GALATIA 1:1 - Alkitab Singog In Mongondow Masa In Tanaa

^1-3 Utatku mita jamaat i Allah inta kon Galatia. Akuoi ki Paulus takin bayongan utat naton intau Keresten inta koyota-yotakinku, moharap mako sinbá ki Allah, ki Amá naton bo ki Tuhan Yesus Kristus in umuran mako mobogoi in barakat bo totabi kon i monimu komintan. Akuoi naa in nobaḻí rasul deemanbí ibog in intau andeka intau in nopobaḻí kon inakó, táe ki Yesus Kristusbí bo ki Allah inta ki Amá naton, inta nomiag doman bui kon i-Nia nongkon sigad in intau minatoi.

GALATIA 1:1 Referans Kwoze

KORINTUS 1 1:1

Utat mita jamaat i Allah kon Korintus! Moiko inoinídon i Allah mobaḻí umat-Nea sin moiko kapunyaan i Kristus Yesus, moyotakin in bayongan intau nongkon ondakadon inta nosumba kon i Tuhan naton ki Yesus Kristus, ki Tuhan monia bo ki Tuhan naton doman. Akuoi ki Paulus, bo ki utat naton ki Sostenes, mopoigum mako sinbá ki Allah, Amá naton bo ki Tuhan Yesus Kristus in umuran mobogoi in barakat bo kobiagan motompia kon i monimu. Akuoi in nomais kon surat tanaa saḷakubí rasul i Kristus Yesus inta inoiní i Allah tontaní podudui in ibog-Nea.

WAHYU 1:5

bo nongkon i Yesus Kristus, sakusi inta mosatia. Sia tua inta muna-munamai totok biniag bui nongkon kinopatoian bo Sia doman in nongawasa kon bayongan datu kon dunia naa. Ki Yesus in motabi kon i naton, tuamai Sia in noibog minatoi sin momilat kon i naton nongkon kawasa in dosa mita naton,

SURAT I PAULUS KON JAMAAT RUM 1:1

Utatku mita kon Rum inta kinotabi i Allah bo inta ain piniḻí-Nea sin baḻíondon umat-Nea. Akuoi in piniḻídon i Allah bo ain binaḻí-Nea intau inta mopotaau in Habar Mopia nongkon i-Nia.

EPESUS 3:8

Kon sigad in bayongan umat i Allah, yo akuoibí naa in totok in mokooyá. Táe ki Allah ain noponotabi in oaidan tanaa kon inakó; oaidan mopoyaput in Habar Mopia soaḷ kaoyúonan i Kristus inta diá modai-dait;

TITUS 1:3

Sin kon wakutu inta ain sinantú-Nea, pinoniata-Neadon in dandi-Nea tatua kon bonu in koyow-Nea. Koyow-Nea tatua inta pinoki aid-Nea kon inakó, bo tuata in pinotaa-taauku mako podudui in parenta i Allah inta mopoposaḷamat naton.

KORINTUS 2 1:1

Utatku mita jamaat i Allah inta kon Korintus bo bayongan intau inta ain piniḻí i Allah kon Akhaya. Akuoi, ki Paulus, rasul i Kristus Yesus, inta ain binaḻí i Allah rasul-Nea takin ki utat naton ki Timotius,

TIMOTIUS 2 1:1

Uḻe Timotius adíku inta totok in kinotabiku! Akuoi, ki Paulus, nomais kon surat tanaa, mopoigum mako doa sinbá ki Allah inta ki Amá naton bo ki Yesus Kristus, Tuhan naton in umuran mobogoi kon inimu in barakat, totabi bo kobiagan motompia. Pinoduduibí kon ibog i Allah akuoi naa in nobaḻí rasul i Kristus Yesus bo poḷat pinotabá mopotaau in daḷan kobiagan inta pinodandi i Allah. Kobiagan tatua in sinarimadon naton sin kita ain notobatú i Kristus Yesus.

SURAT I PAULUS KON JAMAAT RUM 10:9

Sin aka akúon in bibig monimu kon: “Ki Yesus tua in Tuhan”. bo ginamu in mopirisaya kon ki Allah ain nomiag bui kon i Yesus, dá iko in mosaḷamatbí.

OUMAN IN RASUL MITA 22:10

Bo akuoi in noḻibó kon i Tuhan, ‘Dá onu in aidanku, Tuhan?’ Ki Tuhan in noguman nanaa kon inakó, ‘Pobangondon bo bayádon in Damsyik, bain kon tua bo poguman-Ku kon inimu onu in aidanmu.’

OUMAN IN RASUL MITA 9:6

Táe tanaa mako in poguman-Ku kon inimu pobangondon bo tuotdon in kotá. Bain kon tua bo poguman-Ku kon inimu mongo onu in pokiaid-Ku kon inimu.”

WAHYU 2:8

“Paisdon kon malaekat inta kon Smirna, nanaa: Nanaa in koyow nongkon i-Nia inta muna-munamai bo inta pangabisan – inta ain minatoi bo inta nobiag bui.

WAHYU 1:18

Akuoi naa in Sia inta nobiag tua! Akuoi ain minatoi, táe indoiaika, Akuoi in nobiagbí bo diá bidon mato-matoi. Popatoi bo dunia in intau minatoi kon bonu bidon in kawasa-Ku.

PETRUS 1 1:21

Sia in pinopodoyonan in pirisaya monimu kon i Allah inta ain nomiag bui kon i-Nia. Dá ki Allahbí in pinirisaya monimu bo ki Allahbí doman in pinopoandoḷan monimu in harapan.

IBRANI 13:20

Ki Allah in nomiagdon bui kon i Yesus Kristus Tuhan naton nongkon kinopatoian-Nea. Popisíbí in popatoi-Nea tatua, dá masai naa Sia in nobaḻídon Gombala Momulia kon i naton inta domba-Nea mita. Kinopatoian-Nea tatua in noposah bidon kon dodandian mononoi inta inaidan i Allah takin inaton.

GALATIA 1:17

Ná doman tua, akuoi in diábí minayá in Yerusalem bo notayak kon i monia inta munadon nobaḻí rasul. Táe akuoi in minayábí in butá Arab, bain nongkon tua bo akuoi in minayá bui in Damsyik.

SURAT I PAULUS KON JAMAAT RUM 14:9

Ki Kristus ain minatoi, táe buidon nobiag. Manangka intua sia in nobaḻídon Tuhan kon intau mita inta nobiag bo kon intau mita doman inta ain minatoi.

YOHANES 20:21

Bo ki Yesus in noguman kon i monia bui, “Salam dodamean bo kobiagan motompia kon i monimu. Ná ki Amá nopotabá kon i-Nakó, yo natua doman in Akuoi mopotabá kon i monimu.”

YOHANES 10:30

Akuoi bo ki Amá in tobatúbí.”

YOHANES 5:19

Tubag i Yesus kon intau mita tatua, “Poguman-Kudon kon i monimu, Adí in diábí mokoaid kon onu bo onu aka mopomaké in kawasa-Nea tontaní. Sia in tongábí mogaid kon onu inta ain inontong-Nea inaidan i Amá-Nea. Sin onu in inaidan i Amá, tua doman in inaidan i Adí.

OUMAN IN RASUL MITA 3:15

Moiko in noḻimodon kon i-Nia inta pangkoi in kobiagan in bayongan intau, táe bui bo biniag i Allah in Sia nongkon sigad in intau minatoi. Bo kami naa in nokoontong tontaní kon tua komintan.

GALATIA 1:15

Tongá pinodoyonbí kon tabi i Allah, sahingga in piniḻí-Nea in akuoi kon tungkuḷ in kon bonupa in sian i ináku. Inoiní-Nea in akuoi sin mogaid kon oaidan-Nea.

YOSUA 22:15

Dá nodapotdon in mosia kon tampat in suku i Ruben, i Gad bo suku i Manasye kon butá in Gilead.