayá in Bokhim bo noguman kon intau mita in Israel, “Akuoi ain nopoḷuai kon i monimu nongkon Mesir, bo nodia kon i monimu sinumuot kon butá inta pinodandi-Ku kon mogoguyang monimu. Ain doman pinoguman-Ku, ‘Dodandian-Ku takin i monimu in diábí bontowon-Ku.

IḶUAIAN 23:20

“Akuoi in mopotabá kon malaekat-Ku umuna kon i monimu sin moḷukad kon i monimu kon bonu in binayáan bo modia kon i monimu mayá in tampat inta sinadia-Ku.

KINOBAḺIAN 48:16

Sia tuata in malaekat inta ain nomilat kon inakó nongkon bayongan bodito. Poigumon mako ki Allah tatua in momarakat kon adí mita tanaa. Poigumon mako umuran mobiag in tangoiku bo tangoi i Abraham bo i Ishak sin adí mita tanaa! Poigumon mako mosia in mononggadí mononggompu, bo momuí mobarong kon dunia naa.”

DATU MITA IMITÁNEA 19:4

bo minaya-mayá in sioḷ ná padang gurun tosinggai in koonggotnea bo nogogai kon siungon in kayu inta mobambar. Kon tua iḻimitú in sia bo ibogonnea in bá matoidon. “Diádon in akuoi monahang, o Tuhan,” gumannea kon i Tuhan. “Gamádon in nyawaku. Akuoi in diábí mopia-pia nongkon mogoguyangku!”

KINOBAḺIAN 24:7

Ki Tuhan, Allah inta nongawasa kon ḷangit, aindon nodia kon inakó nongkon baḷoi i amáku bo nongkon butá in ginaḷumku, bo Sia ain nongibot kon inakó kon Sia in mobogoibí in butá tanaa kon buíku. Sia in mopotabábí doman in malaekat-Nea sin motuḷung kon inimu, sinbá iko in mokouḻí kon bobay tobatú kon tua sin baḻíon buḷoi i adíku.

IḶUAIAN 4:12

Tanaa mako, bayádon, Akuoi in motuḷung kon inimu mosingog bo motundú kon onu inta musti pogumanmu.”

IḶUAIAN 4:14

Bo ki Tuhan in sinumorúdon kon i Musa bo noguman, “Kinotaauan-Ku kon oyúon in kiutatmu ḷoḷaki tobatú inta ki Harun in tangoinea? Kinotaauan-Ku kon sia tua in mopandoibí mosingog. Sia tua in niondon tayo-tayow mangoi mopoangoi in naa, bo mopiabí in ginanea moyodungkuḷmu.