IḶUAIAN 32:8 - Alkitab Singog In Mongondow Masa In Tanaa

⁸ Mosia ain sinumabat kon parenta-Ku mita. Mosia nomiadon kon patong sapi nongkon buḷawan, bo sinumba monia poḷat inogoian monia in kuruban. Mosia ain noguman kon tuata in ilah monia inta nodia kon i monia iḷumuai nongkon Mesir.

IḶUAIAN 32:8 Referans Kwoze

DATU MITA IMITÁNEA 12:28

Naonda in noporai-raimai kon tua, nomia in sia kon patong sapi buḷawan bo noguman kon rayat, “Bangusa in Israel! Noonggotdon in moiko in minayá in Yerusalem sin moibada. Tanaa in naadon in ilahmu mita inta ain nodia kon i monimu iḻumuai nongkon Mesir!”

IḶUAIAN 20:23

Dika mogaid kon i monimu in patong mita saḷaka ande buḷawan sin sumbáan monimu ponoḻindua kon i-Nakó.

ULANGAN 9:16

Inontongkudon kon moiko ain noḷawang kon parenta i Tuhan Allahmu. Moiko binaradosadon kon i Tuhan sin nomiadon kon patong sapi nongkon logam sin sumbáan monimu.

HAKIM MITA 2:17

Táe diábí indoianmai monia in itoi mita tatua. Mosia in umuranbí nosumba kon ilah mita ibanea, bo diá doman mosatia kon i Tuhan. Mosia in diábí dinumudui kon oaid mopia in mogoguyang monia inta mongotoḷutui kon parenta mita i Tuhan.

IḶUAIAN 22:20

Ki ine in moposumba in kuruban kon inta ilah mita ibanea mako koḻikud in kon i-Nakó, inta Tuhan, yo musti hukumon matoi.

IḶUAIAN 32:4

Ginamá i Harun in nganti-nganting mita tatua, bodongka sinubánea nodapot in noḷoḷang bo binonunea kon pastaka tobatú bo pinomia patong sapi tobatú. Intau mita tatua noguman, “Ei Israel, naadon in ilah naton inta nodia kon i naton iḻumuai nongkon Mesir!”

IḶUAIAN 34:15

Dika momia kon dodandian takin bangusa kon butá tatua, sin kon dodai in mosia mosumba bo moposumba in kuruban kon ilah mita monia, mosia in monongganutbí kon i monimu, bo moiko in dumuduibí.

IMAMAT 17:7

Bangusa Israel musti tantú motoindudui kon i Tuhan bo diábí motaau mokoimontanmai moratá kon mahaḷuk kon gobá mita sin ogoi posumba kon dimukud mita moraat. Atorang tanaa musti umuran duduian modapot kon adí bo ompu.

ULANGAN 9:12

Bo ki Tuhan noguman kon inakó, ‘Ḷagidon posiḻig, sin bangusamu inta diniamu iḻumuai nongkon Mesir nomiadon kon inta moraat. Mosia sinumabatdon nongkon parenta-Ku mita, bo nomiadon kon patong sin sumbáan.’

ULANGAN 32:17

Mosia noposumba in kuruban kon dimukud mita moraat inta deemanbí ki Allah, kon i ilah mita inta diá kinotaauan monia, ilah mita mobagu inta diá kinoondok in mogoguyang monia.

MAZMUR 78:36

Táe mosia in nongakaḷ kon i-Nia, tosingogon mita monia komintan uboḷ.

YOSUA 22:15

Dá nodapotdon in mosia kon tampat in suku i Ruben, i Gad bo suku i Manasye kon butá in Gilead.

HAKIM MITA 8:24

Tongá noiduduimai kon tua ki Gideon noguman nanaa, “Tongá tobatú in igumonku; nganti-nganting inta inagow monimu kon musung, ogoidon komintan kon inakó.” (Intau in Midian nobiasa mogi nganti-nganting buḷawan; ná doman intau ibanea inta nogutun kon padang gurun.)

NEHEMIA 9:18

Mosia in nomia kon berhala ná batangan in sapi. Bo mosia in noguman, ‘Naa in ki Allahmu, inta nodia kon i monimu nongkon Mesir, nongkon pinononggataan.’ Oo Allah, Iko tontaní in siningkuḻe monia!

MAZMUR 106:19

Kon Buḷud in Sinai mosia in nomia kon ki adí in sapi nongkon buḷawan, bo nosumba kon patong inta pinomia monia tatua.

YESAYA 46:6

Intau mobuká kon dompet bo mogundak kon buḷawannea bo monimbang kon saḷakanea momaké in simbangan. Monondan in sia kon mononontaḷ kon buḷawan sin momia kon patong berhala, bo mosumba in sia kon patong inta pinomianea tontaní.

YEREMIA 31:32

Táe dodandian tatua in deemanbí ná dodandian inta pinomia-Ku takin mogoguyang monia kon dodai in mosia kinapit-Ku iḻumuai nongkon Mesir. Umpaka in Akuoi naonda bo ki buḷoi monia ḷoḷaki, táe mosia in nonoḻikud kon dodandian-ku takin i monia.