IBRANI 13:15 - Alkitab Singog In Mongondow Masa In Tanaa

¹⁵ Tuamai potonsigad naton kon i Yesus, kita in musti umuran modayow kon i Allah; tua in nobaḻí kuruban sukur naton kon i-Nia, inta pinosumba naton pinongin singog in bibig sin mopomulia kon tangoi-Nea.

IBRANI 13:15 Referans Kwoze

MAZMUR 50:14

Posumbadon in kuruban sukur kon i Allah, intompodaidon in dandimu kon i Inta Totok in moḷantud.

SURAT I PAULUS KON JAMAAT RUM 12:1

Utat mita! Ki Allah totok in mopia kon i naton. Manangka intua akuoi in mopoigum totok sinbá moiko moposumba in awakmu saḷaku sosumba inta nobiag sin kopontingan i Allah. Sosumba tatua in tongábí ogoi kon i Allah bo inta mokosanang kon gina-Nea. Tuabí in ibadamu inta sabanarnea.

PETRUS 1 2:5

Moiko nion in batu mita inta nobiag. Tuamai moiko in musti moibog pakéon pobaḷoi kon baḷoi i Allah inta kon soroga. Takin natua moiko in mobaḻí imang mita inta nobiag tongádon kon i Allah, bo inta pinongin i Yesus Kristus noposumba kon i Allah in kuruban inta mokosanang kon gina-Nea.

HOSEA 14:2

Pobuidon mangoi kon i Tuhan Allahmu, ei bangusa in Israel! Dosamu ain nokopopisí kon inimu norondog bo noḷabú.

YESAYA 57:19

Akuoi in mobogoibí in kobiagan moaman kon bayongan in intau, pinomayá inta nodiug andeka inta noyayú. Akuoi in monompiabí kon umat-Ku.

TAWARIKH 2 33:16

Onda intua sinompianea in mezbah tampat pooibadaan kon i Tuhan bo noposumba kon tua in kuruban dodamean bo kuruban sukur. Bayongan intau in Yohuda pinoki ibadaannea kon i Tuhan Allah in Israel.

MAZMUR 50:23

Intau inta moposumba in sukur mobaḻí kurubannea, siabí tua inta mohoromat kon i-Nakó; bo kon intau inta nosadia kon daḷan in poontong-Kubí in kasaḷamatan nongkon i-Nakó.”

IMAMAT 7:12

Aka kuruban tatua pinosumba takin makusud mopoyaput in sukur, dá poyotakinon in mahaḷuk tatua pokuruban in roti diá iragian. Roti tatua motaaubí inta mobunod nongkon topong pomiaan kukis takin ḷana in zaitun, motaaubí doman in roti noingkag monipit inta iḻepoan in ḷana, ande kukis topong inta pinomia pinoyotakin in ḷana zaitun.

MATIUS 11:25

Kon wakutu intua nosambayang in ki Yesus kai-Nia: “Akuoi in mopoyaput in sukur kon ini-Mu, Amá, Tuhan in ḷangit bo butá, sin bayongan intua binuni-Mu kon intau mita inta mobijaksana bo kon intau mopandoi, táe pinoponiata-Mu kon intau inta moyangkó.

TAWARIKH 2 7:6

Imang mita sinimindog kon tampat inta ain sinantú kon i monia; noyogintayow in intau in Lewi inta nodayow kon i Tuhan nomaké in pakakat mita in musik inta pinomia i Datu Daud, sindaḷan nopodondong in dondong “Tabi-Nea in mononoi!” Pinodudui kon onu inta pinoguman i Daud. Imang mita in nogirup kon torompet bo bayongan in rayat in simindog.

PETRUS 1 4:11

Intau inta mopoyaput in habar, sia mustibí mopoyaput in habar nongkon i Allah, intau inta mobantung kon intau ibanea, mustibí pakéonnea in ropot inta nongkon i Allah, sinbá kon bayongan in yagi-yagi ki Allah in dayowon pongin i Yesus Kristus. Sia tua in kitogi kamuliaan bo kawasa inta mononoi. Amin.

EPESUS 2:18

Pinotonsigad kon i Kristus, kita komintan, intau Yahudi andeka deeman intau in Yahudi, takin totuḷung in Roho i Allah inta tobatú tua, kita in motaau dimiug kon i Amá.

MAZMUR 118:19

Pobukataidon in akuoi kon ḷoḻingkop in ngara in Baḷoi Tuhan, sinbá tumuot in akuoi bo mopoyaput in sukur kon i-Nia.

MAZMUR 18:49

pinosaḷamat-Nea in akuoi nongkon ḷawangku mita. Tuhan, pinopountung-Mu in akuoi kon musungku, inoḻingoian-Mu in akuoi nongkon intau mita inta moḻingá.

NEHEMIA 12:43

Kon singgai tatua nobayong in kuruban inta pinosumba kon i Tuhan. Rayat noḷunganga in gina sin binaḻídon i Allah in mosia nopia in gina. Bobay mita bo mongo adí mita in sinumakin doman norame, bo singog monia inta moḷunganga tua in kinodongogan noidapot in moyayú.

IBRANI 7:25

Manangka intua ki Yesus in umuranbí motaau moposaḷamat kon intau mita inta namangoi kon i Allah inta mongin i-Nia. Sin Sia in nobiag mononoi bo umuran mopoyaput in mintahang kon i Allah sin kopontingan intau mita tatua.

KOLOSE 1:12

bo diá doman mokoḻiong in mosukur kon i Amá, sin ki Amá tua in nopopatus motarima kon onu inta sinadia i Allah kon umat-Nea inta nobiag kon bonu in bayag.

SURAT I PAULUS KON JAMAAT RUM 6:19

Popisí in moiko nobodokpa, dá akuoi in moguman kon contoh tanaa sinbá mogampang komangaḻean monimu. Tungkuḷ intua moiko noposarakan in bayongan awak monimu saḷaku ata in mogaid kon soaḷ mita inta mongoromú bo moraat sin makusud doman moraat. Tuamai in natua doman in masai naa, posarakaidon in bayongan awakmu saḷaku ata mogaid kon inta kinoibog i Allah sin makusud mopia i Allah.

YOHANES 10:9

Akuoibí naa in ḷoḻingkop. Ki ine in tumuot mongin i-Nakó mosaḷamat in sia, sia in tuot ḷuaibí bo mokouḻí kon kaanon.

NEHEMIA 12:40

Dá noiyaputdon in doyowa nopaanan mododondong tatua kon diug in Baḷoi Tuhan. Koḻikud in itoi mita kon bonu in paananku,

EZRA 3:11

Rayat nopodondong in dodayow kon i Tuhan, sindaḷan nopobui-buimai in dondong inta imbuitnea, nanaa, “Ki Tuhan tua in mopia; bo tabi-Nea kon Israel in mononoi.” Bayongan in rayat dinumudui nonggoḷokap bo nodayow kon i Tuhan, sin pondasi in Baḷoi Tuhan in pinoḻitúdon.

TAWARIKH 2 29:31

Nopaḷut mako kon tua ki Hizkia in noguman, “Popisí in moiko tanaa aindon sinondí kon i Tuhan, dá nobaḻí sosumba sukurmu, moiko in mustibí modia kon kuruban kon Baḷoi Tuhan.” Bo bayongan in intau inta kon tua in nodia kon sosumba mita tatua, nodapot in oyúon doman inta takinbí ibog monia tontaní nodia kon biag mita sin posumba mobaḻí kuruban payongon.

YOHANES 14:6

Ki Yesus in notubag, “Akuoibí naa in daḷan kon monotaau kon i Allah bo mokouḻí kon kobiagan. Diábí in tobatúmai intau in mokoyaput kon i Amá, aka diá mongin i-Nakó.

LUKAS 10:21

Kon wakutu intua doman, noḷungangadon in gina i Yesus, sin kinawasa in Roho i Allah. Ki Yesus in nosingog nanaa, “Akuoi in mosukur kon ini-Mu Amá, Tuhan in ḷangit bo butá sin bayongan intua aindon binuni-Mu kon intau mita inta mopandoi bo mobijaksana, táe aindon pinoontong-Mu kon intau mita inta nongobodok. Tuabí in kinoibog i Amá.

MAZMUR 119:108

Tarimapa kaasí in sambayang sukurku, o Tuhan, bo tundúdon in akuoi in hukum-Mu mita.

YEREMIA 33:11

Táe kon tampat mita tatua in kodongoganbí bui in singog ḷunganga bo pia in gina takin dowawá in ponikaan. Kodongoganbí doman in dondong in intau mita inta nodia kon kuruban sukur kon Baḷoi-Ku. Mosia in mogumanbí, ‘Posukurdon kon i Tuhan Inta Totok in mokawasa, sin mopia in Sia bo tabi-Nea in mononoi.’ Butá tanaa in baḻíon-Kubí mobiag motompia ná dungkuḷ. Akuoi, ki Tuhan, ain noguman.”

YEREMIA 33:18

umuranbí oyúon in imang mita nongkon suku in Lewi inta mogundoi kon i-Nakó bo moposumba in kuruban mahaḷuk, gandum bo sosumba inta pinayong.”

IBRANI 12:28

Tuamai, kita in musti umuran mopoyaput in sukur kon i Allah, sin kita in motarima kon tobatú dodatuan inta diá modandú nongkon i-Nia. Kita in musti mopoyaput in sukur bo moibada kon i Allah takin mohoromat bo moondok, podudui in onu inta kinoibog-Nea tontaní.