HOSEA 7:5 - Alkitab Singog In Mongondow Masa In Tanaa

⁵ Kon singgai bobutungan i datu, pinoinum monia in anggur in ki datu bo pojabatnea mita nodapot in noḷoḷangu bo nogaid kon inta nopompuḷong. Imbuitnea ki datu in noposanang in gina takin momomaḻidawan mita tatua.

HOSEA 7:5 Referans Kwoze

YESAYA 28:1

Moboditodon in kotá inta kino ibo-ibog in intau mita moḷoḷoḷangu in Israel! Kogaganea in mopopatdon naonda bo bungang inta noḷaḷow kon tudu in uḷu monia. Moboditodon in kotá inta noḷantud monik kon yuak in ḷopá inta noḷumbá, inta kinosanang in intau mita inta nongoḷoḷangudon totok.

EPESUS 5:18

Donaai in moiko moḷoḷangu in anggur, sin tua in mokogoguyaat kon i monimu, táe ramujidon bá Roho i Allah in mongawasa kon i monimu.

MARKUS 6:21

Pangabisannea ki Herodias nokouḻí kon kasampatan kon dodai in kinotompodan umur i Herodes. Dodai intua ki Herodes nogaid kon rame kon i monia inta nokadai kon jabatan mongoḷantud kon dodatuan, mosia inta porwira bo itoi mita in ḻipú in Galilea.

MATIUS 14:6

Tongá kon dodai in kinotompodan umur i Herodes, adí bobay i Herodias nomanari kon yua-yuak in mokokiangoi bo noposanang kon gina i Herodes,

DANIEL 5:23

Ki Tuangku in dinumodia kon i Tuhan kon soroga bo nokobaḻí nokidia mangoi kon naa in bayongan palo mita inta ain inagow nongkon Baḷoi i Tuhan. Bo ki Tuangku takin intau mita moḷoben, bo ki buḷoi mita i Tuangku takin pahang mita i Tuangku in nonginum nomaké in palo mita tatua. Ki Tuangku in nodayow kon dewa mita inta pinomia nongkon buḷawan, saḷaka, bitú, uatoi, kayu bo batu, dewa mita inta diá mokoontong andeka mokodongog andeka momangaḻe kon onuka. Ki Tuangku in diá mohoromat kon i Allah inta nonantú kon kobiagan bo kopatoian i Tuangku bo inta monantú kon daḷan kobiagan i Tuangku.

AMSAL 20:1

Oinumon mokoḷoḷangu mokopopisí kon intau mobaḻí ná diá dinidik bo modowawá. Bodokdon in intau inta monginum dapot in moḷoḷangu.

AMSAL 13:20

Intau inta moyobayat takin in intau mobijaksana, in mobaḻíbí mobijaksana; intau inta moyobayat in intau bodok, in moboditobí.

MAZMUR 69:12

Akuoi in nopogidaing in karong nobaḻí tomponuot nonogumatoi, táe sinigid monia in akuoi.

MAZMUR 1:1

Pia in kamang in intau inta diá dinumudui kon tonggina in intau inta moraat, diá dinumayan kon intau binaradosa bo diá noyobayat in intau inta mopoompámai kon i Allah,

DATU MITA IMITÁNEA 13:4

Kon dodai in kinodongogan i Yerobeam in tosingogon mita tatua, sinundúnea in nabi tatua bo nomaḷú, “Domok in intau tatua!” Táe kokaḷ i Yerobeam daḻídon notorondó dá diádon motaaunea okúon.

KINOBAḺIAN 40:20

Toḷu nosinggai noiduduimai kon tua in singgai kinotompodan umur i datu, bo sia nogaid kon rame moḷoben sin pogoiníannea kon bayongan pogawainea. Sia nomarenta sinbá mopoposadia in oinumonnea bo intau inta mopoposadia in kaanonnea poḷuaidon kon bonu in ponjara bo diaan kon tayowon in bayongan pogawai in komaḻig.

YESAYA 28:14

Indongogaidon onu inta pinoguman i Tuhan, ei mononingkuḻe mita inta nomarenta kon rayat kon Yerusalem!

HOSEA 7:3

Ki Tuhan in noguman, “Pinongin tompobaḻik bo aid mita inta moraat rayat moḷongasi moposanang in gina i datu bo in pojabat mita in pomarenta.