EZRA 9:15 - Alkitab Singog In Mongondow Masa In Tanaa

¹⁵ Tuhan, Allah in Israel Iko in moadil, umpaka natua pinomayá-Mubí mako in kami in nobiag. Kami in mongaku kon taḷá nami kon ini-Mu; diádon in kami mokobaḻí in tumayow kon ini-Mu.”

EZRA 9:15 Referans Kwoze

MAZMUR 130:3

Aka umuran toropon-Mu in dosa nami, o Tuhan, ki inebí in mokotongod?

YOHANES 8:24

Tuamai Akuoi in noguman kon i monimu, kon moiko in matoibí kon bonu in dosa aka diá mopirisaya kon ‘Akuoibí in Sia inta sinumangoi Akuoi Oyúon’.”

SURAT I PAULUS KON JAMAAT RUM 3:19

Tanaa, kinotaauandon naton kon bayongan inta pinais kon bonu in hukum agama Yahudi, pinomakusudbí kon intau mita inta nobiag dinumudui kon hukum tatua. Tuamai in diábí tobatúmai intau in motaau mobogoi in alasan onu, bo bayongan intau kon dunia naa in motaaubí tuntuton i Allah.

YOHANES 8:21

Ki Yesus in bui noguman kon i monia, “Akuoi in mayá, bo moiko i motayakbí kon i-Nakó, táe moiko in matoibí kon bonu in dosamu. ‘Tampat inta bayáan-Ku, diábí kodapotan monimu.’ ”

SURAT I PAULUS KON JAMAAT RUM 10:3

Diá kinotaauan monia mongo naonda in pogogaid i Allah monompia bui kon hubungan-Nea takin intau. Bo popisí in mosia moibog dumudui kon aid monia tontaní, dá mosia in doíbí dumudui kon aid inta sinundú i Allah.

DANIEL 9:14

Iko, Tuhan Allah nami, ain nopohukum kon inami in anib inta ain sinadia-MU; aid-Mu umuranbí moitombutung bo moadil, táe kami in diábí nokidongogmai kon singog-Mu.

YEHEZKIEL 33:10

Ki Tuhan in noguman kon inakó, “Ei intau ilo-ilow, potaaudon bui kon intau in Israel in tosingogon monia tanaa, ‘Mororiga totok in gina nami popisí in inuntuan in dosa bo aid moraat nami. Naonda sinbá kami in umuran mobiag?’

YEREMIA 12:1

“Aka diaanku in pelekaraku kon tayowon-Mu, o Tuhan, yo notantú bidon kon moniatabí kon Ikobí in noitutui. Táe moibogbí doman in akuoi in moḻibó kon inta moadil kon ini-Mu: Nongonu sin intau moraat in mobiagbí mooyúon? Nongonu sin intaubí inta diá motuḻid in mokodapot kon inta koibog monia?

MAZMUR 143:2

Akuoi naa in mogogundoi-Mu, dikabí monisig kon inakó, sin diábí in intau in diá kotaḷá in kon tayowon-Mu.

KORINTUS 1 15:17

Bo aka ki Kristus in diá biniag bui, dá pirisaya monimu in tongábí naonda bo togoindop bo moiko in umuranpabí nobiag kon bonu in kaadaan binaradosa bo beresi diá koharapan.

EZRA 9:6

Akuoi in noguman, “Oo Allahku, akuoi naa in mooyá in dumungá kon tayowon-Mu. Dosa nami in moyo-moyoguntuḷdon kon tudu in uḷu nami noidapotdon in ḷangit.

MAZMUR 76:7

Bayongan in kabaḷo bo tumotakoinea noḷabú minatoi in guak-Mu, o Allah Yakub!

MAZMUR 116:5

Ki Tuhan tua in kototabi bo moadil; ki Allah naton nopuḻing in tabi.

MAZMUR 119:137

Iko in moadil, o Tuhan, bayongan in hukum-Mu in noitongkaná.

YEHEZKIEL 7:16

Tongosilai in kotaḻibanbí bo moḷagui mayá in buḷud. Kon tua mosia in nádon onda bo ḷagapan mita paḷoma inta binuntun nongkon ḷopá mita; komintanbí mogongot popisí in dosa mita monia.

IMAMAT 26:40

Táe buímu in mongakubí kon dosa monia bo dosa in mogoguyang monia inta ain noḷawang kon i-Nakó bo ain nomarontak kon i-Nakó,

IMAMAT 26:41

dá iḷawang-Ku domandon in mosia bo inuntun-Ku pinobayá in tampat pinoḷumbúan kon butá in musung mita monia. Pangabisannea, aka buímu mita moitungkudon bo dinumuduidon kon hukuman popisí in dosa bo pinomarontakan monia,

YOSUA 22:15

Dá nodapotdon in mosia kon tampat in suku i Ruben, i Gad bo suku i Manasye kon butá in Gilead.

EZRA 1:4

Aka oyúon in umat-Nea tobatú kon pinoḷumbúan tanaa in moparaḷu kon totuḷung sinbá mokopobuipa, dá topodiugnea mita in mustibí mobogoi in totuḷung tatua. Mosia in mustibí mobogoi in saḷaka bo buḷawan, tongkaaḷ kon daḷan takin doman biag pododatogan, bo sosumba doman inta pakéon kon Baḷoi Tuhan kon Yerusalem.”

NEHEMIA 9:8

Nouḻí-Mu in sia umuran mosatia kon ini-Mu bo motoindudui. Bo inaidan-Mu takinnea in dodandian inta moroton. Butá in Kanaan, Het bo Amori, butá in Peris, Yebus bo Girgasi, tua komintan in ogoi-Mu kon inia; mobaḻí pogogutunan in bayongan buínea. Noiduduimai inintompodan-Mu in dandi tatua kon inia, sin Iko in moadil bo mosatia.