HAKIM MITA 6:25 - Alkitab Singog In Mongondow Masa In Tanaa

²⁵ Kon doḷom tua ki Tuhan nobogoi in parenta tanaa kon i Gideon, “Pogamádon kon sapi koḷakian i amámu, inta totok in mopia inta umur pitu notaong. Kokaidon in mezbah inta pinosindog i amámu kon i Baal, bo umpagdon in oigi inta nobaḻí lambang i Dewi Asyera inta kon dotá in mezbah tatua.

HAKIM MITA 6:25 Referans Kwoze

HAKIM MITA 3:7

Umat in Israel binaradosa kon i Tuhan, ki Allah monia. Mosia nokoḻiong kon i-Nia nodapot in mosia nosumbadon kon berhala mita i Baal bo i Asyera.

IḶUAIAN 34:13

Dá, dikadon mogaid kon natua, táe tokoumpagdon in mezbah mita monia, rimumudon in tugu mita karamat monia bo toko pupuḷdon in oigi mita i Asyera, berhala monia.

OUMAN IN RASUL MITA 5:29

Táe ki Petrus bo ki Yohanes in noguman, “Kami in mustibí mokidongog kon i Allah, deemanbí dumudui kon singog in intau nion.

MATIUS 10:37

Ki ine in motabi kon i amánea andeka kon i inánea moiḻiu kon tabinea kon i-Nakó sia tua in diá patus mobaḻí dumodudui-Ku. Natua doman ki ine in motabi kon i adínea ḷoḷaki andeka bobay bo moiḻiu kon tabinea kon i-Nakó, sia doman tua in diá patus mobaḻí dumodudui-Ku.

MATIUS 6:24

“Diábí in tobatúmai intau in motaau monontuang kon doyowa. Sin aka natua, yo tongábí tobatú in kotabinea, yo tobatú in diábí kotabinea, andeka tongábí tobatú in duduiannea, yo tobatú in diábí. Moiko in diábí motaau mobantung kon i Allah bo kon kapunyaanmu.

DATU MITA IMITÁNEA 18:21

Bo ki Elia in dinimiug kon rayat tatua bo noguman, “Dapotpa in toonu in moiko umuran motoḻindua in gina? Aka ki Tuhan tua in Allah, yo sumbadon in ki Tuhan! Aka Baal tatua in Allah, yo sumbadon in Baal!” Rayat inta noyosipun kon tua in tongádon kibio-biómai.

OUMAN IN RASUL MITA 4:19

Táe ki Petrus bo ki Yohanes in noguman kon i monia nanaa, “Raidon monimu kopia mongo onda in mopia-pia kon tayowon i Allah: Dumudui kon parenta monimu mongo dumudui kon parenta i Allah.

MAZMUR 101:2

Akuoi in monaridi kon kobobiag inta diá in bogit. Moibog degá in Iko mamangoi kon inakó? Akuoi in moibog mobiag motusi kon baḷoiku,

AYUB 22:23

Pobuidon mangoi kon i Tuhan takin ompá in gina koraatan kon baḷoimu in gogaiaidon.

ULANGAN 7:5

Tuamai, umpagdon in mezbah mita in bangusa mita tatua, rimumudon in oigi mita batu inta inanggap monia mokaramat, pupuḷdon in lambang mita i Asyera, bo tubádon in patong mita berhala inta sinumba monia.

KINOBAḺIAN 35:2

Bo ki Yakub in noguman kon buḷoi, adí ginaḷumnea bo kon bayongan intau inta kotaki-takinnea, “Kita in mobuatdon nongkon naa bo mayá in Betel. Kon tua akuoi in moposindogdon in mezbah kon i Allah inta ain notuḷung kon inakó kon dodai in kinoantugan in roriga bo inta ain noḷukad kon inakó kon ondaka in binayáanku. Dá ḷumbúdon in patong dewa mita ibanea mako inta kodia-dia monimu; aidaidon in upacara pondaritan kon awak bo pakédon in pakeang inta modarit.”

HAKIM MITA 2:11

Onda intua intau in Israel binaradosadon kon i Tuhan. Mosia in diá bidon nosumba kon i Tuhan, Allah in mogoguyang monia, ki Allah inta ain nodia kon i monia iḻumuai nongkon Mesir. Mosia nomangkoidon nosumba kon i Baal bo kon i Asytoret takin dewa mita ibanea inta sinumba in bangusa mita inta kon diugmai monia. Dá ki Tuhan sinumorú kon i monia bo pinomayá-Neadon mako in musung nonubu bo nogagow kon i monia. Mosia kinodaitandon in akaḷ in tumayow kon musung mita inta ain noḻipung kon i monia.

HAKIM MITA 6:26

Posindogdon kon tua in mezbah tobatú inta ain inaidan sinompia mangoi. Onda intua sapi koḷakian tatua komintan, musti tubáanmu komintan mobaḻí kuruban kon i Tuhan. Pondungúdon in kayu oigi inta nobaḻí lambang i Dewi Asyera inta ain inumpagmu tua.”