HAKIM MITA 16:7 - Alkitab Singog In Mongondow Masa In Tanaa

⁷ Ki Simson in notubag, “Aka akuoi bo togoton in tontogot in piot pitu inta mobagu inta diápa moingkag totok, yo moḻemédon in akuoi bo mobaḻídon akuoi ná intau biasa.”

HAKIM MITA 16:7 Referans Kwoze

KOLOSE 3:9

Dikadon mosiuboḷan sin ain sinaḷáan monimu in kobobiag koḻipod bo tabiatnea.

GALATIA 6:7

Dika moibog uboḷan. Sin ki Allah in diábí motaau in pogogitogan! Sin onu in pomuḷaan intau yo tuabí doman in sipuonnea.

SURAT I PAULUS KON JAMAAT RUM 3:8

Bo nongonu sin kita in diá doman motaau in moguman, “Koḻigai, kita in mogaid kon inta moraat sinbá momukádon in inta mopia?” Totuubí kon oyúonbí in intau mohojat kon inakó bo moguman kon akuoi ain nosingog kon natua. Intau mita natua in patusbí hukumon i Allah.

AMSAL 17:7

Intau inta ihoromat in diábí patus mosingog kon uboḷ; intau bodok diábí patus mosingog kon tosingogon mita inta baraguna.

AMSAL 12:19

Uboḷ in moibukábí doman kon bonu in tongá tokokiap in mata, táe tosingogon mita inta mobanar in mononoibí.

SAMUEL 1 27:10

Aka ki Akhis moḻibó kon inia, “Kon onda in bayáanmu ponubuan in tanaa?” Dá ki Daud in moguman kon inia kon sia in minayádon kon dotá in toḷatan in Yohuda andeka kon butá in intau in Yerahmeel andeka butá pinogutunan in intau in Keni.

SAMUEL 1 19:17

Ki Saul noguman kon i Mikhal, “Mokobaḻíbí totok in iko monguboḷ kon inakó nanaa! Musungku ain sinuḷunganmu noḷagui!” Tubag i Mikhal, “Sia in nopogogondok moḻimod kon inakó aka doí motuḷung kon inia moḷagui.”

HAKIM MITA 16:10

Bo ki Delila noguman kon i Simson, “Ah, nonguboḷ in iko! Iko nion in tongábí mopoyambá kon inakó. Oumandon kaasí kon inakó mongo onu in motaau potogot kon inimu!”

HAKIM MITA 16:6

Dá ki Delila in noguman kon i Simson, “Simson, nongonu sin iko in totuubí moropot? Onubí in potogot kon inimu sinbá moinggamá in ropotmu tatua? Pogumanka in inta noibuni tatua!”

HAKIM MITA 16:8

Bo pongawasa mita in Pilistin tatua nobogoidon kon i Delila in tontogot in piot pitu inta mobagu inta diápa totok in noingkag. Onda intua, koyogot in intau in Pilistin nogoḷat mako kon yuang ibanea, ki Delila nopotogotdon kon i Simson in tontogot tatua bodongka nomaḷú, “Simson! Intau in Pilistin nion!” Baḷúdon i Simson binontow in tontogot mita in piot tatua. Tontogot mita tatua nobontow naonda bo siningkoi inta kinotugatan in tuḷú. Kinodoyonan in ropot i Simson diápa doman kinotaauan.