GALATIA 3:12 - Alkitab Singog In Mongondow Masa In Tanaa

¹² Táe hukum i Musa in diábí pinodoyon kon pirisaya. Sin kon Buk Motusi ain pinais, intau inta dinumudui kon hukum i Musa, mobiag sin hukum tatua.

GALATIA 3:12 Referans Kwoze

IMAMAT 18:5

Duduiaidon in atorang mita bo hukum mita inta ogoi-Ku kon i monimu. Aka aidan monimu in natua, mosaḷamat in kobobiagmu. Akuoi naa in ki Tuhan.”

NEHEMIA 9:29

Sinoboḷow-Mu in mosia sinbá totundú-Mu in duduian, táe diá sinarima monia in hukum-Mu takin dinumodia. Bokaka, aka hukum-Mu aidan, yo notantúbí kon koḷukadan in kobiagan. Mosia motogat in uḷu bo motogat doman in gina, doí mokidongog, bo doí dumudui.

SURAT I PAULUS KON JAMAAT RUM 4:14

Sin aka tongá intau mita motoindudui kon hukum in agama Yahudi in motarima kon onu inta pinodandi i Allah, dá pirisaya kon i Allah in beresibí diá in baragunanea bo dandi i Allah tatua in diábí in mangaḻenea.

SURAT I PAULUS KON JAMAAT RUM 4:16

Dandi i Allah tatua in pinodoyonbí kon pirisaya in intau tatua kon i Allah. Tua in nobaḻí tobatú jaminan kon bayongan buí i Abraham, kon dandi tatua in inogoi kon i monia saḷaku tobatú oogoi inta pinonotabi i Allah, deemanbí tongá kon i monia inta motoindudui kon hukum in agama Yahudi, táe kon i moniabí doman inta mopirisaya kon i Allah. Ná ki Abraham inta totok in mopirisaya kon i-Nia. Ki Abraham tua in ki amábí naton komintan inta mopirisaya.

YEHEZKIEL 20:11

Kon tua inogoi-Ku kon i monia in parenta-Ku mita bo sinundú-Ku in hukum-Ku mita inta musti duduian monia, sin intau inta dumudui kon tua in umuranbí mobiag.

SURAT I PAULUS KON JAMAAT RUM 11:6

Ki Allah in nomiḻí kon i monia sin pinodoyon kon tabi-Nea, deemanbí pinodoyon kon aid monia. Sin aka Sia nomiḻí kon i monia pinodoyon kon aid in intau, dá tabi tatua in deeman bidon totu-totuu tabi.

MATIUS 19:17

Ki Yesus in noḻibó, “Nongonu sin iko in moḻibóbí kon i-Nakó kon onu inta mopia? Tongábí tobatú in mopia. Aka iko moibog mobiag, yo duduiaidon in bayongan parenta i Allah.”

YEHEZKIEL 20:13

Táe kon rawang in bungaion doman tatua noḷawang in mosia kon i-Nakó. Mosia in iḻimimpat kon parenta-Ku mita, bo nondoí kon hukum-Ku mita inta nopodandi kon intau mita inta umuran dumudui kon tua in mobiagbí. Mosia in totokbí in noporaa-raatmai kon singgai in Sabat. Tuamai, kon rawang in bungaion tatua nosadiadon in Akuoi mopoḷuai in torú-Ku kon i monia bo moyopú kon i monia.

SURAT I PAULUS KON JAMAAT RUM 7:10

bo akuoi in minatoi. Dá hukum agama tatua, inta muna pinopomakusud kon mobogoi in kobiagan, táe naanta mokopoangoibí kon popatoi kon inakó.