IḶUAIAN 31:6 - Alkitab Singog In Mongondow Masa In Tanaa

⁶ Ki Aholiab, ki adí i Ahisamakh nongkon suku Dan, ain piniḻí-Ku doman sin motuḷung kon inia. Bas mita inta mopandoi ogoian-Ku doman in toḻidat inta diá in poḻiu, sinbá mosia motaau mogaid kon onuka in pokiaid-Ku:

IḶUAIAN 31:6 Referans Kwoze

IḶUAIAN 35:34

Bo kon i Bezaleel bo kon i Aholiab, ki adí i Ahisamakh nongkon suku in Dan, ki Tuhan nobogoi in pandoi kon i monia motundú kon koahlian monia kon intau ibanea.

IḶUAIAN 35:10

“Bayongan in mogogimok inta mopandoi kon sigad monimu musti mamangoi sin mogaid kon bayongan inta pinarenta i Tuhan, tuata mita:

IḶUAIAN 28:3

Oinídon in bayongan mododagum inta ain inogoian-Ku in pandoi. Pokiaidaidon in mosia in pakeang i Harun sinbá motaaudon in sia tondíon-Ku tongá mogaid kon oaidan-Ku mobaḻí imang.

OUMAN IN RASUL MITA 13:2

Kon singgai tobatú wakutu in mosia nosambayang kon i Tuhan bo nopuasa, Roho i Allah in noguman kon i monia nanaa, “Piḻídon in ki Barnabas bo ki Saulus mobaḻí totabá-Ku, sinbá mosia in mogaid kon oaidan inta aindon sinantú-Ku pokiaid kon i monia.”

LUKAS 10:1

Noiduduimai kon tua, ki Yesus nomiḻí kon dumodudui-Nea ibanea pitu nopuḷú in kobayongnea bodongka nopotabá kon i monia. Mosia pinotabá tumododoyawa sin umuna kon i-Nia mayá in kotá bo tampat mita inta bayáan-Nea.

DATU MITA IMITÁNEA 3:12

dá onu inta pinoigummu tatua in ogoi-Kubí. Baḻíon-Ku in iko mobija-bijaksana bo mopando-pandoi nongkon i inekabí doman, pinomayá kon dungkuḷmai andeka kon singgai moiduduimai.

YAKOBUS 1:5

Aka oyúon in kon sigad monimu in diápa totok mobijaksana; yo musti mopoigum kon i Allah, dá ogoianbí i Allah in kabijaksanaan in sia. Sin takinbí pia in gina bo tabi in ki Allah in mobogoi kon batúan in intau.

IḶUAIAN 36:8

Onda intua, ki inta totok in motaau kon sigad in mogogimok mita tatua nomia kon Ḷoḷaigan i Tuhan. Ḷoḷaigan tatua pinomia monia nongkon mopuḷú nopongkó in kaeng moaḷus inta pinoyogaboḷ in kaeng wol nobidu, nokamumu bo nopura, bodongka pinoyogaboḷ doman gambar in kerub.

IḶUAIAN 6:26

Taya dua minayá kon tayowon i datu in Mesir sinbá sia mopoḷuatdon kon intau israel.

IḶUAIAN 31:5

sin mogatá mokopoḷamag kon batu permata inta sinoinut notompia; sin mongurig kon kayu bo kon bayongan yagi-yagi oaidan.

IḶUAIAN 35:35

Mosia inogoian in pandoi kon bayongan yagi-yagi oaidan in intau mita mopandoi mongurig, mononomayá bo inta mongopandoi mogaboḷ kon kaeng moaḷus, wol nobidu, nokamumu bo nopura, bo kaeng mita ibanea. Mosia tua in mononomayá inta motaau totok bo motaau doman totok momia kon bayongan in oaidan.

IḶUAIAN 38:23

Bobantungnea in ki Aholiab adí i Ahisamakh nongkon suku Dan, sia naa in mongongurig, mononomayá bo mogogaboḷ kon kaeng linen moaḷus, wol nobidu, nokamumu bo nopura.

IḶUAIAN 35:4

Ki Musa in noguman kon bayongan bangusa Israel, “Nanaa in parenta i Tuhan: